ރާއްޖޭގައި ޒުވާނުން ކުށްކުރުން މަދުކުރުމަށާއި، ކުށްކުރާ ކުދިން ޖަލުގެ ގޮޅިތަކުގައި ތަޅުއަޅުވައިގެން ބައިތިއްބުމުގެ ބަދަލުގައި މުޖުތަމައަށް ފައިދާހުރި، އުފެއްދުންތެރި ބައެއްގެ ގޮތުގައި އަނބުރާ ގެނައުމަށް ސަރުކާރުން ހާއްސަ އިސްކަމެއްދީގެން މަސައްކަތް ކުރަމުންދާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

ގޭންގުތަކާއި ކުށްވެރި އަމަލުތަކުން ޒުވާނުން ދުރުހެލިކުރުވުމަށްޓަކައި، ކުށްކުރުން ހުއްޓާލުމަށްފަހު ގާނޫނީ އިމުގެ ތެރެއިން ވިޔަފާރިކުރުމާއި، އަމިއްލަ ފައިމައްޗަށް ތެދުވުމާއި އަދި އެކި ދާއިރާތަކުން ވަޒީފާތަކަށް ދިއުމުގެ ފުރުސަތުތައް މިހާރު ފަހިކޮށްދީފައިވާނެ ކަމަށް މިނިސްޓަރު ފާހަގަކުރެއްވިއެވެ.

މި ސިޔާސަތުގެ ދަށުން، ކުޑަކުދިން ކުށްކުރުމުން ދުރުހެލިކުރުމަށްޓަކައި ފުލުހުންގެ އިދާރާއިން ހިންގާ ހޭލުންތެރިކުރުމުގެ ޕްރޮގްރާމްތައް ވަނީ އިތުރަށް ހަރުދަނާކޮށްފަވެ. އެގޮތުން، 18 އަހަރުން ދަށުގެ 6,323 ކުދިންނާ މަގުމަތިން ބައްދަލުކޮށް، އެކި ކަންކަމުގައި އިރުޝާދާއި ނަސޭހަތްދީފައިވާއިރު، އޭގެ ތެރެއިން ނުރައްކާތެރި ކުށްތަކާ ގާތްވަމުންދިޔަ 159 ކުދިން ވަނީ އެކި ފަހަރުމަތިން ފުލުހުންގެ އިދާރާއަށް ހާޒިރުކޮށްފައެވެ. އަދި އެ ކުދިންގެ ބެލެނިވެރިންނާ ގުޅިގެން ގެއަށް ގެންގޮސްދިނުމާއި، އަދި ބައެއް ކުދިން ފުލުހުންގެ މަރުކަޒުތަކަށް ގެންގޮސްގެން ހާއްސަ ކައުންސެލިންގ އަދި ނަސޭހަތުގެ ޕްރޮގްރާމްތައް ވަނީ ކުރިއަށް ގެންގޮސްފައެވެ.

މީގެ އިތުރުން، އިތުރަށް އިސްލާހުކުރަންޖެހޭ ކުދިންނަށް އަމާޒުކޮށްގެން، ޝަރުއީ ކޯޓު އަމުރެއްގެ ދަށުން ހއ. ހޯރަފުށީގައި ގާއިމުކޮށްފައިވާ ހާއްސަ މަރުކަޒަށް އެ ކުދިން ގެންގޮސްގެން ރީހެބިލިޓޭޝަން އަދި އިންޓަރެކްޝަން ޕްރޮގްރާމްތައް މިހާރު ފަށާފައިވާ ކަމަށް މިނިސްޓަރު ވިދާޅުވިއެވެ. މިފަދަ މަރުކަޒުތަކަށް ގެންދެވޭ ކުދިން އަނބުރާ މުޖުތަމައަށާއި އާއިލާތަކުގެ ކައިރިއަށް ފޮނުވާނީ، އެކުދިންގެ ކިބައިގައި ހުރި ނުރަނގަޅު އާދަތައް ބަދަލުވެ، ރަނގަޅު އަހުލާގެއްގައި މުޖުތަމައުތެރޭގައި އަމާންކަމާއެކު އުޅެވޭނެކަމުގެ ފުރިހަމަ ޔަގީންކަން ކަމާބެހޭ މުއައްސަސާތަކަށް ލިބުމުން ކަމަށްވެސް އެމަނިކުފާނު ފާހަގަކުރެއްވިއެވެ.