ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ދޫކުރާ ބޯހިޔާވަހިކަމުގެ ސްކީމަށް ފޯމު ހުށަހަޅާފައިވާ ފަރާތްތަކަށް ޕޮއިންޓު ދިނުމާއި ފޯމުތައް ބަލައިފާސްކުރުމުގެ މަސައްކަތް ކުރިއަށްދާނީ ބޭރުގެ އެއްވެސް ނުފޫޒެއް ނުފޯރުވޭނެ ފަދަ ޑިޖިޓައިޒްޑް އަދި އޮޓޮމޭޓެޑް ނިޒާމެއްގެ ތެރެއިން ކަމަށް ބިނާރާއި ގެދޮރުވެރިކަމާއި އުމްރާނީ ތަރައްގީއާ ބެހޭ ވުޒާރާގެ ސްޓޭޓް މިނިސްޓަރު އަހްމަދު ނާޒިމް މުހައްމަދު ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމްގެ "ރާއްޖެ މިއަދު" ޕްރޮގުރާމުގައި ވާހަކަދައްކަވަމުން ސްޓޭޓް މިނިސްޓަރު ނާޒިމް ވިދާޅުވީ، ސްކީމަށް ފޯމު ހުށަހަޅާފައިވާ ފަރާތްތަކަށް މާކްސް ދިނުމާއި، ވެރިފިކޭޝަންގެ އެންމެހާ މަރުހަލާތައް ވެސް ކުރިއަށްދާނީ މި ޑިޖިޓަލައިޒްޑް ސިސްޓަމްގެ ތެރެއިން ކަމަށެވެ. އަދި މިއީ މިހާތަނަށް އެންމެ ބޮޑަށް ހުޅުވާލެވިގެން، ދެފުށް ފެންނަ ގޮތަށް ކުރިއަށްގެންދެވޭ މިފަދަ މަސައްކަތް ކަމަށް ވެސް އޭނާ ފާހަގަކުރެއްވިއެވެ.

ނާޒިމް ވިދާޅުވި ގޮތުގައި، މި ސިސްޓަމްގެ ތެރެއިން ކަންކަން ކުރިއަށްދާއިރު ޕޯޓަލުގައި ހިނގާ ކޮންމެ ހަރަކާތެއްގެ މައުލޫމާތު ރެކޯޑުވަމުންދާނެއެވެ. އެހެންކަމުން، އެއްވެސް ކަމަކާ މެދު ޝައްކު އުފެދޭ ހާލަތެއް މެދުވެރިވެއްޖެނަމަ ވަގުތުން ވަގުތަށް އެކަމެއް ބަލައި ޗެކްކުރުމުގެ ފުރުސަތު އޮންނާނެއެވެ.

ފޯމުތަކުގައި ހިމަނާފައިވާ މައުލޫމާތުތަކުގެ ސައްހަކަން ކަށަވަރުކުރުމަށްޓަކައި، ގޯތިގެދޮރާއި ބިންވެރިކަމާއި މިލްކުވެރިކަމުގެ އިތުރުން، ތަޢުލީމާއި ވަޒީފާއާ ގުޅޭ މައުލޫމާތުތައް ކަމާގުޅުންހުރި ރަސްމީ އިދާރާތަކުން ހޯދައި، ހާއްސަ ޑޭޓާބޭސްއެއް ވަނީ އެކުލަވާލާފައެވެ. ބޯހިޔާވަހިކަމުގެ މި ސްކީމާ ގުޅޭ އެންމެހާ ކަންކަން ކުރިއަށް ގެންދަނީ މި ޑޭޓާބޭސްއާއި އޮންލައިން ޕޯޓަލް މެދުވެރިކޮށެވެ.

ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ މައިގަނޑު މަގްސަދަކީ މުޖުތަމައުގައި އެންމެ ބޮޑަށް ބޯހިޔާވަހިކަމަށް ބޭނުންޖެހިފައިވާ ފަރާތްތަކަށް އެ ފުރުސަތު ފަހިކޮށްދިނުމެވެ.

މި ސްކީމަށް ފޯމު ހުށައެޅުމުގެ މަރުހަލާ މިހާރު ނިމިފައިވާއިރު، މިހާރު ކުރިއަށްދަނީ މައުލޫމާތުގެ ސައްހަކަން ދެނެގަތުމަށް ކުރެވޭ ވެރިފިކޭޝަން މަރުހަލާއެވެ. ފޯމުތަކުގެ ވެރިފިކޭޝަން މަރުހަލާތަކުގެ އަދާހަމަ (އަޕްޑޭޓް) ޕޯޓަލް މެދުވެރިކޮށް ފެންނަން ހުންނާނެ ކަމަށާއި، މި ސްކީމާ ގުޅިގެން ރައްޔިތުންނަށް އަންގަންޖެހޭ އެންމެހާ މައުލޫމާތުތަކާއި ކުރެވޭ އެންމެހާ މުޢާމަލާތްތައް ވެސް ކުރިއަށްދާނީ ބޯހިޔާވަހިކަން ޕޯޓަލް މެދުވެރިކޮށް ކަމަށް މިނިސްޓްރީން ހާމަކުރެއެވެ.