ރާއްޖޭގެ ބޭންކުތައް މެދުވެރިކޮށް ބޭރުން މުދާ އެތެރެކުރުމުގެ ނަމުގައި ހަދަމުންދާ ބޮޑެތި ޓެލެގްރަފިކް ޓްރާންސްފާ (ޓީޓީ) ތަކުގެ ސައްހަކަން ކަށަވަރުކުރުމަށް ޚާއްޞަ ނިޒާމެއް ޤާއިމްކުރުމުގެ މަސައްކަތް ސަރުކާރުން ފަށާފައިވާކަން ހޯމް މިނިސްޓަރު ޢަލީ އިޙްސާން، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވިދާޅުވެއްޖެއެވެ.

ވަޒީރު ވިދާޅުވީ، ރާއްޖެއިން ބޭރަށް ގިނަ އަދަދެއްގެ ޑޮލަރު ދޫކޮށްފައިވީ ނަމަވެސް، އެ ފައިސާއާ އެއްގޮތަށް ރާއްޖެއަށް މުދާ އެތެރެނުވާ ބޮޑެތި މައްސަލަތަކެއް ދައުލަތުގެ މުއައްސަސާތަކަށް ފާހަގަކުރެވިފައިވާ ކަމަށެވެ. މިއީ ޤައުމުގެ ބޭރު ފައިސާގެ ރިޒާވަށް ބޮޑު ނުފޫޒެއް ފޯރަމުންދާ ކަމަކަށް ވާތީ، މިކަން ހަރުދަނާކޮށް ބެލެހެއްޓުމަކީ މިވަގުތަށް ނުހަނު މުހިންމު ކަމެއްކަން ވަޒީރު ފާހަގަކުރެއްވިއެވެ.

މިނިސްޓަރު އިޙްސާން އިތުރަށް އަލިއަޅުއްވާލެއްވި ގޮތުގައި، ބައެއް ވިޔަފާރިތަކުން ބޭރަށް ފޮނުވާ ފައިސާއަކީ މުދާ ގަތުމަށް ދައްކާ އެޑްވާންސް ޕޭމަންޓް ކަމަށް ބުނި ނަމަވެސް، އަހަރެއް ވެގެންދާއިރު ވެސް އެ ފައިސާއަށް ވާ މުދާ ރާއްޖެއަށް އެތެރެނުވެ ހުންނަކަން ވަނީ ތަހުގީގުތަކުން އެނގިފައެވެ. މިފަދަ ކަންކަމަކީ ބޭރު ފައިސާގެ ރަސްމީ ނިޒާމުގެ ބޭރުން ނާޖާއިޒު މުއާމަލާތްތައް ހިންގުމަށް ބޭނުންކުރާ ހީލަތްތެރި އުކުޅަކަށް ވެދާނެތީ، ބޭންކުތަކާއި މޯލްޑިވްސް ކަސްޓަމްސް ސަރވިސް ގުޅިގެން ޓީޓީތަކުގެ ހަގީގީ ސައްހަކަން ވަގުތުން ވަގުތަށް ބަލާނެ އޮޓޮމޭޓެޑް ނިޒާމެއް ޤާއިމްކުރުމުގެ ރޭވުންތައް ސަރުކާރުން މިހާރު ދަނީ އެކުލަވާލަމުންނެވެ. މީގެ ސަބަބުން ޤާނޫނީ އިމުގެ ތެރެއިން ހިންގާ ރަސްމީ ވިޔަފާރިތަކަށް އެއްވެސް ހުރަހެއް ނޭޅި، ނާޖާއިޒު ފައިދާ ނަގާ ފަރާތްތައް ހުއްޓުވޭނެއެވެ.

މި ނޫސްވެރިންގެ ބައްދަލުވުމުގައި ބައިވެރިވެވަޑައިގަތް އިކޮނޮމިކް މިނިސްޓަރު މުޙައްމަދު ސަޢީދާއި ބަންޑާރަނައިބު އަޙްމަދު އުޝާމް ވެސް ވަނީ ބޭރު ފައިސާގެ ބާޒާރު ހަމައަކަށް އެޅުވުމަށް މުއައްސަސާތައް ގުޅިގެން ކުރާ މަސައްކަތްތަކަށް ތާއީދުކުރައްވާ ވާހަކަދައްކަވާފައެވެ. ސަރުކާރުން އަޅަމުންދާ މިފަދަ ހަރުދަނާ ފިޔަވަޅުތަކުގެ ސަބަބުން ކަޅު ބާޒާރުގައި ޑޮލަރުގެ ރޭޓް މިހާރު ވަނީ ވަރަށް ބޮޑަށް ތިރިކުރެވިފައި ކަމަށާއި، ބޭރު ފައިސާގެ ޤަވާއިދުތަކަށް ޤާނޫނީ ގޮތުން ގެންނަންޖެހޭ ބަދަލުތައް ގެނައުމުގެ މަސައްކަތް ވެސް ބާރުމިނެއްގައި ކުރިއަށްދާކަން ވަޒީރުން ފާހަގަކުރެއްވިއެވެ.

ސަރުކާރުގެ އަމާޒަކީ ދިވެހި ވިޔަފާރިތަކާއި ޤައުމީ އިޤްތިޞާދަށް މާލީ ނިޒާމުގެ ތެރެއިން ފުރިހަމަ ރައްކާތެރިކަން ކަށަވަރުކޮށްދިނުމެވެ.