ޖުލައި މަހު ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 88 މައްސަލަ ރިޕޯޓުކޮށްފައިވާ ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.
އެވުޒާރާއިން ނެރުނު ތަފާސް ހިސާބުތަކުން ދައްކާގޮތުގައި ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 88 މައްސަލައިގެ ތެރެއިން އެންމެ ގިނައިން ރިޕޯޓުކޮށްފައިވަނީ އިހުމާލުވުމުގެ މައްސަލައެވެ.
އެގޮތުން އިހުމާލުވުމުގެ 22 މައްސަލައެއް ރިޕޯޓުކޮށްފައިވާއިރު، އޭގެ ތެރޭގައި އަންހެން ކުދިންނާ ގުޅޭ 16 މައްސަލައަކާއި، ފިރިހެން ކުދިންނާ ގުޅޭ 6 މައްސަލައެއް ހިމެނެއެވެ.
Advertisement
ދެވަނައަށް އެންމެ ގިނައިން ރިޕޯޓުކޮށްފައިވާ މައްސަލައަކީ، ޖިންސީ ގޯނާ ކުރުމުގެ މައްސަލައެވެ. އެގޮތުން، ޖިންސީ ގޯނާކުރުމުގެ 17 މައްސަލައެއް ރިޕޯޓުކޮށްފައިވާއިރު، އޭގެ ތެރޭގައި އަންހެން ކުދިންނާ ގުޅޭ 14 މައްސަލައަކާއި، ފިރިހެން ކުދިންނާ ގުޅޭ 3 މައްސަލައެއް ހިމެނެއެވެ.
މީގެ އިތުރުން ގެވެށި އަނިޔާގެ އަމަލެއް ކުރާތަން ކުއްޖަކަށް ފެނުމުގެ 14 މައްސަލައަކާއި، ނަފްސާނީ އަނިޔާގެ 9 މައްސަލައަކާއި، ޖިސްމާނީ އަނިޔާގެ 7 މައްސަލައަކާއި، ބްލެކްމެއިލް ކުރުމުގެ 4 މައްސަލައަކާއި، ބުލީކުރުމުގެ 4 މައްސަލައެއް ރިޕޯޓްކޮށްފައިވެއެވެ. އަދި ފުރައްސާރައިގެ 2 މައްސަލައާއި، ކުޑަކުދިންގެ ނާޖައިޒު ފައިދާ ނެގުމުގެ 2 މައްސަލައާއި، އިންޓަރނެޓް މެދުވެރިކޮށް ކުޑަކުދިންގެ ނާޖައިޒު ފައިދާ ނެގުމުގެ މައްސަލައަކާއި، ޖިންސީގޮތުން ކުޑަކުދިންގެ ނާޖައިޒު ފައިދާ ނެގުމުގެ މައްސަލައަކާއި، އިންޓަރނެޓް މެދުވެރިކޮށް ކުޑަކުދިން ގްރޫމްކުރުމުގެ މައްސަލައަކާއި، އިންޓަރނެޓް މެދުވެރިކޮށް ބުލީ ކުރުމުގެ މައްސަލައަކާއި އަދި އެހެނިހެން 3 މައްސަލައެއް ރިޕޯޓްކޮށްފައިވެއެވެ.
ވަކި ޖިންސަކަށް ވީތީ ކުރާ އަނިޔާއާއި ގެވެށި އަނިޔާގެ މައްސަލަތަކަށް ބަލާއިރު ޖުމްލަ 54 މައްސަލައެއް ވަނީ އެވުޒާރާއަށް ހުށަހަޅާފައެވެ. މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ، ޖިސްމާނީ އަނިޔާކުރުމުގެ މައްސަލަތަކެވެ. އެގޮތުން ޖިސްމާނީ އަނިޔާކުރުމުގެ 32 މައްސަލައެއް ރިޕޯޓްކޮށްފައިވާއިރު އޭގެ ތެރޭގައި އަންހެނުންނާއި ގުޅޭ 27 މައްސަލައަކާއި، ފިރިހެނުންނާއި ގުޅޭ 5 މައްސަލައެއް ހިމެނެއެވެ.
ޢާއިލީ މައްސަލަތަކަށް ބަލާއިރު، ޖުމްލަ 26 މައްސަލައެއް ވަނީ އެވުޒާރާއަށް ހުށަހަޅާފައެވެ. އަދި އަޅައިލުމާއި އެހީތެރިކަން ފޯރުކޮށްދިނުމާއި ގުޅޭ 14 މައްސަލަ ހުށަހަޅާފައިވެއެވެ.
ވުޒާރާގެ ހެލްޕްލައިނަށް ލިބިފައިވާ ކޯލުތަކުގެ އަދަދަށް ބަލާއިރު ޖުލައި މަހު އެ ވުޒާރާގެ ހެލްޕްލައިންއަށް ޖުމްލަ 2463 ކޯލު ލިބިފައިވާ ކަމަށް އެވުޒާރާއިން މައުލޫމާތުދެއްވައެވެ. އޭގެތެރެއިން 112 ކޯލަކީ ކުޑަކުދިންގެ ފަރާތުން ލިބިފައިވާ ކޯލުތައްކަމަށް އެ ވުޒާރާއިން ވިދާޅުވެއެވެ.
