ވެލާނާ އިންޓަނޭޝަނަލް އެއަރޕޯޓް ގައި އަލަށް ތަރައްގީކުރަމުން އަންނަ ފަޔަރ ސްޓޭޝަން ރެސްކިއު ޖެޓީގެ މުހިންމު މަސައްކަތްތަކެއް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކުންފުނި (އެމްޓީސީސީ) އިން ނިންމާލައިފިއެވެ.
އެމްޓީސީސީން އާންމުކޮށްފައިވާ އެންމެ ފަހުގެ މަޝްރޫއުގެ މައުލޫމާތުތަކަށް ބަލާއިރު، ޖެޓީގެ ވިންޗް ފައުންޑޭޝަންގެ ކޮންކްރީޓް މަސައްކަތްތަކާއި، ރެސްކިއު ސަރވިސް ސަރަހައްދުގައި ގާ އެތުރުމުގެ މަސައްކަތުގެ އިތުރުން، ދަގަނޑު އެޅުމާއި ކޮންކްރީޓް ކުރުމުގެ މަސައްކަތްތައް މިހާރު ވަނީ ނިންމާލެވިފައެވެ. އަދި މިހާރު ހަލުވިކަމާއެކު ކުރިއަށްދަނީ ގްރޭޓްތައް ތައްޔާރުކުރުމުގެ މަސައްކަތެވެ.
މި މަޝްރޫއަކީ ވެލާނާ އިންޓަނޭޝަނަލް އެއަރޕޯޓް ގެ ކުއްލި ހާލަތްތަކާއި ކަނޑުމަތީގެ ސަލާމަތީ ކަންކަން ވަރުގަދަކުރުމަށްޓަކައި، އައު ފަޔަރ ސްޓޭޝަނަށް ހާއްސަކޮށްގެން ފަރުމާކޮށް ހަދަމުންދާ ރެސްކިއު ޖެޓީއެކެވެ. މީގެ ކުރިން މި މަޝްރޫއުގެ 90 އިންސައްތަ މަސައްކަތް ނިމިފައިވާ ކަމަށް އެމްޓީސީސީން ވަނީ ހާމަކޮށްފައެވެ.
Advertisement
މި ޖެޓީ ނިސްބަތްވަނީ 2024 ވަނަ އަހަރުގެ ޖޫން މަހު އާންމުކޮށް ހުޅުވާލެވުނު 2,230 އަކަފޫޓުގެ އައު ފަޔަރ ސްޓޭޝަނަށެވެ. މި ފަޔަރ ސްޓޭޝަނުގައި ދެ ކަނޑު އުޅަނދު ހިމެނޭހެން ޖުމްލަ ފަސް ފަޔަރ ވެހިކަލް ބޭއްވޭނެ ޖާގަ ހުރެއެވެ.
