އަންހެން ކުދިންނަށް ޖިންސީ ގޯނާކުރުމުގެ 14 މައްސަލައެއް ޖުލައި މަހުގައި ރިޕޯޓް ކޮށްފައިވާ ކަން އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ވިދާޅުވެއްޖެއެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 35 ވަނަ ނަންބަރުގެ (ހ) ގައި ޢާއިލާގެ ފަރާތުންނާއި ޖަމާޢަތުގެ ފަރާތުންނާއި ދައުލަތުގެ ފަރާތުން ޚާއްޞަ އެހީތެރިކަމާއި ޚާއްޞަ ރައްކާތެރިކަން ލިބުމަކީ ކުޑަކުދީންނާއި ޅަފުރައިގެ ކުދީންނަށް ލިބިގެންވާ ޙައްޤެއްކަމާއި އަދި ކުޑަކުދީންނާއި ޅަފުރައިގެ ކުދީންނަށް އެއްވެސް ގޮތަކުން ހާނީއްކަކޮށް، ޖިންސީގޮތުން އަނިޔާކޮށް އެއްވެސް ގޮތަކުން ތަފާތުކޮށް އެކަށީގެންނުވާ އިޤްތިޞާދީ، އިޖްތިމާޢީ ކަންތައްތަކުގައި ބައިވެރިކޮށް އެ މީހުންގެ ފުށުން ނާޖާއިޒް މަންފާތައް ޙާޞިލްކުރުމަށް ހަމަ އެކަކުވެސް މަސައްކަތްކޮށްގެނެއް ނުވާނެ ކަމަށް ބަޔާންކޮށްފައިވެއެވެ.
އަދި ހަަމަ އެހެންމެ، ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުސޫލުތަކަކަށް ޢަމަލުކުރުމުގެ ޤާނޫނު) ގައި މީހަކު، ކުޑަކުއްޖެއްގެ ހަށިގަނޑުގައި، ޖިންސީ ނިޔަތެއްއޮވެގެން ގަސްތުގައި އަތްލައިފިކަމަށްވާނަމަ، އެކުރަނީ ކުށެއް ކަމުގައި ކަނޑއަޅާފައިވެއެވެ. އަދި އެ ކުށް ސާބިތުވެއްޖެނަމަ އެ މީހެއްގެ އަދަބަކީ 10 އަހަރާއި 14 އަހަރާ ދެމެދުގެ މުއްދަތަކަށް ޖަލަށްލުން ކަމުގައިވެސް ޤާނޫނުގައި ކަނޑައަޅާފައިވެއެވެ.
Advertisement
އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން އާންމުކުރި ތަފާސް ހިސާބުތަކުގައިވާ ގޮތުން، ކުޑަކުދިންނާ ގުޅުންހުރި 88 މައްސަލައެއް ޖުލައި މަހު ރިޕޯޓްކޮށްފައިވާއިރު އޭގެ ތެރެއިން 54 މައްސަލައަކީ އަންހެން ކުދިންނަށް ކުރާ އެކި އެކި އަނިޔާތަކާގުޅޭ މައްސަލަތަކެވެ.
އެގޮތުން، އެންމެ ގިނައިން ރިޕޯޓުކޮށްފައިވަނީ އިހުމާލުވުމުގެ މައްސަލައެވެ. އިހުމާލުވުމުގެ 22 މައްސަލައެއް ރިޕޯޓުކޮށްފައިވާއިރު، އޭގެ ތެރޭގައި އަންހެން ކުދިންނާ ގުޅޭ 16 މައްސަލައެއް ހިމެނެއެވެ.
ދެވަނައަށް އެންމެ ގިނައިން ރިޕޯޓުކޮށްފައިވާ މައްސަލައަކީ، ޖިންސީ ގޯނާ ކުރުމުގެ މައްސަލައެވެ. އެގޮތުން، ޖިންސީ ގޯނާކުރުމުގެ 17 މައްސަލައެއް ރިޕޯޓުކޮށްފައިވާއިރު، އޭގެ ތެރޭގައި އަންހެން ކުދިންނާ ގުޅޭ 14 މައްސަލަ ހިމެނެއެވެ.
އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން އާންމުކޮށްފައިވާ މައުލޫމާތުތަކަށް ބަލާއިރު މި އަހަރުގެ ޖުލައި މަހުގެ ނިޔަލަށް އަންހެން ކުދިންނަށް ޖިންސީ ގޯނާ ކުރުމުގެ 78 މައްސަލައެއް ރިޕޯޓު ކޮށްފައިވެއެވެ.
