ޔޫކޭ އެއާބޭސް ކައިރިން ފެނުނު ގޮވާތަކެއްޗާއި އީރާނާއި ގުޅުމެއް ނެތް ކަމަށް ބުނެފި

އިނގިރޭސިވިލާތުގެ (ޔޫކޭ) ރޯޔަލް އެއާފޯސް (އާރް.އޭ.އެފް) ފެއާފޯޑް ބޭސް ކައިރިން ގޮވާތަކެތި ފެނުނު މައްސަލައިގައި އީރާނުގެ އެއްވެސް ބައިވެރިވުމެއް ނެތް ކަމަށް ބުނެ، އެ ގައުމުން އެ ތުހުމަތުތައް ރަސްމީކޮށް ދޮގުކޮށްފިއެވެ.

ލަންޑަނުގައި ހުންނަ އީރާނުގެ އެމްބަސީން ނެރުނު ބަޔާނެއްގައި ބުނެފައިވަނީ، މިއީ އެއްވެސް އަސާސެއް ނެތް، އަދި ހަގީގަތާ ހިލާފު ދޮގު ވާހަކަތަކެއް ކަމަށެވެ. އަދި މިއީ ބައެއް ފަރާތްތަކުން އީރާނާ މެދު ނަފުރަތު އުފެއްދުމަށް ("އީރާނޯފޯބިއާ") ފަތުރަމުންދާ ޕްރޮޕަގަންޑާއެއް ކަމަށްވެސް އެ ބަޔާނުގައި ސިފަކޮށްފައިވެއެވެ.

މި ހާދިސާ ހިނގާފައިވަނީ އާދިއްތަ ދުވަހުގެ ފަތިހުގެ ވަގުތެއްގައެވެ. ފެއާފޯޑް ބޭސް ކައިރީގައި މަގު ބަންދުވާ ގޮތަށް އޮތް ތިން ވެހިކަލެއް ފެނިގެން އާންމުންގެ މީހަކު ރިޕޯޓްކުރުމުން، ހަތިޔާރު އެޅި ފުލުހުން ވަނީ އެ ސަރަހައްދަށް ގޮސް އެ އުޅަނދުތައް ބަލައި ފާސްކޮށްފައެވެ. މި ބަލައިފާސްކުރުމުގެ ތެރެއިން ގޮވާތަކެތި ކަމަށް ޝައްކުކުރެވޭ އެއްޗެހި ފެނުމާ ގުޅިގެން، އެ ސަރަހައްދުގެ 400 މީޓަރު ބަންދުކޮށް، ކައިރީގައި ދިރިއުޅޭ 85 އާއިލާއެއް ވަނީ ރައްކާތެރި ހިސާބުތަކަށް ބަދަލުކޮށްފައެވެ.

ޔޫކޭގެ ކައުންޓަރ-ޓެރަރިޒަމް ފުލުހުން މިހާރު ވަނީ މި މައްސަލައިގައި ތުހުމަތުކުރެވޭ، އުމުރުން 20 އަހަރުގެ ފަސް ފިރިހެނުން ހައްޔަރުކޮށްފައެވެ. ފުލުހުން ކަށަވަރުކޮށްދީފައިވާ ގޮތުގައި ހައްޔަރުކުރި ފަސް މީހުންނަކީވެސް ލަންޑަނަށް ނިސްބަތްވާ އިނގިރޭސި ރައްޔިތުންނެވެ. އެމީހުން ހައްޔަރުކޮށްފައިވަނީ ޓެރަރިޒަމްގެ އަމަލެއް ހިންގަން އުޅުމުގެ ތުހުމަތުގައެވެ.

އާރް.އޭ.އެފް ފެއާފޯޑް ބޭހަކީ އެމެރިކާގެ ވައިގެ ސިފައިންގެ ބޮންއަޅާ ބޯޓުތައް ޔޫރަޕްގައި ބޭނުންކުރާ މުހިންމު މަރުކަޒެކެވެ. މިއަހަރުގެ ކުރީކޮޅު ޔޫކޭއިން ވަނީ އީރާނުގެ މިސައިލް އަދި ޑްރޯން ސައިޓްތަކަށް ހަމަލާދިނުމަށް އެމެރިކާގެ ސިފައިންނަށް މި ބޭސް ބޭނުންކުރުމުގެ ހުއްދަ ދީފައެވެ. އެއާއެކު، އީރާނުގެ ރިވޮލިއުޝަނަރީ ގާޑްސް (އައި.އާރް.ޖީ.ސީ) އިން ކުރިން އިންޒާރުދީފައި ވަނީ އީރާނަށް ހަމަލާދޭން ބޭނުންކުރާ ކޮންމެ ބޭހަކީ އެގައުމުގެ ހަމަލާތަކުގެ އަމާޒަކަށް ވާނެ ކަމަށެވެ.

މި މައްސަލައިގައި އީރާނުގެ އަތެއް ވެދާނެ ކަމަށް ބޮޑަށް ބެލެވުނު ނަމަވެސް، ޔޫކޭގެ ތަހުގީގު ޓީމުތަކުން ދަނީ ރަޝިޔާގެ ބައިވެރިވުމެއް ނުވަތަ އެހެން ހަނގުރާމަވެރި ޖަމާއަތެއްގެ އަތެއް މިކަމުގައި ވޭތޯވެސް ބަލަމުންނެވެ. ހައްޔަރުކުރި މީހުންގެ ތަހުގީގު މިހާރު ދަނީ ކުރިއަށެވެ.