ދިވެހި ރުފިޔާގެ ނިޝާން ބައިނަލްއަގުވާމީ "ޔުނިކޯޑް ސްޓޭންޑާޑް 18.0" ގައި ހިމެނި، ސެޕްޓެމްބަރު 16 ގައި ރަސްމީކޮށް އާންމުކޮށްފައިވާއިރު، މިއީ ރާއްޖޭގެ ޓެކްނޮލޮޖީ އަދި ފޮންޓް ފަރުމާކުރުމުގެ ދާއިރާގެ ހުނަރުވެރި ޒުވާނުންތަކެއް ކުރި ގިނަދުވަސްވީ މަސައްކަތުގެ ނަތީޖާއެކެވެ. U+20C2 ގެ ނަމުގައި ކޯޑު ޕޮއިންޓް ކަނޑައެޅުނު މި ނިޝާން "ރުފިޔާ ސައިން" ގެ ގޮތުގައި ޔުނިކޯޑަށް ހުށަހެޅީ ނާއިލް އަބްދުއްރަހްމާން (ކުޑަ ނާއި) އަދި އަބްދުﷲ ޝަފީއު (އަބޯ) އެވެ.

މޯލްޑިވްސް މޮނިޓަރީ އޮތޯރިޓީ (އެމްއެމްއޭ) ގެ ތާއީދާއެކު ހުށަހެޅި މި ޕްރޮޕޯޒަލް ތައްޔާރުކުރީ ބައިނަލްއަގުވާމީ އަކުރުތަކުގެ މިންގަނޑަށް އަކުރެއް އިތުރުކުރުމުގައި އަމަލުކުރާ ފަންނީ އޮނިގަނޑާ އެއްގޮތަށެވެ. މީގެ ތެރޭގައި އެ އަކުރުގެ ސިފަތަކާއި، ލިޔާނެ ގޮތާއި، ފޮންޓްތަކުގައި އެ ބޭނުންކުރާނެ ގޮތް ސާބިތުކޮށްދިނުން ހިމެނެއެވެ. މި މަރުހަލާގައި ބޭނުންކުރުމަށް ރުފިޔާ ނިޝާނުގެ ކޮމްޕިއުޓަރު ފޮންޓެއް ފަރުމާކޮށްފައިވަނީ "އަކުރު ޓައިޕް" ގެ އަބޯ އެވެ. މީގެ އިތުރުން މޯލްޑިވްސް އައިސީޓީ އެލަޔަންސްގެ ހަސަން އިރުފާން އާއި ޔުނިކޯޑް މާހިރު އަބްދުﷲ ގާދިރު އަދި ޑރ. ސަރްމަދު ހުސައިން ވަނީ މި މަސައްކަތުގައި އެހީތެރިވެދީފައެވެ.

ރުފިޔާގެ ނިޝާނަކީ 2022 ގައި އެމްއެމްއޭއިން ތައާރަފުކުރި، ހަސަން ޝުޖާއު ފަރުމާކުރި ނިޝާނެކެވެ. މިއީ ތާނަ އަކުރު "ރ" އާއި ހިސާބު އިލްމުގައި ބޭނުންކުރާ ހަމަހަމަކަމުގެ ނިޝާން އެކުލެވޭ ގޮތަށް ހަދާފައިވާ ރަމްޒެކެވެ. ނަމަވެސް، 2022 އިން ފެށިގެން އެ ނިޝާން ބޭނުންކުރަމުން އައީ ހާއްސަ ފޮންޓްތަކާއި ޓައިޕޮގްރަފިކް އުކުޅުތައް ބޭނުންކޮށްގެން ކަމަށްވާތީ، ޑިޖިޓަލް ސިސްޓަމްތަކުގައި ބޭނުންކުރުމަށް ބޮޑެތި ގޮންޖެހުންތަކެއް ހުރެއެވެ.

މި ބަދަލާއެކު، ދުނިޔޭގެ އެކި ކަންކޮޅުތަކުގައި ބޭނުންކުރާ ކޮމްޕިއުޓަރާއި، ފޯނާއި، ވެބްސައިޓްތަކާއި، މާލީ ނިޒާމުތަކުގައި ވަކި ހާއްސަ ފޮންޓަކަށް ބަރޯސާވުމެއް ނެތި، ދިވެހި ރުފިޔާގެ ނިޝާން އޭގެ އަސްލު ގޮތުގައި ބޭނުންކުރެވޭނެއެވެ.