ހުރިހާ ރައްޔިތުން ރިސޯޓު ހިއްސާދާރުންނަށް ހަދާ މަޝްރޫއު އަންނަ ނޮވެމްބަރު މަހުގެ ތެރޭގައި ރަސްމީކޮށް ފެށުމަށް ސަރުކާރުން ނިންމައިފިއެވެ. މިކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރެއްވީ މިއަދު ބޭއްވި ނޫސްވެރިންގެ ބައްދަލުވުމެއްގައެވެ.

ރައީސް ވިދާޅުވި ގޮތުގައި މި މަޝްރޫއަކީ ރާއްޖޭގެ ފަތުރުވެރިކަމުގެ ދާއިރާއިން ލިބޭ ބޮޑު ނަފާ ސީދާ ގޮތެއްގައި ގައުމުގެ ހުރިހާ ރައްޔިތުންނަށް ފޯރުކޮށްދިނުމަށްޓަކައި ވެވަޑައިގެންފައިވާ މުހިންމު ވައުދުފުޅެކެވެ.

މި މަޝްރޫއުގެ މައިގަނޑު ބޭނުމަކީ ރިސޯޓުތަކުން ލިބޭ ބޭރު ފައިސާ ނުވަތަ ޑޮލަރުގެ އާމްދަނީ، ހިއްސާގެ ފައިދާގެ ގޮތުގައި އާންމު ރައްޔިތުންގެ އެކައުންޓުތަކަށް ސީދާ ޖަމާވަމުންދާނެ ނިޒާމެއް ގާއިމުކުރުމެވެ. މީގެ ސަބަބުން ކޮންމެ ދިވެހި ރައްޔިތަކީވެސް ރާއްޖޭގެ ފަތުރުވެރިކަމުގެ ހިއްސާދާރަކަށް ވެގެންދާނެއެވެ. ސަރުކާރުން ގަބޫލުކުރާ ގޮތުގައި މިއީ ގައުމުގެ އިގްތިސާދީ ފުދުންތެރިކަން އިތުރުވެ، ރައްޔިތުންގެ ޖީބަށް ވަންނަ ފައިސާ އިތުރުވެގެންދާނެ ތާރީހީ ބަދަލެކެވެ.

ނޮވެމްބަރު މަހު މި މަޝްރޫއު ރަސްމީކޮށް ފެށުމަށްޓަކައި ވާންޖެހޭ އެންމެހާ ތައްޔާރީތައް މިހާރު ދަނީ ކުރަމުންނެވެ. މިގޮތުން، މިކަމަށް ހާއްސަކޮށްގެން ކަނޑައަޅާ ރިސޯޓުތަކުގެ ތަފްސީލާއި، ރައްޔިތުންނަށް ހިއްސާ ބަހާނެ އުސޫލުތައް ކުރިއަށް އޮތް ތަނުގައި ސަރުކާރުން ހާމަކުރައްވާނެއެވެ. މި މަޝްރޫއު ވެގެންދާނީ ދިވެހިރާއްޖޭގެ ފަތުރުވެރިކަމުގެ ތާރީހުގައިވެސް ރައްޔިތުންނަށް އެންމެ ބޮޑު މަންފާއެއް ކުރާނެ އެއް މަޝްރޫއަށެވެ.

ސަރުކާރުގެ ކުންފުނިތަކުން ހަދާ 10 ރިސޯޓުން ދިވެހި ކޮންމެ ރައްޔިތަކަށް މަދުވެގެން 400 ޑޮލަރު ލިބޭނެ ކަމަށް ރައީސް ވަނީ މީގެ ކުރިން ވިދާޅުވެފަ އެވެ.