ދުނިޔޭގެ އެންމެ ވަރުގަދަ އަސްކަރީ ބާރު ކަމަށްވާ އެމެރިކާގެ ނޭވީން ބޭނުންކުރާ، އިންސާނަކާއި ނުލާ ދުއްވާ އެންމެ ޒަމާނީ ސަބްމެރިންއެއް އީރާނުގެ ވަރުގަދަ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ހުރްމުޒް ކަނޑުއޮޅިން އަތުލައިގަނެ، މުޅި މެދުއިރުމަތީގެ މަސްރަޙު ނޭވާ ހިފަހައްޓާލަންޖެހޭ ފަދަ ނުރައްކާތެރި ފައްތަރަކަށް ވައްޓާލައިފިއެވެ.

އީރާނުން އަތުލައިގަތީ އެމެރިކާގެ 'އެންޑިއުރިލް' ކުންފުނިން އުފައްދާފައިވާ، ކަނޑުގެ އެންމެ އަޑިން ޖާސޫސީ މަޢުލޫމާތު އެއްކުރުމަށް ޚާއްޞަ ޑައިވް-އެލްޑީ މޮޑެލްގެ ބޮޑު ސަބްމެރިންއެކެވެ. އީރާނުގެ ދައުލަތުގެ މީޑިއާތަކުން މި ހާދިސާގެ ވީޑިއޯތައް އާންމުކޮށް، މިއީ އެމެރިކާގެ މޫނުމަތީގައި ޖެހި ވަރުގަދަ އެތިފަހަރެއްގެ ގޮތުގައި ސިފަކުރަމުންދާއިރު، މިއީ އެމީހުންގެ ޚާއްޞަ އަސްކަރީ އޮޕަރޭޝަނެއްގެ ތެރެއިން ހޯދި ބޮޑު "ހަނދާނީ ނިޝާނެއް" ކަމަށް ވަނީ ބުނެފައެވެ.

^{އެމެރިކަގެ ޖާސޫސީ ސަބްމެރިން.}

މި ބޮޑު ސިހުމާއެކު އެމެރިކާގެ ޕެންޓަގަނުން ވަނީ ދިފާޢީ ބަޔާނެއް ނެރެ، މި ހާދިސާގެ ސީރިއަސްކަން ކުޑަކުރަން ވަގުތުން މަސައްކަތް ފަށާފައެވެ. އެމެރިކާގެ އަސްކަރިއްޔާއިން ބުނާ ގޮތުގައި އެ އުޅަނދަކީ ކަނޑުގެ އާދައިގެ ސާވޭއެއް ހަދަމުން ދަނިކޮށް މެޝިނަށް ދިމާވި ޓެކްނިކަލް މައްސަލައަކުން ކޮންޓްރޯލް ގެއްލިގެން އޮޅިގެން އީރާނާވީ ފަރާތަށް ދިޔަ އުޅަނދެކެވެ. އަދި އެއީ ބާ މޮޑެލްއެއް ކަމަށާއި، އޭގެ ޒާތުގައި އެއްވެސް ކަހަލަ ސިއްރު ޓެކްނޮލޮޖީއެއް ނުވަތަ ނުރައްކާތެރި ޖާސޫސީ މަޢުލޫމާތެއް އީރާނުގެ އަތްދަށަށް ނުދާނެ ކަމަށް ބުނެ އެމެރިކާއިން ދަނީ ދިފާޢުވަމުންނެވެ.