އދ.ގެ އާންމު މަޖިލީހުގެ 81 ވަނަ ޖަލްސާގެ ހަވާސާގެ ތެރެއިން، ދިވެހިރާއްޖޭގެ ނައިބު ރައީސް އަލްއުސްތާޛު ހުސައިން މުހައްމަދު ލަތީފު، ބަންގްލަދޭޝްގެ ބޮޑުވަޒީރު ޠާރިޤް ރަހްމާންއާ ބައްދަލުކުރައްވައިފިއެވެ.
ނިއުޔޯކުގައި ކުރިއަށްދިޔަ މި ބައްދަލުވުމުގައި ދެ ގައުމުގެ ދެމެދުގައި އޮތް ދޭދޭ ގުޅުން އިތުރަށް ބަދަހިކުރުމާ ގުޅޭގޮތުން ފުޅާދާއިރާއެއްގައި މަޝްވަރާކުރައްވާފައިވެއެވެ.
މި ބައްދަލުވުމުގައި ނައިބު ރައީސް ވަނީ އދ. ގެ އާންމު މަޖިލީހުގެ 81 ވަނަ ސެޝަންގެ ރައީސްކަމާ ބަންގްލަދޭޝްގެ ފޮރިން މިނިސްޓަރު ޑރ. ޚަލީލުއްރަހްމާން ހަވާލުވެވަޑައިގަތުމާ ގުޅިގެން މަރުހަބާ ދަންނަވާފައެވެ. އަދި ދިވެހި ސަރުކާރާއި ރައްޔިތުންގެ ނަމުގައި ބަންގްލަދޭޝްގެ ސަރުކާރަށާއި ރައްޔިތުންނަށް ހެޔޮއެދުންތަކާއި ސަލާމް ރައްދުކުރައްވާފައެވެ.
Advertisement
ދިވެހިރާއްޖެއާއި ބަންގްލަދޭޝާ ދެމެދު އޮތް ޒަމާންވީ ޚާރިޖީ ގުޅުމުގެ މައްޗަށް އަލިއަޅުއްވާލައްވަމުން، ދެ ގައުމަށް ވެސް މުހިންމުވާ ދާއިރާތަކުން އިތުރަށް އެއްބާރުލުން ދިނުމާއި، ދެ ގައުމުގެ ރައްޔިތުންގެ މެދުގައި އޮތް ގުޅުން ވަރުގަދަކުރުމުގެ މުހިންމުކަން ނައިބު ރައީސް ފާހަގަކުރެއްވިއެވެ.
ބަންގްލަދޭޝްގެ ބޮޑުވަޒީރު ޠާރިޤް ރަޙްމާން ދެއްކެވި ވާހަކަފުޅުގައި، ނައިބު ރައީސް ފޮނުއްވި މަރުހަބާއަށާއި ހެޔޮއެދުންތަކަށް ޝުކުރުއަދާކުރެއްވިއެވެ. އަދި އދ. އާއި އެހެނިހެން ބައިނަލްއަގްވާމީ މައިދާންތަކުގައި ދެ ގައުމު ގުޅިގެން ކުރަމުންދާ މަސައްކަތްތައް ކުރިއަށް އޮތް ތަނުގައިވެސް ދަމަހައްޓައި، އެއްބާރުލުން ދިނުމުގެ މުހިންމުކަން ބޮޑުވަޒީރު ފާހަގަކުރެއްވިއެވެ.
މީގެއިތުރުން، ދެ ގައުމުގެ މެދުގައި ހިއްސާކުރާ މަސްލަހަތުތައް ކުރިއެރުވުމަށާއި ދެ ގައުމުގެ ގުޅުން އިތުރަށް ވަރުގަދަކުރުމަށް ރާއްޖެއާއެކު ގާތުން މަސައްކަތްކުރުމަށް ބަންގްލަދޭޝް ތައްޔާރަށް އޮތްކަމުގެ ޔަގީންކަން އެ މަނިކުފާނު ދެއްވިއެވެ.
