އީރާނުން ޚުރްމުޒް ބަންދު ކުރުމުގެ ސަބަބުން ތަކެތީގެ އަގު ބޮޑުވެ، ޚާއްޞަކޮށް ތެލުގެ އަގު އިންތިހާ އަށް އުފުލެމުންދާ ދަނޑިވަޅެއްގައި ހަނގުރާމަ ނިންމާލަން އީރާނުން މަޝްވަރާ ކުރަން ބޭނުންވާ ކަމުގެ ނުސީދާ އިޝާރާތެއް، އެ ޤައުމުގެ ރައީސް މަސްޢޫދު ޕީޒިޝްކިއާން ދެއްވައިފިއެވެ. ރައީސް ޕީޒިޝްކިއާން ވިދާޅުވީ ހަނގުރާމަ ހުއްޓާލުމަށް ނިންމާ ކޮންމެ ނިންމުމަކީ ރައްޔިތުންގެ ސަލާމަތާއި ރައްކާތެރިކަން އަދި ގައުމީ މަސްލަހަތު ފުރިހަމައަށް ކަށަވަރުކޮށްދޭ ނިންމުމަކަށް ވާންޖެހޭނެ ކަމަށެވެ. މިހެން އޭނާ ވިދާޅުވީ ކެބިނެޓްގެ ވަޒީރުންނާއި މަޝްވަރާ ކުރައްވަމުންނެވެ.

މި ހަނގުރާމަ ހުއްޓުވުމަށްޓަކައި ބައިނަލްއަގުވާމީ ދުނިޔޭގައި ގިނަ މަސައްކަތްތަކެއް ކުރެވެމުންދާއިރު، ޕާކިސްތާނާއި، ތުރްކިޔޭ އަދި ސްޕެއިންގެ އިތުރުން، އީރާނާއެކު އެންމެ ވަރުގަދައަށް މިކަމުގައި މަޝްވަރާކުރަމުންދަނީ ޗައިނާ އާއި ރަޝިއާއިންނެވެ. މި ދެ ގައުމުން އަންނަނީ ސަރަހައްދީ ހަމަޖެހުން ގާއިމުކުރުމަށްޓަކައި އީރާނުގެ ދައުރު މުހިންމުކަން ފާހަގަކޮށް، ސިޔާސީ ހައްލެއް ހޯދުމަށް ބާރުއަޅަމުންނެވެ.

އީރާނުގެ ރައީސް ވިދާޅުވީ ސަރަޙައްދީ މަސްލަޙަތު ނަގައިލީ އެމެރިކާ އާއި އިޒުރޭލުން ކަމަށާއި، އިސްވެ ޙަމަލާ ދިނީ އެމެރިކާ އާއި އިޒުރޭލުން ކަމަށް ވާތީ، ބަދަލު ހިފުމުގެ ޙައްޤު އީރާނަށް ލިބިގެންވާ ކަމަށެވެ.

ޕެންޓަގަން އިން ދަނީ އެއްގަމުމަގުން އީރާނަށް އެރުމާއި ދޭތެރޭ ވެސް މަޝްވަރާ ކުރަމުން ކަމަށް ރިޕޯޓުތައް ބުނެއެވެ. މިކަމަށް ރައްދުދީ އީރާނުން ބުނީ ތިމަންނާމެން މިތިބީ އިންތިޒާރުގައި ކަމަށާއި، ވަރުގަދަ ރައްދެއް ދޭނެ ކަމަށެވެ.

ހަނގުރާމައިގެ މަސްރަހު ފިނިކުރުމަށްޓަކައި އެމެރިކާ އާއި އިޒުރޭލާއެކު ވެސް ބައެއް ފަރާތްތަކުން އަންނަނީ މުއާމަލާތްތައް ކުރަމުންނެވެ. އެގޮތުން ޔޫރަޕްގެ އިއްތިހާދުގެ ގައުމުތަކާއި، އެފްރިކާގެ އިއްތިހާދުގެ އިތުރުން އޭޝިއާގެ ބައެއް ބޮޑެތި ގައުމުތަކުން އަންނަނީ އެމެރިކާއަށް ބާރުފޯރުވައި، ހަމަލާތައް ހުއްޓާލުމަށް މަގުފަހިކުރުމަށް މަސައްކަތް ކުރަމުންނެވެ. މީގެ އިތުރުން ރަޝިއާއިން ވެސް އަންނަނީ ހުރިހާ ފަރާތްތަކަކާ އެކު ވާހަކަދައްކައި، މަސްލަހަތު ގާއިމުކުރެވޭނެ ގޮތްތަކެއް ހޯދުމަށް ބައިނަލްއަގުވާމީ މައިދާނުގައި ވަކާލާތު ކުރަމުންނެވެ.

ނަމަވެސް، އީރާނުގެ ރައީސް ތަކުރާރުކޮށް ވިދާޅުވަމުން ގެންދަވަނީ، އިޒުރޭލުގެ އުދުވާނުތައް ހުއްޓުވައި، ފަލަސްތީނުގެ ރައްޔިތުންގެ ހައްގުތައް ކަށަވަރުނުވާ އެއްވެސް އެއްބަސްވުމަކުން ދާއިމީ ސުލްހައެއް ނާންނާނެ ކަމަށެވެ.