ސަރުކާރުގެ ތިން ވުޒާރާއެއް ހިންގަމުންދިޔަ އިމާރާތްތަކުގައި ހިނގި އަލިފާނުގެ ހާދިސާއާ ގުޅިގެން ކުރީގެ ރައީސް އަބްދުﷲ ޔާމީން އަބްދުލްގައްޔޫމް ދެއްކެވި ވާހަކަފުޅުތަކާ ގުޅިގެން، އެ މައްސަލަ ބަލައި ތަހުގީގުކުރުމަށް ދިވެހި ފުލުހުންގެ ޚިދުމަތަށާއި ނޭޝަނަލް އިންޓެގްރިޓީ ކޮމިޝަން (އެންއައިސީ) އަށް ހުށަހަޅާފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
މި ހާދިސާއާ ގުޅޭގޮތުން އިހުސާން މިރޭ އެކްސްގައި ކުރެއްވި ޕޯސްޓެއް ވިދާޅުވީ، ސަރުކާރުގެ ތިން ވުޒާރާއެއް ހިންގި އިމާރާތްތައް އަނދައިގެން ދިޔަ މައްސަލަ ދިވެހި ފުލުހުންނާއި އެކުވެރި ގައުމުތަކުގެ ކަމާބެހޭ މާހިރުން ގުޅިގެން ވަނީ ފުޅާ ދާއިރާއެއްގައި ތަހުގީގުކޮށްފައެވެ. އެ ތަހުގީގުން ދައްކާފައިވަނީ އަލިފާން ރޯވާން މެދުވެރިވީ ކަރަންޓު ނަރުތަކުގައި ރޯވެގެން ކަމަށާއި، މި މައްސަލައިގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނެ އެއްވެސް ހެއްކެއް ލިބިފައި ނުވާކަމަށް ފުލުހުން ކަށަވަރުކޮށްދީފައިވާ ކަމަށް ވެސް އިހުސާން ވަނީ ވިދާޅުވެފައެވެ.
ނަމަވެސް، 5 ސެޕްޓެމްބަރު 2026 ގައި ކުރީގެ ރައީސް އަބްދުﷲ ޔާމީން ދެއްކެވި ވާހަކަފުޅެއްގައި، އެ އިމާރާތްތަކުގައި އަލިފާން ރޯކޮށްލީ ކަމަށާއި އެކަން ކުރި މީހަކީ ކާކުކަން ވެސް ފުލުހުންނަށް އެނގޭނެ ކަމަށް ވަނީ ވިދާޅުވެފައެވެ. ރައީސް ޔާމީން މިފަދައިން މުތުލަގުކޮށް ވާހަކަފުޅު ދައްކަވާފައި ވާތީ، އެ މައްސަލައިގައި އެމަނިކުފާނަށް އެނގިވަޑައިގަންނަވާ މައުލޫމާތުތައް ސާފުކޮށް، ތަހުގީގުގައި އިތުރަށް ބަލަންޖެހޭ ކަންކަން ބެލުމަށް މިހާރު ވަނީ ފުލުހުންގެ ހިދުމަތުގައި އެދިފައެވެ.
Advertisement
މީގެއިތުރުން، ފުލުހުންނަށް ކުށްވެރިޔާ އެނގިތިބެ ސިއްރުކުރާ ކަމަށް ދޭހަވާ ފަދަ ގޮތަކަށް ކުރީގެ ރައީސުލްޖުމްހޫރިއްޔާ ފުލުހުންގެ މައްޗަށް ކުރެއްވި މި ސީރިއަސް ތުހުމަތު ވަކިން ތަހުގީގުކޮށްދިނުމަށް އެދި، ފުލުހުންގެ މުއައްސަސާގެ ކަންކަން ބަލާ މިނިވަން މުއައްސަސާ ކަމަށްވާ ނޭޝަނަލް އިންޓެގްރިޓީ ކޮމިޝަނަށް ވެސް ވަނީ މައްސަލަ ހުށަހަޅާފައެވެ.
