ޔުކްރޭނުގެ ވެރިރަށް ކީވްގައި އެ ގައުމުގެ އެންމެ ބާރުގަދަ ދެ ސަލާމަތީ އިދާރާގެ ދެމެދުގައި މައްސަލަ ޖެހި، ނުރައްކާތެރި ބަޑީގެ ހަމަލާތަކެއް ބަދަލުކޮށްފިއެވެ. މި ހާދިސާ ހިނގާފައިވަނީ ޔުކްރޭނުގެ ދާޚިލީ ސަލާމަތާބެހޭ އިދާރާ ކަމަށްވާ އެސް.ބީ.ޔޫ އާއި، އަސްކަރީ ޖާސޫސީ އިދާރާ ކަމަށްވާ އެޗް.ޔޫ.އާރްގެ ޚާއްޞަ ފައުޖުތަކުގެ ދެމެދުގައެވެ.

ކީވްގެ މެދުތެރޭގެ މަގުމަތީގައި ހިނގި މި ކުރިމަތިލުމުގައި އެޗް.ޔޫ.އާރް އަށް ނިސްބަތްވާ ތިން އޮފިސަރަކަށް ބަޑީގެ ހަމަލާ އަމާޒުވެ ޒަޚަމްވެފައިވާއިރު، އޭގެ ތެރެއިން އެކެއްގެ ހާލު ވަރަށް ސީރިއަސް ކަމަށް ރިޕޯޓްތައް ބުނެއެވެ.

މި ނުރައްކާތެރި ހަމަލާ ބަދަލުކުރަން މެދުވެރިވީ ރަޝިޔާއާ ދެކޮޅަށް ހަނގުރާމަކުރާ "ރަޝިޔަން ވޮލަންޓިއާ ކޯޕްސް" (އާރް.ވީ.ސީ) ގެ ޑެޕިއުޓީ ކޮމާންޑަރު ސްޓެޕަން ކަޕްލޫނޯވް، އެސް.ބީ.ޔޫ އިން ހައްޔަރުކުރުމާއި ގުޅިގެންނެވެ. އެސް.ބީ.ޔޫ އިން އޭނާ ދިރިއުޅޭ އެޕާޓްމަންޓް ބަލައި ފާސްކުރަން އުޅުމުގެ ތެރޭގައި، އެޗް.ޔޫ.އާރް ގެ އޮފިސަރުން ވަނީ އެތަނަށް ގޮސް އެ އޮޕަރޭޝަނަށް ހުރަސްއަޅާފައެވެ. އެސް.ބީ.ޔޫ އިން ތުހުމަތުކުރާ ގޮތުގައި އެމީހުން މަސައްކަތްކުރީ ރަޝިޔާގެ ޖާސޫސީ އިދާރާއަކުން ރޭވި ރޭވުމެއް ހުއްޓުވުމަށެވެ. ނަމަވެސް އެޗް.ޔޫ.އާރް އިން ބުނީ އެސް.ބީ.ޔޫ އިން މަސައްކަތްކުރީ ކަޕްލޫނޯވް ރަހީނުކޮށް، އޭނާއަކީ ރަޝިޔާގެ ޖާސޫސެއް ކަމަށް އެއްބަސްވުމަށް މަޖުބޫރުކުރުވުމަށެވެ.

މި ހާދިސާއާއި ގުޅިގެން ޔުކްރޭނުގެ ރައީސް ވޮލޮޑިމީރް ޒެލެންސްކީ ވަނީ މިއީ ހަނގުރާމައިގެ ވަގުތެއްގައި ގައުމުގެ އަގުވެއްޓުން ކަމަށް ސިފަކުރައްވައި މިކަން ހަރުކަށި އިބާރާތުން ކުށްވެރިކުރައްވާފައެވެ. އަދި އެސް.ބީ.ޔޫ ގެ ސްޓޭޓް ސީކްރެޓްސް ޕްރޮޓެކްޝަން ޑިޕާޓްމަންޓްގެ ވެރިޔާ އޮލެގް ޚްރާމޯވް ވަގުތުން މަގާމުން ވަކިކުރައްވައި، މިކަން ބެލުމަށް މިނިވަން ތަޙުޤީޤެއް ވަނީ ފަށާފައެވެ.