ނިމުނު ހަފްތާގެ ތެރޭގައި ސްކޭމްގެ 38 މައްސަލައެއް ރިޕޯޓްކޮށްފައިވާ ކަމަށާއި، މި މައްސަލަތަކުގައި 358,231.71 (ތިން ލައްކަ ފަންސާސް އަށްހާސް ދުއިސައްތަ ތިރީސް އެކެއް) ރުފިޔާ ގެއްލިފައިވާ ކަމަށް އެންޓި-ސްކޭމް ސެންޓަރުން އާންމުކުރި ތަފާސްހިސާބުތަކުން ދައްކައިފިއެވެ. ކަމާގުޅޭ މުއައްސަސާތަކާއި ބޭންކުތަކުގެ އެއްބާރުލުމާއެކު އޭގެ ތެރެއިން 151,263.63 (އެއްލައްކަ ފަންސާސް އެއްހާސް ދުއިސައްތަ ފަސްދޮޅަސް ތިން) ރުފިޔާ އަނބުރާ ހޯދިފައިވާކަމަށް އެ ސެންޓަރުން މައުލޫމާތުދެއެވެ.

އާންމުކުރި ތަފާސްހިސާބުތަކަށް ބަލާއިރު، އެންމެ ގިނައިން ރިޕޯޓްކޮށްފައިވަނީ އީ-ކޮމާސް ނުވަތަ އޮންލައިން ވިޔަފާރިތަކާ ގުޅޭ 15 މައްސަލަތަކެވެ. މީގެއިތުރުން ބޭރު ފައިސާ މާރުކުރުމުގެ 10 މައްސަލައަކާއި، އެހެނިހެން ސްކޭމްގެ 6 މައްސަލައެއްގެ އިތުރުން ބުކިންގ ކެންސަލްކޮށް ރިފަންޑް ހޯދުމުގެ 4 މައްސަލައާއި އިންވެސްޓްމަންޓް ސްކޭމްގެ 1 މައްސަލަ ހިމެނެއެވެ. މިފަދަ އޮޅުވާލުންތައް މައިގަނޑުކޮށް ހިންގާފައިވަނީ ފޭސްބުކް މާކެޓްޕްލޭސް، ވައިބާ، ޓެލެގްރާމް، ވަޓްސްއެޕް، އިންސްޓަގްރާމް، ޓިކްޓޮކް، އައިބޭ، ފޯނު ކޯލްތައް އަދި ފިޝިންގ ލިންކުތައް މެދުވެރިކޮށް ކަމަށް ފުލުހުން ފާހަގަކުރެއެވެ.

މިފަދަ ސްކޭމްތަކުން ރައްކާތެރިވުމަށްޓަކައި އޮންލައިންކޮށް ފެންނަ އިޝްތިހާރުތަކާއި ލިބޭ މެސެޖުތަކާއި ކޯލްތަކުގެ ސައްހަކަން ކަށަވަރުކުރުމަށް ފުލުހުން ވަނީ އިލްތިމާސްކުރައްވާފައެވެ. އަދި އަވަސްއަރުވާލައިގެން ފައިސާ ފޮނުވަން އެދޭ ހާލަތްތަކުގައި އޯޓީޕީ، ޕާސްވޯޑް ނުވަތަ ބޭންކިންގ މައުލޫމާތު އެއްވެސް މީހަކަށް ހިއްސާނުކުރުމަށާއި، ޝައްކުކުރެވޭ ކަމެއް ކުރިމަތިވެއްޖެނަމަ ލަސްނުކޮށް ކަމާބެހޭ އިދާރާއަކަށް ރިޕޯޓްކުރުމަށް ފުލުހުން އެދިވަޑައިގަންނަވައެވެ.

ފުލުހުން އިތުރަށް ވިދާޅުވި ގޮތުގައި ފައިސާ ގެއްލުމަށްފަހު އެ ފައިސާ އަނބުރާ ހޯދުމަކީ ނުހަނު ބުރަ މަސައްކަތެކެވެ. އަދި ބައެއް ހާލަތްތަކުގައި ގެއްލޭ ފައިސާ އެއްކޮށް ނުލިބި ދިއުމުގެ ފުރުސަތު ބޮޑުކަންވެސް ތަފާސްހިސާބުތަކުން ހާމަވާކަމަށް ފުލުހުން ވަނީ ފާހަގަކުރައްވާފައެވެ.