ދިވެހިރާއްޖޭގެ އިސްލާމީ ވަހްދަތާއި ޝަހްސިއްޔަތު ދަމަހައްޓައި، މުސްތަގުބަލުގެ ފިކުރީ މިސްރާބު ބައްޓަންކުރުމުގައި ޒުވާން ހަތީބުން އަމަލީ ނަމޫނާއަކަށް ވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގޮވާލައްވައިފިއެވެ. އެމަނިކުފާނު މިފަދައިން އިލްތިމާސްކުރެއްވީ، ރާއްޖެ އިސްލާމްވިތާ 900 އަހަރު ފުރުމުގެ ޝަރަފުވެރި މުނާސަބަތާ ގުޅިގެން ބޭއްވި "ޒުވާން ހަތީބުންގެ ގައުމީ މަހާސިންތާ" ނިންމުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ. ހަތީބުންގެ ބަހާއި އަމަލު އެއްގޮތްވުމުގެ މުހިންމުކަމުގެ މައްޗަށް އަލިއަޅުއްވާލައްވަމުން، ދުލުން ބުނާ ބަހަށް އަމަލުން ފުރިހަމައަށް އިހްލާސްތެރިވުމަށް އެމަނިކުފާނު ވަނީ ނަސޭހަތްތެރިވެވަޑައިގެންފައެވެ.
އިސްލާމީ މަރުކަޒުގެ ޖަލްސާ ކުރާ މާލަމުގައި ބޭއްވި މި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ، އިސްލާމީ ދައުވަތުގެ ދަންމަރު އުފުލުމަށް 700 އަށްވުރެ ގިނަ ތައުލީމީ ޒުވާނުން ނުކުތުމަކީ ދިވެހި އިސްލާމީ ރޫހަށް ލިބުނު އާ ބާރެއް ކަމުގައެވެ. އަދި އޭގެތެރެއިން 300 އަށްވުރެ ގިނަ ޒުވާނުން މި މަހާސިންތާގައި ބައިވެރިވުމަކީ ގައުމުގެ އުންމީދުގެ ހުޅުކޮޅުތައް އާވެ، މުޅި ރާއްޖޭގެ އިސްލާމީ ވެއްޓަށް އަލިކަންދޭނެ މުރައްބީންތަކެއް އުފެދިގެންދާކަމުގެ ހެޔޮ ފާލެއް ކަމުގައި އެމަނިކުފާނު ފާހަގަކުރެއްވިއެވެ. މީގެއިތުރުން، ދީނުގެ އަސާސަކީ މަސްލަހަތުކަން ބަޔާންކުރައްވަމުން، ޒުވާން ހަތީބުން ދުލާއި ގަލަން ހިންގުމުގައި އިންސާނީ ކަރާމާތާއި މުޖުތަމައުގެ އެއްބައިވަންތަކަން ދެމެހެއްޓުމަށް ހިކްމަތްތެރިކަން އިސްކުރުމަށް އެމަނިކުފާނު އިރުޝާދުދެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މިއަދުގެ ޒުވާން ހަތީބުންނަކީ މާދަމާ ރާއްޖޭގެ އިލްމުވެރިންނާއި، ވިސްނުންތެރިންނާއި، ކުޅަދާނަ ބަސްމޮށުންތެރިންނަށް ވެގެންދިއުމަށް އެދިވަޑައިގަންނަވާކަން ހާމަކުރެއްވިއެވެ.
Advertisement
އިސްލާމީ ކަންތައްތަކާއި އައުޤާފާ ބެހޭ ވުޒާރާއިން އިންތިޒާމުކޮށްގެން ކުރިއަށްގެންދިޔަ މި މަހާސިންތާގެ ނިންމުމުގެ ރަސްމިއްޔާތުގައި، އެ ވުޒާރާގެ ވަޒީރު ޑރ. މުހައްމަދު ޝަހީމް އަލީ ސައީދުގެ އިތުރުން ދައުލަތުގެ ވަޒީރުންނާއި އިސްވެރިން ބައިވެރިވެވަޑައިގެންނެވިއެވެ. ޒުވާން ހަތީބުން ތަމްރީނު ކުރުމުގެ 5 ބުރެއް މިހާތަނަށް ހިންގާފައިވާއިރު، މި ޕްރޮގްރާމުގެ ސަބަބުން ރަށްރަށުގައި ހުކުރު ހުތުބާ ކިޔާނެ އިމާމުން ލިބުމުގައިހުރި ދަތިތަކަށް ބޮޑު ހައްލެއް ލިބިފައިވާކަން ފާހަގަކުރެވެއެވެ.
