އދ. ފަދަ ބައިނަލްއަޤްވާމީ މައިގަނޑު މުއައްސަސާތަކުގައި ބޮޑެތި ނިންމުންތައް ނިންމުމުގައި، ދިވެހިރާއްޖެ ފަދަ ކުދި ޖަޒީރާ ޤައުމުތަކަށްވެސް ހަމަހަމަ ފުރުޞަތުތަކެއް ލިބެންޖެހޭނެ ކަމަށް ދިވެހިރާއްޖޭގެ ނައިބު ރައީސް އުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

އދ. ގެ 81 ވަނަ ޢާންމު މަޖިލީހުގެ ހަވާސާގައި ބޭއްވުނު މަތީ ފަންތީގެ ބައްދަލުވުންތަކުގައި ވާހަކަދައްކަވަމުން ނައިބު ރައީސް ވަނީ، 'ގްލޯބަލް ސައުތު' ނުވަތަ ތަރައްޤީވަމުންދާ ކުދި ޤައުމުތަކުގެ އަޑު ބައިނަލްއަޤްވާމީ މައިދާނުގައި މިއަށްވުރެ ގަދަވާންޖެހޭނެ ކަމަށް ވިދާޅުވެ، ކުދި ޤައުމުތަކުގެ ދިފާޢުގައި ވަގުތުން ފިޔަވަޅު އެޅުމަށް ގޮވާލައްވާފައެވެ.

ނައިބު ރައީސްގެ ވާހަކަފުޅުގައި އެންމެ ބޮޑަށް ބާރުއެޅުއްވީ، މޫސުމީ ބަދަލުތަކަކީ ދުރުގައި އޮތް ބިރުވެރިކަމެއް ނޫން ކަމަށާއި، އެއީ ރާއްޖެ ފަދަ ޖަޒީރާ ޤައުމުތަކުން ކޮންމެ ދުވަހަކު ތަޙައްމަލުކުރަންޖެހޭ ހިތްދަތި ޙަޤީޤަތެއް ކަމަށެވެ.

މި ބަދަލުތަކުގެ ސަބަބުން ޤައުމުގެ އިޤްތިޞާދަށާއި ތަރައްޤީއަށް ބޮޑެތި ހުރަސްތަކެއް އެޅެމުންދާކަން ފާހަގަކުރައްވައި، ކަނޑުގެ ލޮނުގަނޑު އުފުލުމާއި ރަށްގިރުމުގެ ނުރައްކަލުން ސަލާމަތްވުމަށްޓަކައި ބައިނަލްއަޤްވާމީ މާލީ އެހީތެރިކަން ލަސްނުކޮށް، އަދި ފަސޭހައިން ލިބޭނެ ނިޒާމެއްގެ ދަށުން ކުދި ޖަޒީރާ ޤައުމުތަކަށް ފޯރުކޮށްދިނުން އަވަސްކުރަންޖެހޭ ކަމަށް ވިދާޅުވިއެވެ.

^{ނައިބު ރައީސް އުސްތާޛު ޙުސައިން މުޙައްމަދު ލަޠީފް އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒްއާއި އެކު.}

މީގެ އިތުރުން، އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒްއާ އެކު ބޭއްވެވި ބައްދަލުވުމުގައި، ކުދި ޖަޒީރާ ޤައުމުތަކުގެ ޙައްޤުގައި އދ. އިން ކުރަމުންދާ ވަކާލާތަށް ނައިބު ރައީސް ޝުކުރު އަދާކުރެއްވިއެވެ.

އަދި މުއްސަނދި ޤައުމުތަކުން މޫސުމީ ބަދަލުތަކަށް އެހީވުމަށް ވެފައިވާ ވައުދުތައް ފުއްދުމުގައި އިޚްލާޞްތެރިވާންޖެހޭނެ ކަމަށް ވިދާޅުވިއެވެ.