ސީރިއާ އާއި އިޒުރޭލާ ދެމެދު ދާއިމީ ޞުލްޙައެއް ޤާއިމުކުރެވޭނީ އިޒުރޭލުން ބައެއް މުހިންމު ޝަރުޠުތަކަކަށް އެއްބަސްވެގެން ކަމަށް ސީރިއާގެ ރައީސް އަޙްމަދު އައްޝަރަޢު ވިދާޅުވެއްޖެއެވެ. އެމެރިކާގެ ނިއުޔޯކްގައި ކުރިޔަށްދާ އދ. ގެ ޢާންމު މަޖިލީހުގެ ހަވާސާގައި، އެޓްލާންޓިކް ކައުންސިލްގެ ޕެނަލްއެއްގައި ވާހަކަދައްކަވަމުން ރައީސް ޝަރަޢު ވަނީ ދެ ޤައުމުގެ ދެމެދުގައި އޮތް ގުޅުންތަކާ ބެހޭގޮތުން ފުރަތަމަ ފަހަރަށް ފާޅުގައި ވާހަކަދައްކަވާފައެވެ.

ރައީސް ޝަރަޢު ހާމަކުރެއްވި ގޮތުގައި، ސީރިއާ އާއި އިޒުރޭލާ ދެމެދު ސަލާމަތީ ކަންކަމާ ގުޅޭގޮތުން ސިއްރު ސީދާ މަޝްވަރާތަކެއް ކުރިއަށްދާތާ އަހަރެއްހާ ދުވަސް ވެއްޖެއެވެ.

އަދި ދެ ޤައުމުގެ ދެމެދުގައި އެއްބަސްވުންތަކުގެ 90 އިންސައްތައާ ހަމައަށް ވާސިލްވެފައި ވަނިކޮށް، އިޒުރޭލުން އިތުރު ޝަރުޠުތައް ކުރިމަތިކޮށް ފަހަތަށް ޖެހިފައިވާ ކަމަށް އޭނާ ތުހުމަތު ކުރެއްވިއެވެ.

1. އިޒުރޭލާއެކު ގުޅުން ބަދަހިކުރުމަށާއި ދާއިމީ ޞުލްޙައަކަށް ވާސިލްވުމަށް ސީރިއާ އިން ހުށަހަޅާ މައިގަނޑު ތިން ޝަރުޠު:

1. ސީރިއާގެ ބިންތަކުން ފޭބުން: ބައްޝާރުލް އަސަދުގެ ވެރިކަން ވެއްޓުމަށްފަހު، ސީރިއާގެ ދެކުނުގެ ބޯޑަރު ސަރަޙައްދުތަކުން ހިފާފައިވާ ސީރިއާގެ ބިންތަކުން އިޒުރޭލު ސިފައިން ފުރަތަމަ ފައިބަންޖެހޭނެއެވެ.
2. ގޯލާން އުސްމިންތައް އަނބުރާ ދިނުން: ގޯލާން އުސްމިންތަކަކީ ސީރިއާގެ އަމިއްލަ ބިމެއް ކަމަށާއި، އެ ބިމުގެ މިލްކުވެރިކަމާ މެދު އިތުރު ބަހުސެއް ނުވަތަ ދޫދިނުމެއް ސީރިއާ އިން ނުކުރާނެއެވެ.
3. އުދުވާންތައް ހުއްޓާލުން: އޮކްޓޯބަރު 7 ގެ ޙާދިސާއަށް ބަހަނާ ދައްކައިގެން ސީރިއާގެ ސަރަޙައްދުތަކަށް ބޮންއެޅުމާއި، ބޯޑަރު ހުރަސްކޮށް ހިންގާ ޢަސްކަރީ އުދުވާންތައް އިޒުރޭލުން މުޅިން ހުއްޓާލަންޖެހޭނެއެވެ.

ރައީސް ޝަރަޢު އިތުރަށް ވިދާޅުވީ، ސީރިއާ އޮތީ ސިޔާސީ އަދި ޑިޕްލޮމެޓިކް މަގުން މައްސަލަތައް ޙައްލުކުރަން ތައްޔާރަށެވެ. ނަމަވެސް އިޒުރޭލަށް ސަލާމަތްތެރިކަން ބޭނުންވާނަމަ، އަވަށްޓެރި ޤައުމުތަކުގެ މިނިވަންކަމާއި ސަލާމަތަށްވެސް އިޒުރޭލުން އިޙްތިރާމްކުރަންޖެހޭނެ ކަމަށް އޭނާ ވިދާޅުވިއެވެ.