ސަރަޙައްދީ ޤައުމަކުން އީރާނަށް ޙަމަލާއެއް ނުފޮނުވާ ހިނދަކު އެ ޤައުމަކަށް ޙަމަލާ އެއް ނުދޭނެ ކަމަށް އީރާނުގެ ވަގުތީ ލީޑަޝިޕް ކައުންސިލުން ބުނެފިއެވެ.
މިއަދު ޓީވީން ދެއްކެވި ޚިޠާބުގައި ރައީސް މަސްޢޫދު ޕީޒިޝްކިއާން ވިދާޅުވީ އީރާނާއި ދެކޮޅަށް އިސްރާއީލާއި އެމެރިކާ ގުޅިގެން ކުރަމުންދާ ހަނގުރާމައިގައި އަވަށްޓެރި ޤައުމުތަކަށް ޙަމަލާ ދިނުމަކީ އީރާނުން ބޭނުންވާ ކަމެއް ނޫން ކަމަށާއި ފާއިތުވި ދުވަސްތަކުގައި އީރާނުގެ ޙަމަލާތަކުގެ އަސަރު ކުރި އަވަށްޓެރި ދައުލަތްތަކުގެ ކިބައިން މަޢާފަށް އެދޭ ކަމަށެވެ.
މިއަދު ރައީސް ޕީޒިޝްކިއާން މިކަން އިޢުލާން ކޮށްފައި މި ވަނީ މެދުއިރުމަތީގެ އެކި ހިސާބުތަކަށް ހަނގުރާމަ ފުޅާވެ، އަނެއްކޮޅުން ޢަރަބިންނާއި ގުޅިގެން އީރާނަށް ޙަމަލާ ދިނުމަށް އިސްރާއީލުން ކޯލިޝަނެއް ހަދަން މަޝްވަރާ ކުރަމުންދާ ދަނޑިވަޅެއްގައެވެ.
