ރާއްޖެއާއި މެލޭޝިއާއާ ދެމެދު ޕްރިފަރެންޝަލް ޓްރޭޑް އެގްރީމެންޓެއް (ޕީ.ޓީ.އޭ) ގާއިމުކުރުމުގެ މަޝްވަރާތައް ފެށުމަށް ދެ ގައުމުން އެއްބަސްވެއްޖެއެވެ. ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިގޮތުގައި މި ނިންމުމަކީ ދެ ގައުމުގެ ވިޔަފާރިތަކަށް އާ ފުރުސަތުތަކެއް ހުޅުވިގެންދާނެ މުހިންމު ފިޔަވަޅެކެވެ.
މި އެއްބަސްވުން އިއުލާނުކުރެއްވީ، ރާއްޖެއަށް ރަސްމީ ދަތުރުފުޅެއް ކުރައްވަމުން ގެންދަވާ މެލޭޝިއާގެ ބޮޑުވަޒީރު އޮނަރަބަލް އަންވަރު އިބްރާހީމާއި ރައީސް މުޢިއްޒާ ދެމެދު ބޭއްވި ރަސްމީ މުހިންމު މަޝްވަރާތަކަށްފަހުއެވެ. ދެ ލީޑަރުން ވަނީ ދޭދޭ އަދި ބައިނަލްއަގްވާމީ މައިދާނުގައި ގުޅިގެން މަސައްކަތްކުރުން ފުޅާކުރުމާއި، 58 އަހަރުވެފައިވާ ދެ ގައުމުގެ ސިޔާސީ ގުޅުން އިތުރަށް ބަދަހިކުރުމާ ބެހޭގޮތުން މަޝްވަރާކުރައްވާފައެވެ.
މި ރަސްމިއްޔާތުގެ ތެރެއިން، ދިފާއީ ދާއިރާއިން އެއްބަސްވުމަކަށް އައުމާއި، އިސްލާމީ ކަންތައްތަކާ ގުޅޭގޮތުން އާ އެއްބަސްވުންތަކެއްގައި (އެމް.އޯ.ޔޫ) ވަނީ ސޮއިކުރައްވާފައެވެ.
Advertisement
ރައީސް މުޢިއްޒު ވަނީ ރާއްޖެއާއި މެލޭޝިއާއަކީ އެއް އަމާޒުތަކެއް ހިއްސާކުރާ އަދި އަހުވަންތަކަމުގެ ގުޅުމެއް އޮތް ދެ ގައުމުކަން ފާހަގަކުރައްވައި، ދެ ގައުމުގެ ގުޅުން ކުރިއަށް އޮތްތަނުގައި އިތުރަށް ހަރުދަނާކުރައްވާނެ ކަމުގެ ޔަގީންކަން ދެއްވާފައެވެ.
