އީރާނުގެ ތެޔޮ ޓޭންކަރުތަކަށް އެމެރިކާއިން ދެމުންދާ ހަމަލާތަކާއި ހުރަސްއެޅުންތަކަށް ބަދަލުހިފުމުގެ ގޮތުން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން އެމެރިކާއާއި އެމެރިކާއާ ގުޅުންހުރި ވަރުގަދަ 12 އަމާޒަކަށް ފާއިތުވި 24 ގަޑިއިރު ތެރޭގައި ސިއްސުވާލަނިވި ހަމަލާތަކެއް ދީފިއެވެ. އީރާނުގެ ރަސްމީ މަސްދަރުތަކުން ބުނާ ގޮތުގައި، ހުރްމުޒް ކަނޑުއޮޅިން ދަތުރުކުރަމުންދިޔަ އެމެރިކާގެ އެންމެ ބޮޑު އެއް މަތިންދާބޯޓު އުފުލާ މަނަވަރު ކަމަށްވާ “ޔޫއެސްއެސް ޑްވައިޓް ޑީ” އަށާއި، އޭގެ ހިމާޔަތުގައި ދަތުރުކުރި އެމެރިކާގެ “ގައިޑެޑް-މިސައިލް ޑިސްޓްރޯޔާ” މަނަވަރަށް ވަނީ ބެލިސްޓިކް މިސައިލާއި ޑްރޯން ބޭނުންކޮށްގެން ސީދާ ހަމަލާދީ، އެ އުޅަނދުތަކުގެ ދިފާއީ ނިޒާމުތައް ހަލާކުކޮށް ބޮޑެތި ގެއްލުންތަކެއް ދީފައެވެ.

މީގެ އިތުރުން އުރުދުންގައި ހުންނަ އެމެރިކާ ސިފައިންގެ އަސްކަރީ ބޭހެއް ކަމަށްވާ “އަލް-އަޒްރަގް” އަށް އަމާޒުކޮށް 20 ބެލިސްޓިކް މިސައިލް ފޮނުވާލާފައިވާ ކަމަށްވެސް އީރާނުން ވަނީ ހާމަކޮށްފައެވެ.

ކަނޑުގެ ސަރަހައްދުގައި އެމެރިކާގެ ބާރު ކަނޑުވާލުމަށް ދިން މި ހަމަލާތަކުގައި، އެމެރިކާގެ ކުންފުނިތަކަށް ނިސްބަތްވާ އަދި އެމެރިކާއަށް ތެޔޮ އުފުލާ ޖުމްލަ 10 ތެޔޮ ޓޭންކަރަކަށް އީރާނުން ވަނީ ކާމިޔާބުކަމާއެކު ހަމަލާދީ ހުއްޓުވާފައެވެ. އީރާނުގެ މީޑިއާތަކުން ނަން ހާމަކޮށްފައިވާ ޓޭންކަރުތަކުގެ ތެރޭގައި އެމެރިކާއާއި އިސްރާއީލުގެ މަސްލަހަތު އޮންނަ “ޕެސިފިކް ޒިރްކޯން” އާއި، “އެޑްވާންޓޭޖް ސްވީޓް” އަދި “ސެއިންޓް ނިކޮލަސް” ޓޭންކަރު ހިމެނެއެވެ. މީގެ އިތުރުން، އެމެރިކާގެ ސީދާ ކޮންޓްރޯލް އޮންނަ “މާޝަލް އައިލެންޑްސް” އަދި “ލައިބީރިއާ” ގެ ދިދަ ޖަހައިގެން ދަތުރުކުރި އިތުރު 7 ޓޭންކަރަކަށް ވަނީ ހަމަލާދީފައެވެ.

އީރާނުގެ ރަސްމީ މީޑިއާ މެދުވެރިކޮށް އީރާނުން ވަނީ ވޮޝިންގްޓަނުގެ ހަމަލާތައް ހުއްޓާނުލާހާ ހިނދަކު މިފަދަ ހަމަލާތައް ކުރިއަށްދާނެ ކަމުގެ ހަރުކަށި އިންޒާރު ދީފައެވެ. އަދި ކުރިއަށް އޮތް ތަނުގައި އީރާނުގެ ކަނޑުގެ ސަރަހައްދުން ބޭރުން ޕާކިސްތާނާވީ ފަރާތަށް އޮންނަ “ޖާބަހާރު” ކަނޑުގެ ސަރަހައްދާ ހަމައަށް އެމެރިކާގެ އެއްވެސް އުޅަނދަކަށް ނުވަދެވޭނެހެން “މަނާ ސަރަހައްދެއް” ވަނީ ކަނޑައަޅާފައެވެ.