މާލެ ސިޓީ ކައުންސިލަށް ވެހިކަލް ރަޖިސްޓްރީއާއި އަހަރީ ފީގެ ގޮތުގައި ލިބޭ ފައިސާ އަށް “ހަދާނަހަދާއެއް” ސާފުނުވާތީވެ، އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މިނިސްޓަރު މުހައްމަދު ސައީދު ކަންބޮޑުވެވަޑައިގެންފިއެވެ.
ސިޓީކައުންސިލަށް ވެހިކަލްތަކުން އެކަނި 200 މިލިއަނަށް ވުރެ ގިނަ ރުފިޔާ ކޮންމެ އަހަރަކު ލިބޭ އިރު މިއީ 5 އަހަރަށް ބަލާނަމަ 1 ބިލިއަނަށް ވުރެ ގިނަ ރުފިޔާއެވެ. އެ ކައުންސިލުގެ މޭޔަރު އާދަމް އާޒިމް ވިދާޅުވީ އެ ފައިސާތައް ބޭނުންކުރަނީ “އެހެންކަމަކަށް”، ކަމުގައި މިނިސްޓަރު މިއަދު ވިދާޅުވިއެވެ.
ސިޓީކައުންސިލުން ބުނާ ގޮތުގައި މިސްކިތްތައް މަރާމާތުކުރުމާއި ކާރިސާތަކަށް އެ ފައިސާ ހަރަދުކުރެއެވެ.
Advertisement
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން މިނިސްޓަރު ސައީދު ވިދާޅުވީ، މާލެސިޓީ ކައުންސިލުން އެ ފައިސާ ހަރަދުކުރަންޖެހޭނީ މާލޭގެ ދަތުރުފަތުރާއި ޓްރެފިކް މައްސަލަތައް ހައްލުކުރުމަށް ކަމަށެވެ.
މާލޭގެ މޭޔަރު އާދަމް އާޒިމް ވިދާޅުވީ، ވެހިކަލް ފީގެ ފައިސާ މިސްކިތްތައް ބެލެހެއްޓުމަށް ބޭނުންކުރައްވާ ކަމަށެވެ. އެކަމާއި ގުޅިގެން އިސްލާމިކް މިނިސްޓަރާއެކު މަޝްވަރާ ކުރެއްވި ކަމަށް މިނިސްޓަރު ސައީދު ވިދާޅުވިއެވެ. އިސްލާމިކް މިނިސްޓަރީގައި މިސްކިތްތައް މަރާމާތުކޮށް ބެލެހެއްޓުމުގެ ގާބިލުކަމާއި ބަޖެޓު އެބައޮތް ކަމަށާއި، ވެހިކަލް ފީއަށް ބަރޯސާނުވެ އެ މަސައްކަތް މިއަށްވުރެ ހަރުދަނާކޮށް އެ މިނިސްޓަރީއަށް ކުރެވޭނެ ކަމަށް މިނިސްޓަރު ސައީދު ފާހަގަކުރެއްވިއެވެ. މީގެއިތުރުން ކާރިސާތަކުން ރައްކާތެރިވުމަށް ވަކި ބަޖެޓެއް ކަނޑައެޅިފައިވާއިރު، އެކަމަށް ވެހިކަލް ފީ ބޭނުންކުރަންޖެހޭ ސަބަބެއް ނެތް ކަމަށްވެސް ވިދާޅުވިއެވެ.
މިނިސްޓަރު ސައީދު ތަކުރާރުކޮށް ވިދާޅުވީ، ފީ ދައްކާ ފަރާތްތަކަށް އޭގެ ފައިދާ ލިބެންޖެހޭނެ ކަމަށެވެ. އެގޮތުން މަގުތައް ރަނގަޅު ފެންވަރަކަށް މަރާމާތުކުރުމާއި، ޓްރެފިކް ބެލެހެއްޓުން ހަރުދަނާކުރުމާއި، ޕާކިން މައްސަލައަށް ހައްލު ހޯދައިދިނުމަށް އެ ފައިސާ ހަރަދުކުރަންޖެހޭ ކަމަށެވެ.
މާލޭގައި ތޮއްޖެހުމާއި، ޕާކުކުރާނެ ޖާގަ ނެތުމާއި، އެކްސިޑެންޓްތައް އިތުރުވަމުންދާތީ، މުޅި ސިޓީގެ ޓްރެފިކް ރިއަލް-ޓައިމްކޮށް މޮނީޓަރުކުރާނެ ސެންޓަރެއް ގާއިމުކުރުމަށް ސަރުކާރުން ވަނީ ނިންމާފައެވެ. އަދި ޒަމާނީ ވަސީލަތްތަކާއެކު ފުލުހުން މަގުމައްޗަށް ނެރެ، ޓްރެފިކް ބެލެހެއްޓުން ވަރުގަދަކުރާނެ ކަމަށްވެސް އިކޮނޮމިކް މިނިސްޓަރު ވިދާޅުވިއެވެ.
