ޕާކިސްތާނުގެ ރާވަލްޕިންޑީގައި އެ ގައުމުގެ ޗީފް އޮފް އާމީ ސްޓާފް އަދި ޗީފް އޮފް ޑިފެންސް ފޯސަސް ފީލްޑް މާޝަލް ސީދު އާސިމް މުނީރުއާ ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުﷲ ބައްދަލުކުރައްވައިފިއެވެ.

މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކުރެވުނީ ދެ ގައުމުގެ މަސްލަހަތު ހިމެނޭ މުހިންމު ކަންކަމުގެ މައްޗަށެވެ. އެގޮތުން ސަރަހައްދީ ސަލާމަތާއި ރައްކާތެރިކަން ކަށަވަރުކުރުމާ ގުޅޭގޮތުންނާއި، ދެ ގައުމުގެ ދެމެދުގައި އޮތް ޒަމާންވީ އެކުވެރި ގުޅުން އިތުރަށް ބަދަހިކުރެވިދާނެ ދާއިރާތަކާ ގުޅޭގޮތުން ފުޅާ ދާއިރާއެއްގައި ވަނީ މަޝްވަރާކޮށްފަ އެވެ.

މި ބައްދަލުކުރެއްވުމުގައި ދެއްކެވި ވާހަކަފުޅުގައި ފީލްޑް މާޝަލް ސީދު އާސިމް މުނީރު ވިދާޅުވީ، ޕާކިސްތާނުން ދިވެހިރާއްޖެއާއެކު އޮންނަ އަހްވަތްތެރި އަދި ގާތް ގުޅުމަށް އަބަދުވެސް ވަރަށް ބޮޑު އަހައްމިއްޔަތުކަމެއް ދޭ ކަމަށެވެ. އަދި ކުރިއަށް އޮތް ތަނުގައިވެސް ދެ ގައުމަށް ފައިދާހުރި ގޮތެއްގައި އެ ގުޅުން އިތުރަށް ހަރުދަނާކޮށް ކުރިއެރުވުމަށް މަސައްކަތްކުރައްވާނެ ކަމުގެ ފުރިހަމަ ޔަގީންކަން ދެއްވި އެވެ.

މަޖިލިސް ރައީސް އަބްދުއްރަހީމް ގެ ވާހަކަފުޅުގައި ވަނީ ސަރަހައްދީ ސުލްހަމަސަލަސްކަމާއި ހަމަޖެހުން ގާއިމުކުރުމަށްޓަކައި ޕާކިސްތާނުން އަދާކުރަމުންދާ އިސް އަދި މުހިންމު ދައުރު ފާހަގަކުރައްވައި، އެކަމަށް ތައުރީފު ކުރައްވާފައެވެ. މީގެއިތުރުން، ދިވެހިރާއްޖެއާއި ޕާކިސްތާނާ ދެމެދުގައި އޮތް ގުޅުން އިތުރަށް ފުންކޮށް، ދެ ފަރާތުގެ މަސްލަހަތު ހިމެނޭ އެކި ދާއިރާތަކުން ގުޅުން ބަދަހިކޮށް އެއްބާރުލުން ފުޅާކުރުމަށް ދިވެހިރާއްޖެއިން އެދޭކަން އެމަނިކުފާނު ހާމަކުރެއްވިއެވެ.