މާލޭގެ މަގުތަކުގެ ކަންކަންމަތީގައި ގަވާއިދާ ހިލާފަށް ވެހިކަލް ޕާކުކުރުން ހުއްޓުވުމުގެ ގޮތުން، ޕާކުކުރުން މަނާކަން އަންގައިދޭ ނިޝާންތައް ކުރެހުމުގެ އަމަލީ މަސައްކަތް ސަރުކާރުން ފަށައިފިއެވެ. ސިޓީ ކައުންސިލްގެ ވެބްސައިޓުގައި ބުނެފައިވަނީ، މިއީ މާލޭގެ މަގުތަކުގެ ކަންކަންމަތީގައި ޕާކުކުރުމުގެ ސަބަބުން ދިމާވާ ޓްރެފިކް ތޮއްޖެހުމުގެ މައްސަލައަށް ހައްލެއް ހޯދައިދިނުމުގެ ގޮތުން ނިންމާފައިވާ ނިންމުމާ އެއްގޮތަށް ފެށި މަސައްކަތެއް ކަމަށެވެ.
މި މަސައްކަތުގެ ފުރަތަމަ މަރުހަލާގެ ދަށުން މ. ފުލޫނިޔާ މަގާ ގުޅިފައިވާ ގޯޅިތަކުގެ ކަންމަތިތަކުގައި ޕާކުކުރުން މަނާ ސަރަހައްދުތައް ފާހަގަކޮށް، އެއީ ޕާކުކުރުން މަނާ ތަންތަންކަން އަންގައިދިނުމުގެ ގޮތުން ވަނީ ރީނދޫ ކުލައިގެ ދެ ރޮނގު ދަމާފައެވެ.
މާލޭގެ މޭޔަރު އާދަމް އާޒިމް ވިދާޅުވީ މާލޭގެ މަގުތަކުގެ ކަންކަންމަތީގައި ޕާކުކުރުމުގެ ސަބަބުން މަގުތައް ވަރަށް ބޮޑަށް ތޮއްޖެހެމުންދާ ކަމަށާއި، މިގޮތަށް ރީނދޫ ރޮނގު ދަމައި ފާހަގަކުރުމުން އެ ތަންތަނުގައި ޕާކުކުރުމަކީ މަނާ ކަމެއްކަން ސާފުވެގެންދާނެ ކަމަށެވެ.
Advertisement
މާލެ ސިޓީ ކައުންސިލުން ފާހަގަކުރި ގޮތުގައި މަގުތަކުގެ ކަންކަންމަތީގައި ވެހިކަލްތައް ޕާކުކުރުމަކީ ޓްރެފިކް ތޮއްޖެހުމުގެ އިތުރުން ނުރައްކާތެރި އެކްސިޑެންޓުތައް ހިނގުމަށް މެދުވެރިވާ މުހިންމު ސަބަބެކެވެ. އެހެންކަމުން މިއީ މާލޭގެ މަގުތަކަކީ ހިނގާބިނގާވެއުޅޭ މީހުންނަށާއި ދުއްވާ އެއްޗެއްސަށް ފަސޭހަ އަދި އަމާން ތަނަކަށް ހެދުމަށް ކުރެވޭ މުހިންމު މަސައްކަތެއް ކަމަށާއި، ކުރިއަށް އޮތް ތަނުގައިވެސް މާލޭގެ އެކި ސަރަހައްދުތަކުގައި މިގޮތަށް ރޮނގު ދެމުމުގެ މަސައްކަތް ކުރިއަށް ގެންދިއުމަށް ހަމަޖެހިފައިވާ ކަމަށް ސިޓީ ކައުންސިލުން ވަނީ ބުންނެފައެވެ.
