ސުންނީންނާއި ޝީޢީން އެކަތިގަނޑަކަށްވެ، ޚިޔާލުތަފާތުވުންތައް ނައްތާލަން ވީ ވަގުތު ޖެހިއްޖެ ކަމަށް އީރާނުގެ ރައީސް މަސްޢޫދު ޕީޒިޝްކިއާން ގޮވާލައްވައިފިއެވެ. އެމަނިކުފާނު ވިދާޅުވި ގޮތުގައި މުސްލިމުންގެ މެދުގައި އޮންނަން ޖެހޭނީ ކީރިތި ޤުރުއާނާއި ކީރިތި ރަސޫލާ ދަސްކޮށްދެއްވި އަޚުވަންތަކަމެވެ. މި އެއްބައިވަންތަކަމަކީ ހަމައެކަނި ދެއްކުންތެރިކަމެއް ނޫން ކަމަށާއި، ބޭރުގެ ނުފޫޒުތަކުން ސަރަޙައްދީ މަސްލަހަތު ނަގާލުމަށް ކުރާ މަސައްކަތްތައް ހުއްޓުވޭނީ ހުރިހާ މުސްލިމުން އެއްބާރުލުންދީގެން ކަމަށް ޕީޒިޝްކިއާން ފާހަގަކުރެއްވިއެވެ.
ޕީޒިޝްކިއާން މިގޮތަށް ގޮވައިލެއްވީ ސަރަޙައްދީ ނުތަނަވަސްކަން އިންތިހާއަށް ބޮޑުވެ، އީރާނާއި ދެކޮޅަށް ގަލްފުގެ ގައުމުތައް އަނބުރާލުމަށް އިސްރާއީލާއި އެމެރިކާއިން ބޮޑެތި ރޭވުންތަކެއް ރާވަމުންދާ ދަނޑިވަޅެއްގައެވެ.
އެމެރިކާއިން އީރާނުގެ ބަނދަރުތައް ބަންދުކޮށް އަސްކަރީ ފިއްތުންތައް ކުރިމަތިކުރަމުންދާއިރު، އީރާނުގެ އެތެރޭގެ ޚިޔާލުތަފާތުވުންތަކުގެ ފައިދާ ނެގުމަށް ވެސް ދަނީ މަސައްކަތް ކުރަމުންނެވެ.
Advertisement
އަނެއްކޮޅުން ހުރްމުޒް ކަނޑުއޮޅީގެ ވިޔަފާރި ދަތުރުފަތުރުތައް އަލުން ހުޅުވާލުމާ ބެހޭގޮތުން އީރާނާއި އޮމާނާ ދެމެދު މުހިންމު މަޝްވަރާތަކެއް ކުރިއަށްދާކަން ވެސް ބައިނަލްއަޤުވާމީ މީޑިއާތަކުން ރިޕޯޓުކުރެއެވެ. އީރާނުން ބޭނުންވަނީ އެމެރިކާގެ ދަތިކުރުމުގެ ފިޔަވަޅުތައް އުވާލައި، ހަނގުރާމަ އެއްކޮށް ހުއްޓާލުމަށެވެ.
އީރާނުގެ ރައީސް ވިދާޅުވީ، ބޭރުގެ ބާރުތަކުން ގައުމު ބައިބައިކުރަން ކުރާ މަސައްކަތްތައް ނާކާމިޔާބު ކޮށްލެވޭނީ ސަރަޙައްދީ ގައުމުތަކާއި އެތެރޭގެ ބާރުތައް އެއްގަލަކަށް އަރައިގެންނެވެ.
