ފަލަސްޠީނުގެ ބަރަކާތްތެރި މަސްޖިދުލް އަޤްޞާއަށް ޒަޔަނިސްޓު މިނިސްޓަރުންނާއި އެމީހުންގެ ހަރުކަށި ވަޒަންވެރިން ވަދެގަނެ، އެ މުޤައްދަސް ބިމުގެ ޙުރުމަތް ކަނޑަމުންދާ ދިއުމަށް ރައްދުދީ، ފަލަސްޠީނުގެ ރެސިސްޓެންސް ބަތަލުން އިސްރާއީލަށް ވަރުގަދަ އިންޒާރެއް ދީފިއެވެ. ރާމަﷲ ގެ ހުޅަނގުންވާ 'ޙަލްމީޝް' އިސްތިޢުމާރީ ރަށާއި ކައިރީގައި މިއަދު ދިން ބަޑީގެ ޙަމަލާއެއްގައި އިސްރާއީލްގެ ވަޒަންވެރިއަކު މަރުވެ، ބައެއް މީހުން ޒަޚަމްވެފައިވާއިރު، މިއީ ފަލަސްޠީނުގެ ރައްޔިތުންނާއި ދެކޮޅަށް ހިންގާ ޖަރީމާތަކަށް ދިން ރައްދެކެވެ. މުޅި ފަލަސްޠީނުގެ މުޖާހިދުން މިހާރު ތިބީ "ލޭގެ ބަދަލު ލެއިން" ހިފުމުގެ އަޒުމުގައެވެ.

މިއަދު ހުޅަނގުއައްސޭރީގައި ޔަހޫދީއެއްގެ ގަޔަށް ބަޑިޖަހައި މަރާލައި އިތުރު ޔަހޫދީންތަކަކަށް ވަނީ އަނިޔާ ދީފައެވެ.

މި ޙަމަލާއާއި ގުޅިގެން ސަރާޔާ އަލް-ޤުދުސް (ޤުދުސް ބްރިގޭޑްސް) އިން ވަނީ ނޫސްބަޔާނެއް ނެރެ، މި އޮޕަރޭޝަނަށް މަރުޙަބާ ކިޔާފައެވެ. އަދި އަޅުވެތިކޮށްފައިވާ ހުޅަނގު އައްސޭރިއާއި ޤުދުސްގެ ހުރިހާ ސިޓީތަކާއި، ރެފިއުޖީ ކޭމްޕްތަކާއި އަވަށްތަކުގައި ތިބި އިންޤިލާބީ ޒުވާނުންނަށް، ލިބެންހުރި ހުރިހާ ވަސީލަތްތަކެއް ބޭނުންކޮށްގެން ދުޝްމަނާ ދެކޮޅަށް ކުރިމަތިލުންތައް އިތުރަށް ވަރުގަދަކުރުމަށް ވަނީ ގޮވާލާފައެވެ. ޖަމާޢަތްތަކުން ހާމަކުރި ގޮތުގައި، ޔަހޫދީން މަސްޖިދުލް އަޤްޞާ އަށް ވަނުން ހުއްޓުވުމަކީ ފަލަސްޠީނުގެ ކޮންމެ އަހުލުވެރިއެއްގެ ޤައުމީ އަދި ދީނީ ވާޖިބެކެވެ.

^{އިޒުރޭލު ސިފައިން ފަލަސްތީނުގެ މަގުތައް ބަންދުކޮށްލައިގެން.}

ޙަމަލާއާ ގުޅިގެން އިސްރާއީލް ސިފައިން ވަނީ ރާމަﷲ އާއި އެސަރަޙައްދުގެ އަވަށްތައް ބަންދުކޮށް، ހޮސްޕިޓަލެއް ރޭޑްކޮށް ޒަޚަމްވެފައިވާ ފަލަސްޠީނު ޒުވާނަކު ހައްޔަރުކޮށްފައެވެ. އިސްރާއީލްގެ ހަރުކަށި މިނިސްޓަރުން އޭނާ ދަންޖައްސައި މަރަން ގޮވާލަމުންދާއިރު، ބޮޑުވަޒީރު ނަތަންޔާހޫ ވަނީ ހުޅަނގު އައްސޭރީގައި އަސްކަރީ ޙަރަކާތްތައް ވަރުގަދަކުރަން އަމުރުކޮށްފައެވެ. ނަމަވެސް، ފަލަސްޠީނަށް ތާއީދުކުރާ ފަރާތްތަކުން ބުނަމުންދަނީ އިސްރާއީލުގެ ބިރުދެއްކުންތަކުން ރެސިސްޓެންސްގެ ރޫޙު ނައްތާނުލެވޭނެ ކަމަށާއި، އަޤްޞާގެ ދިފާޢުގައި ކުރާ ޖިހާދު އިތުރަށް ވަރުގަދަވާނެ ކަމަށެވެ.