ދައުލަތަށް 25 އަހަރަށް ވުރެ ދިގު މުއްދަތަކު ބޮޑެތި ޚިދުމަތްތަކެއް ކޮށްދެއްވި، ރައީސުލްޖުމްހޫރިއްޔާގެ އޮފީހުގެ ކުރީގެ ޗީފް އޮފް ސްޓާފް އަދި ކުރީގެ ކޮންޓްރޯލަރ އޮފް އިމިގްރޭޝަން އެންޑް އެމިގްރޭޝަން ޑރ. މުހައްމަދު އަލީ އަވަހާރަވި ޚަބަރު އަޑުއެއްސެވީ ފުން ހިތާމައަކާއެކު ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ މަރުހޫމްގެ ވަކިވެދިއުމާ ގުޅިގެން މިއަދު ފޮނުއްވި ރަސްމީ ތައުޒިޔާގެ މެސެޖެއްގައެވެ.

ރައީސްގެ މެސެޖުގައި ޑރ. މުހައްމަދު އަލީ އަކީ އިޖްތިމާޢީ އެކި ކަންކަމުގައި، ވަކިން ޚާއްޞަކޮށް އިސްލާމީ ހޭލުންތެރިކަމާއި ތިމާވެށީގެ އެކި ދާއިރާތަކުން މުޖްތަމަޢަށް ގިނަގުނަ މަޢުލޫމާތުތަކެއް ފޯރުކޮށްދެއްވި ބޭފުޅެއްގެ ގޮތުގައި ސިފަކުރެއްވިއެވެ. އަދި އޭނާއަކީ ޢިލްމީ ދިރާސާތައް ކުރެއްވި، ޚުލްޤު ހެޔޮ، ދީންވެރި ނަމޫނާ ޝަޚްޞިއްޔަތެއްގެ އިތުރުން އެންމެންގެ ލޯތްބާއި އިޙްތިރާމް ހޯއްދެވި ޤަދަރުވެރި ބޭފުޅެއް ކަމަށްވެސް ރައީސް ވިދާޅުވިއެވެ.

ޑރ. މުހައްމަދު އަލީ އަވަހާރަވުމުގެ ހިތާމައިގައި ބައިވެރިވެ، ރައީސް މުއިއްޒު ވަނީ މަރުހޫމްގެ ޢާއިލާއަށާއި އެކުގައި މަސައްކަތްކުރެއްވި ހުރިހާ ބޭފުޅުންނަށް ނުހަނު އިޚުލާޞްތެރިކަމާއެކު ތަޢުޒިޔާ ދަންނަވާފައެވެ. އަދި މާތްﷲގެ ރުއްސެވުމާއި ފުއްސެވުމުގައި، ސުވަރުގޭގެ ދާއިމީ ނިޢުމަތުގައި މަރުހޫމް ލެހެއްޓެވުން އެދި ރައީސް ވަނީ ދުޢާކުރައްވާފައެވެ.