ދަރިވަރުންނަށް ހާސިލްކުރެވޭ މިންވަރު އިތުރުކުރުމަށްޓަކައި ކީ ސްޓޭޖް 1 (ގްރޭޑް 1، 2، 3) ގެ ފޮތްތަކަށް ބަދަލު ގެނައުމަށް މިނިސްޓްރީ އޮފް އެޑިޔުކޭޝަނުން ނިންމައިފިއެވެ. މިހާރު ކުރިއަށްދާ 8 ވަނަ އިންޓަރނޭޝަނަލް ޓީޗަރސް ކޮންފަރެންސް ފެށުމުގެ ރަސްމިއްޔާތުގައި ވާހަކަ ދައްކަވަމުން ތަޢުލީމާ މަތީ ތަޢުލީމާ ހުނަރުތައް ތަރައްޤީކުރުމާއި ބެހޭ ވަޒީރު ޑރ. އިސްމާޢިލް ޝަފީޢު ވިދާޅުވީ، ޤައުމީ ފެންވަރުގައި ހެދޭ އެސެސްމަންޓްތަކުން ދަރިވަރުން ހިސާބު ފަދަ މާއްދާތަކުން ބަލިކަށިކޮށް އުޅޭތީ، މިކަމަށް ޙައްލެއް ހޯދުމަށް ފޮތްތައް އަލުން ފަރުމާކުރުމުގެ މަސައްކަތް ކުރަމުންދާ ކަމަށެވެ.

މި ގެނެވޭ ބަދަލުތަކުގެ ދަށުން އެއްވެސް މާއްދާއެއް ނުވަތަ ދީނީ ބައިތަކެއް އުނި ނުކުރާނެ ކަމުގެ ޔަޤީންކަން މިނިސްޓްރީން ވަނީ ދެއްވާފައެވެ. އޭގެ ބަދަލުގައި، ދަރިވަރުންގެ ފެންވަރު މަތިކުރުމަށްޓަކައި އިސްލާމް، ދިވެހި، އަދި ހިސާބު މި ތިން މާއްދާ ކިޔަވައިދިނުމަށް ސްކޫލްތަކުގައި ކަނޑައެޅިފައިވާ ވަގުތު އިތުރުކުރެވޭނެއެވެ. އަދި އުނިކުރެވޭނީ ކުދިންގެ އުމުރާ ނުގުޅޭ ގޮތަށް ހުރި، ވިސްނަން އުނދަގޫ ބުރަބޮޑު އިބާރާތްތައް އެކަނި ކަމަށް ވަޒީރު ބަޔާންކުރެއްވިއެވެ.

ތަޢުލީމީ ވަޒީރު އިތުރަށް ފާހަގަކުރެއްވި ގޮތުގައި، މި އިޞްލާޙީ ބަދަލުތައް ކާމިޔާބުކަމާއެކު ތަންފީޛުކުރުމުގައި ޓީޗަރުން މުހިންމު ދައުރެއް އަދާކުރާނެއެވެ. އައު ފޮތްތައް ފަރުމާކުރަނީ ކުދިން ކިޔަވާހިތްވާނެ ފަދަ ޝައުޤުވެރި ޒަމާނީ ޑިޒައިންތަކަށެވެ.