ރާއްޖޭގެ އުމްރާނީ ތަރައްގީއާއި ދަތުރުފަތުރުގެ ދާއިރާގައި އެންމެ އިސް ދައުރެއް އަދާކުރާ ސަރުކާރު ހިއްސާވާ މައި ކުންފުނި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން 2025 ވަނަ އަހަރުގެ އަހަރީ ރިޕޯޓް އާންމުކޮށްފިއެވެ. މި ރިޕޯޓުން ދައްކާ ގޮތުގައި ޓެކުހަށް ކެނޑުމަށްފަހު އެ ކުންފުންޏަށް ސާފު ފައިދާގެ ގޮތުގައި 84.83 މިލިއަން ރުފިޔާ ލިބިފައިވެއެވެ. މިއީ 2024 ވަނަ އަހަރާ އަޅާބަލާއިރު 88 އިންސައްތައިގެ ބޮޑު ކުރިއެރުމެކެވެ.

2025 ވަނަ އަހަރުގެ ފެށުން އެމްޓީސީސީއަށް ގޮންޖެހުންތަކަކާ ކުރިމަތިލާން ޖެހުނު ނަމަވެސް، މުޅި އަހަރުގެ ނަތީޖާ ދައްކަނީ ކުންފުނީގެ ހިންގުން ވަރުގަދަކޮށް މާލީ ގޮތުން ހޯދި ބޮޑު ކުރިއެރުމެވެ. އަހަރުގެ ފުރަތަމަ ކުއާޓަރުގައި އާމްދަނީއަށްވުރެ ހަރަދުތައް ބޮޑުވުމުގެ ސަބަބުން ގާތްގަނޑަކަށް 19.7 މިލިއަން ރުފިޔާގެ ގެއްލުމަކާ ކުރިމަތިލާން ޖެހުނު ނަމަވެސް، ޖެހިގެން އައި ކުއާޓަރުތަކުގައި ހިންގުން ހަރުދަނާކޮށް، އާމްދަނީއާއި ފައިދާ ވަނީ ބޮޑުތަނުން އިތުރުކޮށްފައެވެ.

2024 ވަނަ އަހަރު އެމްޓީސީސީއަށް ލިބުނު އާމްދަނީ 2.1 އާއި 2.16 ބިލިއަން ރުފިޔާއާ ދެމެދުގައި ހުރިއިރު، ސާފު ފައިދާއަކީ ގާތްގަނޑަކަށް 45 މިލިއަން ރުފިޔާއެވެ. އެ އަހަރު މަޝްރޫއުތަކުން ލިބެންޖެހޭ ފައިސާ ލަސްވުމާއި، އިމާރާތްކުރުމާއި ބިން ހިއްކުމުގެ މަސައްކަތްތައް މަދުވުމުގެ ސަބަބުން ފައިދާ ދަށްވި ނަމަވެސް، 2025 ވަނަ އަހަރު ކުންފުނީގެ މައިގަނޑު ހުރިހާ ދާއިރާއަކުން ވެސް ވަނީ ފާހަގަކޮށްލެވޭ ކުރިއެރުމެއް ހޯދާފައެވެ. މީގެ ތެރޭގައި އިމާރާތްކުރުން، ބިން ހިއްކުން، ބަނދަރު ހެދުން، ވިޔަފާރި އަދި އާރުޓީއެލް ފެރީ އާއި ބަހުގެ ހިދުމަތް ހިމެނެއެވެ.

1980 ވަނަ އަހަރު ރާއްޖޭގެ ފުރަތަމަ ޕަބްލިކް ކުންފުނީގެ ގޮތުގައި އުފެދުނު އެމްޓީސީސީއަކީ "ރައްޔިތުންގެ ކުންފުނި" އެއްގެ ގޮތުގައި ގައުމީ ތަރައްގީގައި އަގުހުރި ހިދުމަތްތަކެއް ފޯރުކޮށްދެމުން އަންނަ ކުންފުންޏެކެވެ. ރާއްޖޭގެ ރަށްރަށުގެ ބަނދަރު ހެދުމާއި، ގޮނޑުދޮށް ހިމާޔަތްކުރުމާއި، ބިން ހިއްކުމުގެ އިތުރުން މުޅި ރާއްޖެ ދަތުރުފަތުރުގެ ވިއުގައަކުން ގުޅާލުމުގައި އެމްޓީސީސީން އަދާކުރަނީ މުހިންމު ދައުރެކެވެ. މިއީ ފަތުރުވެރިކަމާއި، މަސްވެރިކަމާއި، ވިޔަފާރީގެ އިތުރުން ރަށްރަށުގެ އިޖުތިމާއީ ދިރިއުޅުމަށް ބޮޑެތި ލުއިފަސޭހަތަކެއް ގެނެސްދޭ ކަންކަމެވެ.

އެމްޓީސީސީގެ 2025 ވަނަ އަހަރުގެ އަހަރީ ރިޕޯޓާއި އިއުލާނު މިހާރު އެ ކުންފުނީގެ ރަސްމީ ޕްލެޓްފޯމްތަކުން ބައްލަވައިލެއްވޭނެއެވެ. މި ރިޕޯޓުގެ ބޭރުގަނޑު ފަރުމާކޮށްފައިވަނީ ކުންފުނީގެ ކަނޑު އުޅަނދުފަހަރާއި އުމްރާނީ ތަރައްގީގެ މަސައްކަތްތައް ރަމްޒުކޮށްދޭ ގޮތަށެވެ.

ހިއްސާދާރުންނާއި ކަމާބެހޭ ފަރާތްތަކަށް މި ރިޕޯޓް މެދުވެރިކޮށް ކުންފުނީގެ މާލީ ހިސާބުތަކާއި، ނިމުނު އަދި އަލަށް ފެށުނު މަޝްރޫއުތަކުގެ ތަފުސީލާއި، ކުންފުނީގެ ކުރިމަގުގެ ލަނޑުދަނޑިތައް ބައްލަވައިލެއްވޭނެއެވެ. 2025 ވަނަ އަހަރު ހޯދި މި ކާމިޔާބީއާއެކު، ސަރުކާރުގެ ތަރައްގީގެ މަޝްރޫއުތައް ކުރިއަށް ގެންދިއުމުގައި އެމްޓީސީސީގެ ދައުރު އިތުރަށް ވަރުގަދަވެގެންދާނެ ކަމަށް ބެލެވެއެވެ.