ދުނިޔޭގެ ސިއްހަތު ޖަމިއްޔާގެ (ޑަބްލިޔުއެޗްއޯ) ދެކުނު-އިރުމަތު އޭޝިއާ ސަރަހައްދުގައި، ގައިންގަޔަށް ނާރާ ބޮޑެތި ބަލި (ނޮން-ކޮމިއުނިކޭބަލް ޑިސީސަސް) ތަކުން ޒުވާން އުމުރުގައި މަރުވާ މީހުން މަދުކުރުމަށް 2030 ވަނަ އަހަރަށް ކަނޑައަޅާފައިވާ ލަނޑުދަނޑި، އެންމެ ފުރަތަމަ ހާސިލްކުރި ގައުމަކަށް ދިވެހިރާއްޖެ ވެއްޖެއެވެ.
ސެޕްޓެމްބަރު 8 ވީ ދުވަހު ބޭއްވި ޑަބްލިޔުއެޗްއޯގެ 79 ވަނަ ރީޖަނަލް ކޮމިޓީ ބައްދަލުވުމުގައި މި ކާމިޔާބީ ރަސްމީކޮށް ފާހަގަކޮށް، ރާއްޖެއަށް ވަނީ ހާއްސަ ޝަރަފެއް އަރުވާފައެވެ. ހިތުގެ ބަލިތަކާއި، ކެންސަރާއި، ހަކުރުބައްޔާއި އަދި ނޭވާލާ ނިޒާމުގެ ބަލިތަކުން މީހުން ސަލާމަތް ކުރުމަށް ރާއްޖެއިން ހޯދާފައިވާ މި ކުރިއެރުމަކީ މުޅި ސަރަހައްދަށް ލިބުނު ބޮޑު ކާމިޔާބީއެކެވެ.
މި ކާމިޔާބީގެ އެންމެ ބޮޑު ބިންގަލަކަށް ވެގެންދިޔައީ ފާފު އަތޮޅުގައި ފެށި ޕްރައިމަރީ ހެލްތު ކެއަރ ޕްރޮގްރާމާއި ޒަމާނީ ޑިޖިޓަލް ރަޖިސްޓްރީގެ ނިޒާމެވެ. ސްކްރީނިންގ އާއި ފަރުވާދިނުމުގެ ކަންކަން ފަސޭހަކޮށްދިން މި ޕްރޮގްރާމްގެ ސަބަބުން، ކުރު މުއްދަތެއްގެ ތެރޭގައި އާންމުންގެ ބޮޑު ބައިވެރިވުމެއް ވަނީ ލިބިފައެވެ. ނަތީޖާއެއްގެ ގޮތުން، ހަކުރުބައްޔާއި ލޭގެ ޕްރެޝަރު އަދި ކޮލެސްޓްރޯލަށް ފަރުވާ ހޯދާ މީހުންގެ އަދަދު ވަނީ ފާހަގަކޮށްލެވޭ މިންވަރަކަށް މައްޗަށް ގޮސްފައެވެ.
Advertisement
ޑަބްލިޔުއެޗްއޯއިން މި ކާމިޔާބީ ސިފަކޮށްފައިވަނީ ކުދި ޖަޒީރާ ގައުމުތަކަށް ކުރިމަތިވާ އާބާދީގެ ގޮންޖެހުންތަކާ އެކުވެސް ސިއްހީ ދާއިރާއިން ކުރިއަށްދެވިދާނެ ކަމުގެ ފުރިހަމަ ނަމޫނާއެއްގެ ގޮތުގައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މި މޮޑެލް އިތުރަށް ފުޅާކުރުމުގެ މަސައްކަތް ފަށާފައިވާއިރު، 2026 ވަނަ އަހަރުގެ އެޕްރީލް މަހު ޑަބްލިޔުއެޗްއޯއާއި ސިއްހީ ވުޒާރާ ގުޅިގެން ވަނީ ގައުމީ ޕްރައިމަރީ ހެލްތު ކެއަރ ޕްރޮގްރާމް ކާފު އަދި ވާވު އަތޮޅަށް ފުޅާކޮށްފައެވެ. މީގެ އިތުރުން، މާލެއާއި ހުޅުމާލޭގައި ޖެނެރަލް ޕްރެކްޓިޝަނަރުން ލީޑުކޮށްގެން ދޭ ހިދުމަތްތައް ފުޅާކޮށް ވަރުގަދަކުރުމުގެ މަސައްކަތްވެސް ސަރުކާރުން ދަނީ ބާރުމިނުގައި ކުރަމުންނެވެ.
މިފަދަ މަޝްރޫއުތައް ކާމިޔާބުކަމާއެކު ކުރިއަށް ގެންދިއުމަށްޓަކައި ސިއްހީ ދާއިރާއަށް ބޭނުންވާ އުމްރާނީ ވަސީލަތްތަކާއި މުވައްޒަފުން އިތުރުކުރުމުގެ މަސައްކަތްތައްވެސް ސަރުކާރުން ވަނީ ރާވާފައެވެ.
