މަސްތުވާތަކެތީގެ ވިޔަފާރިކޮށްގެން ހޯދާ އަދި އެކަމާ ގުޅުންހުރި އެންމެހައި ފައިސާއާއި، އެފަދަ މީހުންގެ އަމިއްލަ ނަމުގައި ހުރި މުދާތައް ދައުލަތަށް ނަގާނެ ކަމަށާއި، މި ސަރުކާރުން ގާނޫނު ހިންގައި، ޖިނާޢީ ކުށްތައް ހިންގާ ފަރާތްތަކަށް ދުލެއް ނުދޭނެ ކަމަށް، ޕީއެންސީ ކޮންގްރެސްގައި ވާހަކަފުޅު ދައްކަވަމުން ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިޙްސާން ވިދާޅުވެއްޖެއެވެ.

މިނިސްޓަރު އިހްސާން ވިދާޅުވީ، މަސްތުވާތަކެތީގެ ނެޓްވޯކްތައް ހިންގާ މީހުން އެކަން ކުރަނީ ބޮޑެތި މާލީ މަންފާތަކެއް ހޯދުމުގެ ބޭނުމުގައި ކަމަށެވެ. އެހެންކަމުން، އެފަދަ މީހުންގެ މާލީ ބާރުވެރިކަން ކަނޑުވާލުމަކީ މަސްތުވާތަކެތީގެ ވިޔަފާރި ރޫޅާލުމަށް އޮތް އެންމެ އަސާސީ އެއް ފިޔަވަޅު ކަމުގައި ސަރުކާރުން ދެކޭ ކަމަށް އިހްސާން ވިދާޅުވިއެވެ.

މަސްތުވާތަކެއްޗާއި ދެކޮޅަށް އިސްލާހުކޮށްފައިވާ ގާނޫނުގައި ވާގޮތުން މަސްތުވާތަކެތީގެ ވިޔަފާރިން އުފައްދާ މަންފާއިން ގަނެފައިވާ އުޅަނދުފަހަރާއި، ގޭގެޔާއި، ބިންބިމާއި، އެކައުންޓްތަކުގައި ހުރި ފައިސާ ދައުލަތަށް ނެގުމުގެ ގާނޫނީ ބާރު އޮވެއެވެ. މިއީ މަސްތުވާތަކެތީގެ ވިޔަފާރި ކުރާ ފަރާތްތަކަށް ލިބޭ މާލީ ފައިދާ މުޅިން ހުއްޓުވުމަށް އެޅި މުހިންމު ފިޔަވަޅެކެވެ.

މިނިސްޓަރު އިތުރަށް މައުލޫމާތު ދެއްވި ގޮތުގައި، މި ސިޔާސަތުގެ ސަބަބުން މަސްތުވާތަކެތީގެ ވިޔަފާރި ފަންޑުކުރާ މީހުންނަށް ބޮޑެތި ގޮންޖެހުންތަކާ ކުރިމަތިލާންޖެހޭނެއެވެ. އަދި ގާނޫނު ތަންފީޒުކުރާ އިދާރާތަކުން މިހާރު މަސައްކަތް ކުރަމުންދަނީ މިފަދަ މާލީ ޖަރީމާތައް ތަހުގީގުކޮށް، ދައުލަތަށް ނަގަންޖެހޭ މުދާ އަނބުރާ ހޯދުމުގެ ހާއްސަ އޮޕަރޭޝަންތައް ކުރިއަށްގެންދިއުމަށް ކަމަށްވެސް އޭނާ ވިދާޅުވިއެވެ.