ބޭރުފައިސާގެ ގާނޫނަށް ގެނެވުނު އިސްލާހުތަކާއެކު ތަފާތު ކެޓަގަރީތަކުގެ ވިޔަފާރިތަކުން ފައިސާ މާރުކުރަންޖެހޭ މިންވަރުތަކަށް ވަނީ ބަދަލުތަކެއް އައިސްފައެވެ. ނަމަވެސް، ގެސްޓްހައުސްތައް ނުވަތަ ބީ ކެޓަގަރީގެ ވިޔަފާރިތަކުން މާރުކުރަންޖެހޭ މިންވަރަކަށް އެއްވެސް ބަދަލެއްނާދެއެވެ. އެފަރާތްތަކުން އަދިވެސް މާރުކުރަންޖެހެނީ ފަތުރުވެރިއަކަށް 25 ޑޮލަރު ނުވަތަ ލިބޭ އާމްދަނީގެ 20 އިންސައްތައެވެ.

ފަތުރުވެރިކަން ނޫން ސިނާއަތްތަކުގައި ހަރަކާތްތެރިވާ ސީ ކެޓަގަރީގެ ވިޔަފާރިތަކުން އާމްދަނީގެ ގޮތުގައި 25 މިލިއަން ޑޮލަރު ލިބޭނަމަ 40 އިންސައްތަ މާރުކުރަންޖެހެއެވެ. ނަމަވެސް، އެއީ 100 އިންސައްތަ ދިވެހި ހިއްސާ އޮންނަ ވިޔަފާރިއެއްނަމަ މާރުކުރަންޖެހެނީ އެންމެ 7 އިންސައްތައެވެ. މިއީ ދިވެހި ވިޔަފާރިތަކަށް ދެވިފައިވާ ބޮޑު ލުޔެކެވެ.

މީގެ އިތުރުން، ބޭރު ފައިސާއިން އާމްދަނީ ލިބޭ ވިޔަފާރިއަކުން ގަންނަ މުދަލާއި ހޯދާ ހިދުމަތުގެ އަގު ބޭރު ފައިސާއިން އަދާކުރަން ބޭނުންވާނަމަ، އެމްއެމްއޭގެ ހުއްދައަށް އެދިގެން އެކަން ކުރުމުގެ ފުރުސަތުވެސް އޮންނާނެއެވެ. މިއީ ތަފާތު ކެޓަގަރީތަކުގެ ވިޔަފާރިތަކުގެ މާލީ އިލްތިޒާމްތަކަށް ރިއާޔަތްކޮށް ދެވިފައިވާ ފުރުސަތެކެވެ.

މިފަދަ ފިޔަވަޅުތަކެއް އަޅަންޖެހުނީ ރާއްޖެއަށް ދިމާވެފައިވާ ބޭރުފައިސާގެ ތާށިކަމާއި، ބޮޑެތި ދަރަނިތައް ދައްކަންޖެހުމާއި، ދުނިޔޭގެ މަޝްރަހުގައި ހިނގާ ހަނގުރާމަތަކުގެ ސަބަބުން މުދާ އުފުލުމުގެ އަގު ބޮޑުވުމާ ގުޅިގެންނެވެ. ރައްޔިތުންނަށް ބޭނުންވާ އަސާސީ މުދާ އެތެރެކުރެވެނީ ރަސްމީ ރިޒާވް ބޭނުންކޮށްގެން ކަމަށްވާތީ، މަރުކަޒީ ބޭންކުން ވަނީ އިގްތިސާދީ ގޮތުން ކޮންމެހެން ކުރަންޖެހިފައިވާ މި ނިޒާމީ ބަދަލުތައް ގެނެސްފައެވެ.