ރާއްޖޭގައި ގޭންގުތަކުން ހިންގާ ނުރައްކާތެރި ކުށްތައް ހުއްޓުވުމަށާއި، މުޖުތަމައުގެ އަމަންއާމާންކަން ކަށަވަރުކުރުމަށްޓަކައި ގާނޫނީ އޮނިގަނޑަށް ގެނެވުނު ފުރިހަމަ އަދި މުހިންމު ބަދަލުތަކުގެ ސަބަބުން، މި ސަރުކާރު ވެރިކަމާ ހަވާލުވިފަހުން ގޭންގު މާރާމާރީއެއްގައި އެއްވެސް ޒުވާނެއްގެ ފުރާނަ ގެއްލިފައި ނުވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

ޕީއެންސީގެ "މަތީ މަޖިލިސް" ޖަލްސާގައި ވާހަކަދައްކަވަމުން މިނިސްޓަރު ވިދާޅުވީ، މި ސަރުކާރުން ވެރިކަމާ ހަވާލުވި އިރު ދިވެހިރާއްޖެ އޮތީ ގޭންގުތަކުގެ ނުފޫޒު އިންތިހާއަށް ބޮޑުވެ، ސިޔާސީ ފަރާތްތަކާއި ކޯޓުތައްވެސް އެފަދަ ފަރާތްތަކުން ކޮންޓްރޯލް ކުރަމުންދިޔަ ނުރައްކާތެރި ހާލަތެއްގައި ކަމަށެވެ. އެގޮތުން މަގުތަކުގައި ފާޅުގައި ތަޅާފޮޅައި، މީހުން މަރަމުންދިޔަ ކަން ފާހަގަކުރައްވަމުން މިނިސްޓަރު ވިދާޅުވީ، މިކަމަށް ދާއިމީ އަދި ގާނޫނީ ހައްލެއް ހޯދުމުގެ ގޮތުން އެންމެ ފުރަތަމަ ބެއްލެވީ ގާނޫނުގައި ހުރި އެންމެހާ ގެޕްތައް ދެނެގަނެ، އެކަންކަން ބަންދުކުރެވޭނެ ގޮތްތައް ކަމަށެވެ.

އެގޮތުން، ގާނޫނީ ހަމަތަކުގެ މަތިން ވަކި ކަމެއް ނުވަތަ ގްރޫޕެއް އެއީ ގޭންގެއްގެ ގޮތުގައި ޑިކްލެއަރކޮށް، އެފަދަ ނަންނަމުގައި އަދި އެގޮތަށް އޮޕަރޭޓް ނުކުރެވޭގޮތަށް ގާނޫނީ ހުރަސްތައް ފުރިހަމައަށް ބިނާކުރެވިފައިވާ ކަމަށް މިނިސްޓަރު ވިދާޅުވިއެވެ. މީގެ އިތުރުން، މުޖުތަމައު ތެރޭގައި ހިންގާ މިފަދަ ނުރައްކާތެރި ގްރޫޕްތަކަށް މާލީ ގޮތުން އެހީތެރިވެދީ، ފައިސާ ހަރަދުކޮށް، އެކި ކަހަލަ ކުށްތަކަށް މަގުފަހިކޮށްދޭ ފަރާތްތަކާ ދެކޮޅަށްވެސް ގާނޫނީ ފިޔަވަޅު އެޅޭނެ ހަރުދަނާ އިންތިޒާމުތައް މިހާރު ގާއިމުކޮށްފައިވާނެ ކަމަށް އެމަނިކުފާނު ފާހަގަކުރެއްވިއެވެ.

ތަފާސްހިސާބުތަކަށް ބަލާއިރު، 2007 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް (ކޮވިޑް ބަންދުގެ ދެ އަހަރު ފިޔަވައި) ކޮންމެ އަހަރަކުވެސް 2 އާއި 5 އާ ދެމެދުގެ އަދަދަކަށް ޒުވާނުން ގޭންގު މާރާމާރީތަކުގައި ކޮށާ ކަތިލައި މަރާލަމުންދިޔަ ކަމަށާއި، އެއީ ގައުމު ދުށް އެންމެ ހިތާމަވެރި އެއް މަންޒަރު ކަމަށް މިނިސްޓަރު ވިދާޅުވިއެވެ.

ނަމަވެސް، ސަރުކާރުން އެޅި ހަރުދަނާ އަދި ނަތީޖާ ނެރެދެވުނު ފިޔަވަޅުތަކުގެ ސަބަބުން، މި ސަރުކާރު ވެރިކަމާ ހަވާލުވިފަހުން މިހާތަނަށް އައިއިރު ގޭންގު މާރާމާރީއެއްގައި އެއްވެސް ޒުވާނެއްގެ ފުރާނަ ގެއްލިފައި ނުވާކަން މިނިސްޓަރު ފާހަގަކުރެއްވިއެވެ.