އދ. ގެ އާންމު މަޖިލީހުގައި ސެކްރެޓަރީ ޖެނެރަލް އެންޓޯނިއޯ ގުޓެރޭޒް އޭނާގެ ވަދާޢީ ޚިޠާބު ދެއްވަނީ: ދެވަނަ ބޮޑުހަނގުރާމައިގެ ޒަމާންވީ މާލީ ނިޒާމު އިޞްލާޙުކުރަން ޖެހޭ ކަމަށް ވިދާޅުވި.
ބައިނަލްއަޤްވާމީ މާލީ އޮނިގަނޑު މުޅިން އިޞްލާޙުކޮށް ބަދަލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީގެކުރިން ދެއްކެވި ވާހަކަފުޅުތަކަށް، އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒްގެ ވަދާޢީ ޚިޠާބުން ވަނީ ސީދާ ބާރު ލިބި، ދެ ބޭފުޅުން އެއްގަލަކަށް އަރާފައެވެ. ގުޓެރޭޒް އދ. ގެ އާންމު މަޖިލީހުގައި ވިދާޅުވީ، ދެވަނަ ބޮޑުހަނގުރާމައަށްފަހު (1945 ގައި) އުފެއްދި މާލީ އިދާރާތައް ހިންގަނީ މާޒީވެގޮސްފައިވާ ބާރުގެ އޮނިގަނޑެއްގެ މަތިން ކަމަށާއި، އޭގެ ސަބަބުން ތަރައްޤީވަމުންދާ ޤައުމުތަކަށް އިންތިހާއަށް ބޭއިންސާފުވަމުންދާ ކަމަށެވެ. މިއީ މިއަދުގެ ދުނިޔޭގެ އިޤްތިޞާދީ ޙަޤީޤަތްތަކާ އެއްވެސް ވަރަކަށް ނުގުޅޭ ނިޒާމެއްގެ ގޮތުގައި ގުޓެރޭޒް ސިފަކުރެއްވިއެވެ.
މި ވާހަކަފުޅަކީ ރައީސް ޑރ. މުޙައްމަދު މުޢިއްޒު 2024 މޭ 28 ގައި އެންޓިގުއާ އެންޑް ބާމިއުޑާގައި ބޭއްވި 4 ވަނަ ބައިނަލްއަޤްވާމީ ސިޑްސް ކޮންފަރެންސްގެ ރަސްމީ ޖަލްސާގައި ދެއްކެވި ވާހަކަފުޅެވެ.
Advertisement
ބައިނަލްއަޤްވާމީ މާލީ އިދާރާތައް ފެއިލްވެފައިވާ ކަމަށާއި މާލީ އޮނިގަނޑު އިޞްލާޙުކުރަން ޖެހޭ ކަމަށް ރައީސް ޑރ. މުޢިއްޒު ވަނީ ރައީސް ޑރ. މުޙައްމަދު މުޢިއްޒު ގޮވާލެއްވި (2024 މޭ 28 ގައި އެންޓިގުއާ އެންޑް ބާމިއުޑާގައި ބޭއްވި 4 ވަނަ ބައިނަލްއަޤްވާމީ ސިޑްސް ކޮންފަރެންސް)
އެ ދުވަހު ރައީސް ޑރ. މުޢިއްޒު ވިދާޅުވީ، ބައިނަލްއަޤްވާމީ މާލީ ނިޒާމު އޮތީ ސިޑްސްގެ ކުދި ޖަޒީރާ ޤައުމުތަކުގެ ބޭނުންތައް ފުއްދައިދިނުމުގައި މުޅިން "ފެއިލްވެފައި" ކަމަށެވެ. އަދި ވޯލްޑް ބޭންކް ފަދަ މުއައްސަސާތަކުން ޤައުމުތަކުގެ ތަނަވަސްކަން މިނެކިރުމަށް ގެންގުޅޭ މާޒީގެ ބޭއިންސާފު އުޞޫލުތަކުގެ ސަބަބުން، ރާއްޖެ ފަދަ ޤައުމުތަކަށް ލިބެންޖެހޭ ލުއި ލޯނުތައް ބަންދުވެ، ބޭރުގެ ބޭންކުތަކުން އިންތިހާއަށް ބޮޑު އިންޓްރެސްޓް ރޭޓެއްގައި ލޯނު ނަގަން މަޖުބޫރުވާ ކަމަށް ރައީސް މުޢިއްޒު ވަނީ ބަޔާންކުރައްވާފައެވެ.
ވޯލްޑް ބޭންކާއި އައި.އެމް.އެފް ގެ ބޭއިންސާފު އުޞޫލުތަކާއި ދެކޮޅަށް އަދި ފަޤީރު ޤައުމުތަކުގެ ދަރަނިތައް މާފުކުރުމަށް ގޮވާލައި އެކްޓިވިސްޓުން ކުރާ މުޒާހަރާއެއް. (ފައިލް ފޮޓޯ)
ދުނިޔޭގެ ސުލްޙައާއި ދެމެހެއްޓެނިވި ތަރައްޤީ ކަށަވަރުކުރެވޭނީ މިހާރު މިއޮތް ބޭއިންސާފު މާލީ އޮނިގަނޑު މުގުރާލައި، ފަޤީރު އަދި ނާޒުކު ޤައުމުތަކަށް ހަމަހަމަ ފުރުޞަތުތަކެއް ލިބޭނެ ގޮތަށް ނިޒާމު ބަދަލުކޮށްގެން ކަމަށް މި ދެ ބޭފުޅުންވެސް ވަނީ ހަރުކަށި ޢިބާރާތުން ގޮވާލައްވާފައެވެ.
ރައީސް މުޢިއްޒު ވަކާލާތު ކުރެއްވި ފަދައިން، މަލްޓިލޭޓަރަލް ޑިވެލޮޕްމަންޓް ބޭންކުތަކުގެ ބާރު ފުޅާކޮށް، ދަރަނީގެ ދަންތުރައިން ކުދި ޤައުމުތައް ސަލާމަތްކުރުމަކީ މިއަދު ދުނިޔެއަށް މަޖުބޫރުވެފައިވާ ކަމެއްގެ ގޮތުގައި ގުޓެރޭޒްގެ ވަދާޢީ ބަޔާނުގައިވެސް ވަނީ ބާރުއަޅުއްވާފައެވެ.
