ރާއްޖޭގެ ތާރީހުގައި ވެސް ހިންގާ އެންމެ ބޮޑު އެއް އިންވެސްޓްމަންޓާއެކު ދިވެހި ރައްޔިތުން އެ ކުންފުންޏަށް ބޮޑު އިތުބާރެއް ކޮށްފައިވާ ކަމަށާއި، މަސައްކަތް ކުރިއަށް ގެންދާނީ ދިވެހިންގެ އުންމީދުތަކާ އެއްގޮތަށް ކަމަށް ޔޫއޭއީގެ އީގަލް ހިލްސް ކުންފުނީގެ ޗެއާމަން އަދި އެމާރ ކުންފުނީގެ ފައުންޑަރ މުހައްމަދު އަލްއައްބާރު ވިދާޅުވެއްޖެއެވެ.

އިންސްޓަގްރާމް މެދުވެރިކޮށް އާންމުކުރެއްވި ވީޑިއޯއެއްގައި، ދުނިޔޭގެ މަޝްހޫރު ވިޔަފާރިވެރިޔާ އަލްއައްބާރު ވަނީ ރާއްޖޭގައި ތަރައްގީކުރުމަށް ހަމަޖެހިފައިވާ "މޯލްޑިވްސް ވޯޓަރފްރަންޓް އެންޑް މެރީނާ" މަޝްރޫއުގެ ތަފްސީލުތައް ހާމަކުރައްވާފައެވެ. މި މަޝްރޫއަކީ ދިވެހި ސަރުކާރާއި އަބޫދާބީގެ އީގަލް ހިލްސް ކުންފުންޏާ ދެމެދު ވެވުނު ވިޔަފާރީގެ އެއްބަސްވުމެއްގެ ދަށުން ހިންގުމަށް ހަމަޖެހިފައިވާ މަޝްރޫއެކެވެ.

އަލްއައްބާރު ވިދާޅުވީ، ރާއްޖޭގެ ތާރީހުގައި އަންނަ އެންމެ ބޮޑު އިންވެސްޓްމަންޓް އެ ބޭފުޅުންނާ ހަވާލުކޮށް ދިވެހިން ކުރި އިތުބާރަކީ ލިބުނު ވަރަށް ބޮޑު ޝަރަފެއް ކަމަށެވެ. އަދި މާތް ﷲ ގެ ވާގިފުޅާއެކު، ދިވެހި ރައްޔިތުންގެ އުންމީދުތައް ހަގީގަތަކަށް ހަދައިދިނުމަށް އިހްލާސްތެރިކަމާއެކު މަސައްކަތް ކުރައްވާނެ ކަމުގެ ޔަގީންކަން އޭނާ ދެއްވިއެވެ. މީގެއިތުރުން ރާއްޖެއަކީ ދުނިޔޭގެ އެހެން އެއްވެސް ތަނަކާ އަޅާނުކިޔޭ ފަދަ ގުދުރަތީ ރީތިކަމެއް ލިބިފައިވާ ގައުމެއްކަން ފާހަގަކުރައްވައި، މި މަޝްރޫއު ކުރިއަށް ގެންދާނީ އެ ރީތިކަމާއި ތިމާވެއްޓަށް ފުރިހަމައަށް ރައްކާތެރިވެ ޒިންމާދާރުކަމާއެކު ކަމަށް ވިދާޅުވިއެވެ.

ފިޔަވަހިތަކަކަށް ބަހާލައިގެން ކުރިއަށްގެންދާ މި ބިޔަ މަޝްރޫއުގެ ޖުމްލަ އިންވެސްޓްމަންޓް ގާތްގަނޑަކަށް 20 ބިލިއަން ޑޮލަރަށް އަރާނެ ކަމަށް ލަފާކުރެވެއެވެ. މި މަޝްރޫއު ތަރައްގީ ކުރަނީ މާލެއިން ފުރައިގެން ލޯންޗުގައި ގާތްގަނޑަކަށް 17 މިނެޓުން ދެވޭ ފުށިދިއްގަރު ފަޅު (ރަސްމާލެ) ގެ ގާތްގަނޑަކަށް 500 ހެކްޓަރުގެ ބިމުގައެވެ.

މި މަޝްރޫއުގެ ދަށުން ޒަމާނީ ހޮޓާތަކާއި ރިޒޯޓްތައް، މަތީ ފަންތީގެ ބްރޭންޑެޑް ރެޒިޑެންސްތައް، ބޮޑު މެރީނާއެއް، ވިޔަފާރި އާއި ކެއިންބުއިމުގެ ހިދުމަތްތައް، މުނިފޫހިފިލުވުމުގެ ވަސީލަތްތައް އަދި ދުޅަހެޔޮކަމާއި ތަޢުލީމާއި ސިއްހީ އަދި އިޖުތިމާއީ އެކި ހިދުމަތްތައް އެއްފުރާޅެއްގެ ދަށުން ގާއިމުކުރެވިގެންދާނެއެވެ. އަދި ރާއްޖޭގެ ގާނޫނުތަކާ އެއްގޮތްވާ ގޮތުގެ މަތިން މި ތަންތަން 99 އަހަރާ ހަމައަށް ދިގު މުއްދަތަކަށް ކުއްޔަށް (ލީސްހޯލްޑް އުސޫލުން) ދޫކުރުމަށް ވަނީ ހަމަޖެހިފައެވެ.

އަލްއައްބާރު ފާހަގަކުރެއްވި ގޮތުގައި ރާއްޖެއަށް މިހާރު ބޭނުންވަނީ އިގްތިސާދީ އިތުރު ހަރަކާތްތަކާއި، ދައުލަތަށް ވަންނަ އާމްދަނީ އިތުރުވުމާއި، ވަޒީފާގެ ފުރުސަތުތަކުގެ އިތުރުން ރާއްޖޭގެ ވިޔަފާރިތަކަށް ފުރުސަތުތައް ފަހިވުމެވެ. މި މަޝްރޫއުގެ ސަބަބުން ދިވެހިންނަށް އެތައް ހާސް ބޯހިޔާވަހިކަމެއް ލިބި، ދިހަހާހަށް ވުރެ ގިނަ ވަޒީފާގެ ފުރުސަތު އުފެދި، އަހަރަކު އެއް މިލިއަނަށް ވުރެ ގިނަ ފަތުރުވެރިން އިތުރަށް ޒިޔާރަތްކުރާނެ ކަމަށް ލަފާކުރެވެއެވެ. އަދި ވިޔަފާރި މުއާމަލާތްތަކުންނާއި ޕްރޮޕަޓީ ވިއްކުމުން ލިބޭ ފީތަކުގެ ތެރެއިން ދިވެހި ސަރުކާރަށް ބޮޑު ޢާމްދަނީއެއް ލިބިގެންދާނެއެވެ.

މި މަޝްރޫއުގެ އަމަލީ މަސައްކަތް 2027 ވަނަ އަހަރުގެ ފުރަތަމަ ކުއާޓަރުގައި ފެށޭނެ ކަމަށް ލަފާކުރައްވަމުން އަލްއައްބާރު ވިދާޅުވީ، ދުބާއީގެ މަޝްހޫރު އީމާރ ޕްރޮޕަޓީސް އިން ވެސް މި މަޝްރޫއުގައި ހިއްސާވުމުގެ ފުރުސަތު އެބައޮތް ކަމަށެވެ. މީގެއިތުރުން، މިއީ ދިވެހިރާއްޖޭގައި ހިންގާ މަޝްރޫއަކަށް ވާތީ ދިވެހި ކުންފުނިތަކަށާއި އަމިއްލަ ފަރުދުންނަށް ވެސް މި މަޝްރޫއުގައި އިންވެސްޓް ކުރުމުގެ ފުރުސަތު އޮންނަންޖެހޭނެ ކަމަށް އޭނާ ވިދާޅުވިއެވެ. މި މަޝްރޫއުގެ މާސްޓަރ ޕްލޭން ފުރިހަމަކުރުމުގެ މަސައްކަތާއެކު އިތުރު ތަފްސީލުތައް އެކަށައެޅުމުގެ މަސައްކަތް މިހާރު އަންނަނީ ކުރެވެމުންނެވެ.