ޣައްޒާގެ ކުށެއްނެތް ޢާންމު ރައްޔިތުންނާ ދެކޮޅަށް އިސްރާއީލުން ހިންގަމުންދާ ލާއިންސާނީ ޖަރީމާތަކާއި އަނިޔާވެރި ޢަމަލުތައް ދިފާޢުކުރެވޭނެ އެއްވެސް ޝަރުޢީ އަދި އަޚްލާޤީ ހުއްޖަތެއް ނެތް ކަމަށް ޤަޠަރުގެ ބޮޑުވަޒީރު އަދި ޚާރިޖީ ވަޒީރު ޝައިޚް މުޙައްމަދު ބިން ޢަބްދުއްރަޙްމާން އަލްޘާނީ ވިދާޅުވެއްޖެއެވެ.
ބައިނަލްއަޤްވާމީ ޚަބަރު ފަތުރާ ވަސީލަތްތަކުން ރިޕޯޓްކޮށްފައިވާ ގޮތުގައި، ޤަޠަރުގެ ބޮޑުވަޒީރު ވަނީ ޣައްޒާގެ ޙާލަތާ ގުޅޭގޮތުން ވާހަކަފުޅު ދައްކަވަމުން، އިސްރާއީލުން ހިންގަމުންދާ ޤަތުލުޢާންމު ވަރަށް ބޮޑަށް ކުށްވެރިކުރައްވާފައެވެ. އެމަނިކުފާނު ފާހަގަކުރެއްވި ގޮތުގައި، ޣައްޒާގެ ރައްޔިތުންނާ ދެކޮޅަށް ހިންގާ މިފަދަ ބޮޑެތި ޖަރީމާތަކަކީ އެއްވެސް ޙާލަތެއްގައި ބަލައިގަނެވޭނެ އަދި އޭގެ ދިފާޢުގައި ވާހަކަދެއްކޭނެ ކަންކަމެއް ނޫނެވެ.
މީގެއިތުރުން، ބައިނަލްއަޤްވާމީ މުޖުތަމަޢުން މިކަމުގައި އިޚްތިޔާރުކޮށްފައިވާ ހިމޭންކަމާމެދު ކަންބޮޑުވުން ފާޅުކުރައްވަމުން، ޣައްޒާގެ ރައްޔިތުންނަށް ދެމުންދާ ޙަމަލާތައް ވަގުތުން ވަގުތަށް ހުއްޓުވުމަށް އެމަނިކުފާނު ގޮވާލެއްވިއެވެ. އަދި ޣައްޒާއަށް ބޭނުންވާ އިންސާނީ އެހީތެރިކަން އެއްވެސް ހުރަހަކާ ނުލައި ފޯރުކޮށްދިނުމުގެ މުހިންމުކަންވެސް ޤަޠަރުގެ ބޮޑުވަޒީރު ފާހަގަކުރެއްވިއެވެ.
Advertisement
ފަލަސްޠީނުގެ ޣައްޒާގައި އިސްރާއީލުން ދެމުންދާ ޢުދުވާނީ ޙަމަލާތަކުގައި އެތައް ހާސް ކުށެއްނެތް ކުޑަކުދިންނާއި އަންހެނުން އަދި ޢާންމު ރައްޔިތުން ޝަހީދުވެ، ބޮޑު އިންސާނީ ކާރިޘާއެއް ވަނީ ކުރިމަތިވެފައެވެ. ޤަޠަރަކީ މި މައްސަލައަށް ސުލްޙަވެރި ޙައްލެއް ހޯދުމަށާއި، ހަނގުރާމަ ހުއްޓުވުމަށް މެދުވެރިއެއްގެ ދައުރު އަދާކުރަމުން އަންނަ މުހިންމު ޤައުމެކެވެ.
