ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ފޯރުކޮށްދެމުންދާ އިޖްތިމާއީ ރައްކާތެރިކަމުގެ އެހީތައް އިތުރަށް ހަރުދަނާކޮށް، އެންމެ އެކަށީގެންވާ ގޮތުގައި ރައްޔިތުންނަށް ފޯރުކޮށްދިނުމުގެ ގޮތުން، އެ އެޖެންސީގެ ދަފްތަރުގައި ހިމެނޭ ފަރާތްތަކުން އަލުން ރަޖިސްޓަރީވުމަށް (ރީ-ރަޖިސްޓަރީވުމަށް) ހުޅުވާލައިފިއެވެ.

އެންސްޕާއިން މައުލޫމާތު ދެއްވާގޮތުގައި، ގަވާއިދު ނަންބަރު 2016/R-22 (އިޖްތިމާއީ ރައްކާތެރިކަމުގެ އާންމު ގަވާއިދު) ގެ 8 ވަނަ މާއްދާގެ (ރ) ގައިވާ ގޮތުން، އެހީ ހައްގުވާ ފަރާތްތަކަށް އެހީ ދެވޭނީ މީލާދީ 2 އަހަރު ދުވަހުގެ މުއްދަތަށެވެ. އެހެންކަމުން، 2024 ވަނަ އަހަރުގެ ނޮވެންބަރު މަހުގެ ނިޔަލަށް އެހީގެ ދަފްތަރުގައި ރަޖިސްޓަރީވެ، ތިރީގައިވާ އެހީތައް ލިބެމުންދާ ފަރާތްތަކުގެ ތެރެއިން އެހީ މެދުކެނޑުމެއްނެތި ކުރިއަށް ގެންދަން ބޭނުންވާ ފަރާތްތަކުން 30 ނޮވެންބަރު 2026 ގެ ކުރިން އަލުން ފޯމު ހުށަހަޅަންޖެހެއެވެ.

ރީ-ރަޖިސްޓަރީވާންޖެހޭ އެހީގެ މައިގަނޑު ބައިތައް:

1. ފަގީރު ހާލަތުގައި ދިރިއުޅޭ އެކަނި ދަރިން ބަލަހައްޓާ މައިން ނުވަތަ ބަފައިންނަށް ދެވޭ މާލީ އެހީ
2. ފަގީރު ހާލަތުގައި ދިރިއުޅޭ މައިންބަފައިންގެ އެހީތެރިކަމެއް ނެތި އެހެން މީހަކު ބަލަހައްޓާ ކުދިންނަށާއި، އެ ކުދިން ބަލަހައްޓާ ފަރާތްތަކަށް ދެވޭ މާލީ އެހީ
3. ފަގީރު ހާލަތުގައި ދިރިއުޅޭ ފަރާތްތަކުން ކާބޯތަކެތި ގަތުމަށް ދެވޭ މާލީ އެހީ

ރީ-ރަޖިސްޓަރީވުމަށްޓަކައި one.gov.mv ޕޯޓަލް މެދުވެރިކޮށް ފޯމު ހުށަހެޅޭނެއެވެ. އެންސްޕާއިން ބުނެފައިވަނީ ކަނޑައެޅިފައިވާ މުއްދަތުގެ ކުރިން ފޯމު ހުށަނާޅާ ފަރާތްތަކަށް، އެހީ ދިނުމުގައި ބަލާ މިންގަނޑުތަކަށް ރިއާޔަތްކުރުމަށްފަހު އެހީ ކުރިއަށް ގެންދެވޭނީ އައު ފޯމެއް ހުށަހެޅުމުން ކަމަށެވެ.

މިކަމާ ގުޅޭ އިތުރު މައުލޫމާތު ސާފުކުރުމަށް، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:00 އިން ރޭގަނޑު 10:00 އަށް އެންސްޕާގެ ހޮޓްލައިން 1402 އަށް ގުޅުއްވުމަށް އެ އެޖެންސީން އެދެއެވެ.