ކަންޓްރީ މިއުޒިކްގެ ދާއިރާގައި ދުނިޔޭގެ މަގުބޫލުކަން ހޯދާފައިވާ އެމެރިކާގެ މަޝްހޫރު ލަވަކިޔުންތެރިޔާ އަދި ޅެންވެރިޔާ ޑޮލީ ޕާޓަން، ކެންސަރު ބައްޔަށް ފަރުވާ ހޯދަމުން ދަނިކޮށް އުމުރުން 80 އަހަރުގައި މަރުވެއްޖެއެވެ.

އޭނާ މަރުވީ ނެޝްވިލްގެ ވެންޑަބިލްޓް-އިންގްރަމް ކެންސަރ ސެންޓަރުގައި އާއިލާގެ ގާތް މީހުންގެ ހާޒިރުގައެވެ. މިކަން ހާމަކޮށް އޭނާގެ ޕަބްލިސިސްޓް މާސެލް ޕަރިސޯ ނެރުނު ބަޔާނެއްގައި ބުނެފައިވަނީ، ކެންސަރު ބައްޔާ ދެކޮޅަށް ކުރު މުއްދަތަކަށް ކުރި ހިތްވަރުގަދަ ހަނގުރާމައަކަށްފަހު ޑޮލީ ދުނިޔެ ދޫކޮށްފައިވާ ކަމަށެވެ.

ޓެނެސީގެ ފަގީރު އާއިލާއަކަށް އުފަންވި 12 ކުދިންގެ ތެރެއިން އެއް ކުއްޖެއް ކަމަށްވާ ޑޮލީ ޕާޓަން، މިއުޒިކީ ދާއިރާގައި މަޝްހޫރުކަން ހޯދީ އޭނާގެ ހިތްގައިމު އަޑާއި، ފާހަގަކޮށްލެވޭ ލަވަ ލިޔުމުގެ ހުނަރުގެ އިތުރުން ތަފާތު ސްޓައިލްތަކުގެ ސަބަބުންނެވެ. އޭނާ ލިޔެ ކިޔާފައިވާ މަޝްހޫރު ލަވަތަކުގެ ތެރޭގައި "ޖޮލީން"، "ކޯޓް އޮފް މެނީ ކަލާސް"، އަދި "އައި ވިލް އޯލްވޭސް ލަވް ޔޫ"، ހިމެނެއެވެ. މި ލަވަތަކުގެ 100 މިލިއަނަށް ވުރެ ގިނަ ރެކޯޑިން ދުނިޔޭގެ އެކި ކަންކޮޅުތަކުގައި ވިކިފައިވާއިރު، އޮންލައިންކޮށް އެއް ބިލިއަނަށް ވުރެ ގިނަ ފަހަރު ވަނީ ސްޓްރީމްކޮށްފައެވެ.

އުމުރުން އެންމެ 10 އަހަރުގައި މިއުޒިކީ ދާއިރާއަށް ތައާރަފުވި ޑޮލީ ވަނީ ގްރެމީ އެވޯޑަށް 55 ފަހަރު ނޮމިނޭޓްވެ، 10 އެވޯޑު ކާމިޔާބުކޮށްފައެވެ. މިއީ ގްރެމީގެ ތާރީޚުގައި ވެސް އަންހެން ފަންނާނަކު ތިންވަނައަށް އެންމެ ގިނަ ނޮމިނޭޝަން ހޯދި ފަހަރެވެ. ލަވަކިޔުމުގެ އިތުރުން ފިލްމީ ދާއިރާގައި ވެސް ހަރަކާތްތެރިވި ޑޮލީ ވަނީ "9 ޓު 5" އަދި "ސްޓީލް މެގްނޯލިއާސް" ފަދަ ކާމިޔާބު ފިލްމުތަކުން ފެނިގެން ގޮސްފައެވެ.

މިއުޒިކީ ކާމިޔާބީތަކުގެ އިތުރުން ޑޮލީ ފާހަގަކުރެވިފައިވަނީ ދީލަތި އެހީތެރިއެއްގެ ގޮތުގައެވެ. އެގޮތުން ކުޑަކުދިންގެ މެދުގައި ފޮތް ކިޔުމުގެ އާދަ އަށަގެންނެވުމަށް "އިމޭޖިނޭޝަން ލައިބްރަރީ" ގެ ނަމުގައި ޖަމިއްޔާއެއް އުފައްދައި، ކުދިންނަށް ހިލޭ ފޮތް ފޯރުކޮށްދިނުމުގެ އިތުރުން، އެކި ކާރިސާތަކުގައި ހާލުގައި ޖެހޭ މީހުންނަށް އެހީވުމަށް އޭނާ ވަނީ ގިނަ މަސައްކަތްތަކެއް ކޮށްފައެވެ.

އޭނާގެ ފިރިމީހާ ކާލް ޑީން ވަނީ 2025 ވަނަ އަހަރު އުމުރުން 82 އަހަރުގައި މަރުވެފައެވެ. ޑޮލީ ޕާޓަން ދުނިޔެ ދޫކުރުމާ ގުޅިގެން މުޅި ދުނިޔޭގެ އެކި ކަންކޮޅުތަކުން އޭނާގެ ފޭނުންނާއި މިއުޒިކީ ފަންނާނުން ދަނީ ހިތާމަ ފާޅުކުރަމުންނެވެ.