އދ. ގެ އާންމު މަޖިލީހުގެ 81 ވަނަ ސެޝަންގެ މަތީ ފަންތީގެ ބަހުސްތަކުގައި ބައިވެރިވުމަށް އެމެރިކާގެ ނިއުޔޯކަށް ދިއުމަށް ހުށަހެޅި ފަލަސްތީނުގެ ރަސްމީ ޑެލިގޭޝަންގެ އެއްވެސް ބޭފުޅަކަށް އެމެރިކާ ސަރުކާރުން ވިސާ ނުދޭން ނިންމައިފިއެވެ. މިއީ ޖެހިޖެހިގެން ދެވަނަ އަހަރަށް ފަލަސްތީނުގެ ރައީސް މަހްމޫދު އައްބާސް އާއި އެ ގައުމުގެ އިސްވެރިންނަށް އެމެރިކާއަށް އެތެރެވުން މަނާކުރި ފަހަރެވެ.

އެމެރިކާގެ ސްޓޭޓް ޑިޕާޓްމަންޓުން މި ފިޔަވަޅު އަޅާފައިވަނީ ފަލަސްތީނުގެ ސިޔާސީ ވެރިންނަށް އަމާޒުކޮށް ހިންގާ ދަތުރުފަތުރުގެ ދަތިކުރުމުގެ ފިޔަވަޅުތަކުގެ ދަށުންނެވެ. މި ނިންމުމާ ގުޅިގެން ފަލަސްތީނުގެ ރަސްމީ ވަފުދަށް ނިއުޔޯކަށް ދެވޭގޮތް ނުވުމުން، އދ. ގެ އާންމު މަޖިލީހުން ވަނީ ޚާއްސަ އިންތިޒާމެއް ހަމަޖައްސާފައެވެ. އެގޮތުން، ރައީސް މަހްމޫދު އައްބާސްއަށް މި ފަހަރުގެ ޖެނެރަލް ޑިބޭޓްގައި ބައިވެރިވެވަޑައިގެން ތަގުރީރު ކުރެއްވުމުގެ ފުރުސަތު ދީފައިވަނީ ވީޑިއޯ މެދުވެރިކޮށް ރެކޯޑުކޮށްފައިވާ ބަޔާނެއްގެ ޒަރީއާއިންނެވެ.

ބައިނަލްއަގުވާމީ މީޑިއާތަކުން ރިޕޯޓުކުރާ ގޮތުގައި، ނިއުޔޯކުގައި ހުންނަ އދ. ގެ މައި މަރުކަޒުގެ ތަޅުމުގައި ފަލަސްތީނުގެ ފަރާތުން މިހާރު ހާޒިރުވެ ތިއްބަވާނީ މިހާރުވެސް އެތަނުގައި ތިއްބަވާ އދ. އަށް ފަލަސްތީނުން ކަނޑައަޅާފައި ހުންނަވާ ދާއިމީ މަންދޫބު ރިޔާޒް މަންސޫރު އަދި އެ ގައުމުގެ މިޝަންގެ ޑިޕްލޮމޭޓުން އެކަންޏެވެ.

އެމެރިކާގެ މި ނިންމުމާއި ގުޅިގެން ބައިނަލްއަގުވާމީ އިންސާނީ ހައްގުތަކަށް މަސައްކަތްކުރާ ޖަމްއިއްޔާތަކުންނާއި ފަލަސްތީނަށް ތާއީދުކުރާ ފަރާތްތަކުން ދަނީ ވަރަށް ބޮޑަށް ފާޑުކިޔަމުންނެވެ.

އެމެރިކާއަކީ އދ. ގެ މައި މަރުކަޒު ހުންނަ ގައުމަށް ވީހިނދު، ވަކި ގައުމެއްގެ ވެރިންނަށް ހުރަސްއެޅުމަކީ އދ. ގެ ހޯސްޓް ކަންޓްރީ އެގްރީމަންޓާ ޚިލާފު ކަމެއްގެ ގޮތުގައި ދަނީ ސިފަކުރަމުންނެވެ.