މި މަހުގެ 20 އިން 26 އަށް ސްކޭމާއި ގުޅޭ 36 މައްސަލައެއް ފުލުހުންނަށް ރިޕޯޓުކޮށްފައިވާ ކަމަށާއި، މި މައްސަލަތަކުގައި އާންމުންގެ އަތުން ފޭރުނު 454,767.32 ރުފިޔާގެ ތެރެއިން، 218,645.00 ރުފިޔާ އަނބުރާ ހޯދައިދީފައިވާ ކަމަށް ފުލުހުން ބުނެފިއެވެ.
ސްކޭމްގެ މައްސަލަތައް ހިންގާފައިވާ ގޮތްތަކަށް (މޯޑަސްއަށް) ބަލާއިރު، އެންމެ ގިނައީ އީ-ކޮމާސް ނުވަތަ އޮންލައިންކޮށް މުދާ ގަނެވިއްކުމުގެ ތެރެއިން ހިންގާފައިވާ މައްސަލަތަކެވެ. އެގޮތުން އީ-ކޮމާސްގެ 18 މައްސަލައަކާއި، ފައިސާ މާރުކުރުމުގެ 7 މައްސަލައެއްގެ އިތުރުން، އެހެން މީހުންގެ ނަމުގައި އޮޅުވާލައިގެން މީހަކަށް ހެދިގެން (އިމްޕާރސޮނޭޝާން) ހިންގި 4 މައްސަލައެއް ހިމެނެއެވެ.
މީގެ އިތުރުން ބުކިންގ ކެންސަލްކުރުމާއި ރިފަންޑް ދިނުމުގެ ނަމުގައި 3 މައްސަލައަކާއި، އިންވެސްޓްމަންޓް ސްކޭމްގެ 1 މައްސަލައިގެ އިތުރުން އެހެނިހެން ގޮތްގޮތުން ހިންގާފައިވާ 2 މައްސަލައެއް ވަނީ ފާހަގަކުރެވިފައެވެ.
Advertisement
މި އޮޅުވާލުންތައް ހިންގުމަށް ބޭނުންކޮށްފައިވާ ވަސީލަތްތަކުގެ ތެރޭގައި އޮންލައިން މެސެޖިންގ ޕްލެޓްފޯމްތަކާއި، އައިބޭ، ޓިކްޓޮކް، ފޯނު ކޯލްތައް، ނުދަންނަ ލިންކުތައް އަދި ފޭސްބުކް މާކެޓްޕްލޭސް ހިމެނެއެވެ.
ކުރިއަށްއޮތް ތަނުގައި މިފަދަ ހާދިސާތަކުން ރައްކާތެރިވުމަށްޓަކައި، ނުދަންނަ ފަރާތްތަކަށް ކުރިއާލާ ފައިސާ ނުފޮނުވުމަށް ފުލުހުން ވަނީ އިރުޝާދުދީފައެވެ. އަދި ކޮންމެ މާލީ މުއާމަލާތެއް ކުރުމުގެ ކުރިންވެސް، އެ މުއާމަލާތެއްގެ ސައްހަކަން ރަނގަޅަށް ކަށަވަރުކުރުމަށް ފުލުހުން ވަނީ އާންމުންނަށް އިލްތިމާސްކޮށްފައެވެ. މީގެ އިތުރުން، މިކަހަލަ މައްސަލައެއް ހިނގުމާއެކު ވީހާވެސް އަވަހަށް ފުލުހުންނަށް ރިޕޯޓުކުރުމަށް، އެ އިދާރާއިން އިލްތިމާސްކުރެއެވެ.
