ދިވެހިރާއްޖެއާއި ސައުދީ އަރަބިއްޔާއާ ދެމެދު އޮތް ޒަމާންވީ ގާތް ގުޅުން އިތުރަށް ބަދަހިވެ، ދެ ގައުމުގެ މެދުގައި އިގްތިސާދީ ގުޅުމާއި އިންވެސްޓްމަންޓްތައް އަދި ތަރައްގީގެ ބައިވެރިވުން ފުޅާކުރުމަށް އުންމީދީ އައު ބާބެއް ފެށެމުންދާ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ސައުދީ އަރަބިއްޔާގެ 96 ވަނަ ގައުމީ ދުވަސް ފާހަގަކުރުމަށް ބޭއްވި ހާއްސަ ހަފްލާގައި ވާހަކަފުޅުދައްކަވަމުން އެމަނިކުފާނު ވަނީ ދެ ގައުމުގެ މެދުގައި އޮތް އިސްލާމީ ވަރުގަދަ އުހުއްވަތްތެރިކަމާއި، ރާއްޖޭގެ ތަރައްގީއަށް ސައުދީން ވެދެއްވަމުން ގެންދަވާ ދީލަތި އެހީތެރިކަން ފާހަގަކުރައްވައި ޝުކުރު އަދާކުރައްވާފައެވެ.
ފަތުރުވެރިކަމާއި، އުމްރާނީ ތަރައްގީއާއި، ބޯހިޔާވަހިކަމާއި، ސިއްހީ ދާއިރާގެ އިތުރުން އިއާދަކުރަނިވި ހަކަތައިގެ ދާއިރާއިން ސައުދީގެ އިންވެސްޓްމަންޓްތައް ރާއްޖޭގައި އިތުރަށް ފުޅާކުރުމަށް ފުރުސަތުތައް ފަހިވަމުންދާކަން ރައީސުލްޖުމްހޫރިއްޔާ ފާހަގަކުރެއްވިއެވެ. އަދި ރާއްޖޭގެ އިގްތިސާދަށް ގެންނަވާ ހެޔޮ ބަދަލުތަކުގައި ސައުދީގެ ވިޔަފާރިވެރިންނާއި އިންވެސްޓަރުންނަށް ފުޅާ ދާއިރާއެއްގައި ބައިވެރިވެވޭނެ މަގު ތަނަވަސްކޮށްދެއްވާނެ ކަމުގެ ޔަގީންކަން އެމަނިކުފާނު ދެއްވިއެވެ.
Advertisement
މީގެ އިތުރުން، 'ޗާޓަރ އޮފް ދަ މަލްޓިނޭޝަނަލް މެރިޓައިމް ޑިފެންސް' ގައި ސޮއިކުރުމާއި، އެކްސްޕޯ 2030 ރިޔާޟްގައި ރާއްޖެއިން ބައިވެރިވުމަކީ ދެ ގައުމުގެ ގުޅުން އިތުރަށް ބަދަހިކޮށްދޭނެ މުހިންމު ކަންކަން ކަމުގައި އެމަނިކުފާނު ވިދާޅުވިއެވެ.
އަދި ބައިނަލްއަގްވާމީ މައިދާނުގައިވެސް ސުލްހައާއި ހަމަޖެހުން ގާއިމުކުރުމަށް ސައުދީ އަރަބިއްޔާއާއެކު ގާތުން މަސައްކަތްކުރަމުން ގެންދާނެ ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.
