މޫސުމީ ބަދަލުތަކުން ކުރިމަތިވާ ގޮންޖެހުންތަކާ ދެކޮޅަށް ގުޅިގެން މަސައްކަތްކުރުމާ ގުޅޭގޮތުން އެކުވެރި ދައުލަތްތަކުގެ ޖަމިއްޔާ (އދ.) އާއި ދިވެހިރާއްޖެއާ ދެމެދު މުހިންމު މަޝްވަރާތަކެއް ބާއްވައިފިއެވެ. މި މަޝްވަރާތައް ކުރިއަށްގޮސްފައިވަނީ އެމެރިކާގެ ނިއުޔޯކުގައި މިހާރު ކުރިއަށްދާ އދ. ގެ އާންމު މަޖިލީހުގެ 81 ވަނަ ބައްދަލުވުމުގެ ހަވާސާގެ ތެރެއިން، އދ. ގެ ސެކްރެޓަރީ ޖެނެރަލް އެންޓޯނިއޯ ގުތަރޭޝްއާއި ރައީސުލްޖުމްހޫރިއްޔާގެ ނައިބު އަލްއުސްތާޒް ހުސައިން މުހައްމަދު ބޭއްވެވި ބައްދަލުވުމުގެ ތެރެއިންނެވެ.
މި ބައްދަލުވުމުގައި ދެ ބޭފުޅުންގެ މަޝްވަރާ މައިގަނޑު ގޮތެއްގައި އަމާޒުކުރެއްވީ މޫސުމީ ބަދަލުތަކުގެ ސަބަބުން ތަރައްޤީވަމުން އަންނަ ކުދި ޖަޒީރާ ގައުމުތަކަށް ލިބެމުންދާ ގެއްލުންތަކާއި، އެކަންކަމުން އަރައިގަތުމަށް ބައިނަލްއަގްވާމީ ފެންވަރުގައި އަޅަންޖެހޭ ފިޔަވަޅުތަކުގެ މައްޗަށެވެ. އެގޮތުން، މޫސުމީ ގޮންޖެހުންތަކާ ކުރިމަތިލުމުގައި ބައިނަލްއަގްވާމީ ގޮތުން އަޅާ ފިޔަވަޅުތައް އިތުރަށް ހަރުދަނާކުރުމަށް ރާއްޖެއާއެކު ގާތުން މަސައްކަތް ކުރައްވާނެކަމުގެ ފުރިހަމަ ޔަގީންކަން އދ. ގެ ސެކްރެޓަރީ ޖެނެރަލް ވަނީ ދެއްވާފައެވެ.
މީގެއިތުރުން، މޫސުމީ ބަދަލުތަކަށް ހައްލު ހޯދުމަށްޓަކައި ބައިނަލްއަގްވާމީ މާލީ އިދާރާތަކުގެ އެހީތެރިކަން ހޯދުމާ ގުޅޭގޮތުން މީގެ ކުރިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި އދ. ގެ ސެކްރެޓަރީ ޖެނެރަލް ކުރައްވާފައިވާ މަޝްވަރާތަކަށްވެސް މި ބައްދަލުވުމުގައި އަލިއަޅުއްވާލެއްވިއެވެ. ރައީސް މުޢިއްޒު ވަނީ ތަރައްގީވަމުން އަންނަ ކުދި ޖަޒީރާ (ސިޑްސް) ގައުމުތަކަށް ކުރިމަތިވާ މާލީ އަދި ތިމާވެށީގެ ގޮންޖެހުންތަކަށް ވަކާލާތުކުރުމުގައި އދ. އިން އަދާކުރާ މުހިންމު ދައުރަށް މީގެ ކުރިން ޝުކުރު އަދާކުރައްވާފައެވެ.
Advertisement
މޫސުމީ މައްސަލަތަކުގެ އިތުރުން، ބައިނަލްއަގްވާމީ މަޝްރަހުގައި މިހާރު ހިނގަމުންދާ އެހެނިހެން މުހިންމު ކަންކަމާމެދުވެސް ނައިބު ރައީސާއި އދ. ގެ ސެކްރެޓަރީ ޖެނެރަލް ވަނީ ހިޔާލު ބަދަލުކުރައްވާފައެވެ. އެގޮތުން، ފަލަސްތީނުގެ ބިންތަކުގައި އިސްރާއީލުން ހިންގަމުންދާ ލާއިންސާނީ އަމަލުތަކާ ގުޅޭގޮތުން ދެ ބޭފުޅުން ވަރަށް ފުޅާދާއިރާއެއްގައި މަޝްވަރާކުރެއްވިއެވެ.
