ނޮވެމްބަރު މަހު ބޭއްވުމަށް ހަމަޖެހިފައިވާ ކޮންގްރެސްގެ މެދު ދައުރު އިންތިހާބުގައި ރިޕަބްލިކަން ޕާޓީއަށް ކޮންގްރެސްގެ ދެ މަޖިލީހުގެ ކޮންޓްރޯލް ލިބިއްޖެނަމަ އެމެރިކާގެ 18 އަހަރުން މަތީގެ ކޮންމެ ރައްޔިތަކަށް 5,000 ޑޮލަރު ދިނުމަށް އެމެރިކާގެ ރައީސް ޑޮލްޑް ޓްރަމްޕް ވައުދުވެވަޑައިގެންފިއެވެ.

ޑަލަސްގައި ބޭއްވި ރިޕަބްލިކަން ޕާޓީގެ މެދުދައުރު ކޮންވެންޝަންގައި "ޓްރަމްޕް ޑިވިޑެންޑް" ގެ ނަމުގައި މި ހާއްސަ ޕްރޮޕޯޒަލް ހުށަހަޅުއްވަމުން ޓްރަމްޕް ވިދާޅުވީ، މި ފައިސާ ހޭދަކުރަންވާނީ ހަމައެކަނި އެމެރިކާ ތެރޭގައި ކަމަށެވެ. ނަމަވެސް، މި ފައިސާ ހަމަޖައްސާނެ ގޮތަކާއި ނުވަތަ އެ ޝަރުތު ތަންފީޒުކުރާނެ ގޮތެއްގެ ތަފްސީލެއް އެމަނިކުފާނު ހާމަކުރައްވާފައެއް ނުވެއެވެ.

އެމެރިކާގައި ތިބި 18 އަހަރުން މަތީގެ ގާތްގަނޑަކަށް 240 މިލިއަން ރައްޔިތުންނަށް މި ފައިސާ ދޫކުރުމަށްޓަކައި، ދައުލަތުގެ ބަޖެޓުން ގާތްގަނޑަކަށް 1.2 ޓްރިލިއަން ޑޮލަރު ހަރަދުވާނެ ކަމަށް ލަފާކުރެވޭއިރު، މި ޕްލޭން އަމަލީ ސިފައަކަށް ގެނައުމަށްޓަކައި ކޮންގްރެސްގެ ރަސްމީ ރުހުން ބޭނުންވާނެއެވެ.

މި ހަރަދު ހަމަޖެއްސުމަށްޓަކައި ޓެރިފް ނުވަތަ އިމްޕޯޓް ޑިއުޓީން ލިބޭ އާމްދަނީ ބޭނުންކުރެވިދާނެ ކަމަށް ޓްރަމްޕް ލަފާކުރައްވާއިރު، މުއްސަނދި ފަރާތްތަކަށް މި ފައިސާގެ އެހީ ނުލިބިދާނެ ކަމަށް ނައިބު ރައީސް ޖޭ.ޑީ. ވެންސް ވަނީ އިޝާރާތުކުރައްވާފައެވެ.

މި ހުށަހެޅުމާ ގުޅިގެން، ސަރުކާރުން މިހާ ބޮޑު ހަރަދެއް ކުރާނީ ކޮންގޮތަކުންކަމާމެދު ބައެއް ރިޕަބްލިކަނުންގެ މެދުގައިވެސް ވަނީ ޝައްކު އުފެދިފައެވެ. އަދި ޑިމޮކްރެޓުން ވަނީ މިއީ އިންތިހާބާ ދިމާކޮށް ވޯޓު ހޯދުމަށް ވެވަޑައިގެންނެވި ވައުދެއްގެ ގޮތުގައި ސިފަކޮށް ފާޑުކިޔާފައެވެ.

މީގެ ކުރިންވެސް 2,000 ޑޮލަރުގެ ފައިސާގެ އެހީއެއް ދިނުމަށް ޓެރިފް އާމްދަނީން ހަމަޖައްސާނެ ކަމަށް ޓްރަމްޕް ވިދާޅުވި ނަމަވެސް، އެކަން އޭރު އަމަލީ ސިފައަކަށް އައިސްފައެއް ނުވެއެވެ. މިފަހަރުގެ އިންތިހާބަކީ އެމަނިކުފާނުގެ ރިޔާސީ ވެރިކަމަށް ރައްޔިތުން ދޭ ވޯޓެއް ކަމަށް ދެކި، އިންތިހާބުގައި ވާދަކުރައްވަނީ ހަމަ އެމަނިކުފާނު ކަމަށް ވިސްނައިގެން ވޯޓުދިނުމަށް ސަޕޯޓަރުންގެ ކިބައިން ޓްރަމްޕް ވަނީ އެދިވަޑައިގެންފައެވެ.