ރޫސީ ވިލާތުން ދިވެހި ރާއްޖެއަށް އަންނަ ފަތުރުވެރިންގެ އަދަދު އިތުރުކޮށް ވައިގެ އުދުހުންތަކުގެ ވިއުގަ ފުޅާކޮށް ހަރުދަނާ ކުރުމުގެ އަމާޒުގައި، އޮގަސްޓު މަހު 17 އިން 21އަށް ރޫސީވިލާތުގެ ވެރި ރަށް، މޮސްކޯ އަދި ވިޔަފާރީގެ މަރުކަޒު، ޕިޓާރސްބާގަށް ކުރާ ދަތުރުގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން ބައިވެރިވެއްޖެއެވެ.
މި ދަތުރުގައި ބައިވެރިވާ ޑެލިގޭޝަނުގައި މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަން، ވިޒިޓް މޯލްޑިވްސް ކޯޕަރޭޝަން، އެމްއޭސީއެލް، މޯލްޑިވިއަން، ރިސޯޓް ލައިފް ޓްރެވަލް، އިން ޓުއާ މޯލްޑިވްސް އަދި ފަތުރުވެރިކަމުގެ ދާއިރާގެ އަމިއްލަ އެހެނިހެން ކުންފުނިތަކުގެ މަންދޫބުން ހިމެނެއެވެ.
ރޫސީވިލާތަކީ ދިވެހި ރާއްޖެއަށް އެންމެ މުހިއްމު ފަތުރުވެރިކަމުގެ މާކެޓަކަށް ވުމާއެކު މި ދަތުރުގެ މައިގަނޑުު މަގުސަދަކީ މި މާކެޓު އިތުރަށް ފުޅާކުރުމެވެ.
Advertisement
އެގޮތުން، މޮސްކޯ އަދި ސެއިންޓް ޕީޓާސްބާރގުގެ ސަރުކާރުގެ އިދާރާތަކާއި، އެއާލައިންތަކާ، ޓުއާ އޮޕަރޭޓަރުންގެ އިތުރުން ޓްރެވަލް ބައިވެރިންނާ މަންދޫބުންނަށް ބައްދަލުކުރަން ނިންމަވާފައިވާކަމަށް އެމްއޭސީއެލް އިން ހާމަކުރެއެވެ. މީގެ އިތުރުން، ވެލާނާ އިންޓަނޭޝަނަލް އެއާޕޯޓަށް މިހާރު ދަތުރުކުރާ އެއާލައިންތަކާއި، އަލަށް ގުޅެން ބޭނުންވާ އެއާލައިންތަކާ ބައްދަލުކޮށް، މިހާރު ދޭ ހިދުމައްތަކުގެ މަޢުލޫމާތާއި، އަހަރުގެ ހުރިހާ ދުވަސްވަރެއްގައި ދަތުރުކުރެވޭނެ ގޮތްތަކާއި، ވެލާނާ އިންޓަނޭޝަނަލް އެއާޕޯޓަށް އަލަށް ސިދާ ދަތުރުތައް ކުރުމުގެ ފުރުސަތުތަކާ ގުޅޭގޮތުން މަޝްވަރާކުރެވޭނެކަމުގައިވެސް އެ ކުންފުނިން ބުނެއެވެ.
މިދިޔަ ޖުލައި މަހު ވެސް މިފަދަ ދަތުރެއް، ރާއްޖޭގެ ޑެލިގޭޝަންނަކުން ވަނީ ޗައިނާއަށް ކޮށްފައެވެ. މިއީ ބައިނަލްއަގުވާމީ މުހިންމު މާކެޓުތަކުން ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށާއި، އެ ތަރުހީބާ އެއްވަރަށް ވައިގެ މަގުން ގުޅުވާލުން ފުޅާކުރުމަށް ކުރެވެމުންދާ މުހިންމު މަސައްކަތްތަކުގެ ބައެއްކަމުގައި އެ އިދާރާއިން ހާމަކުރިއެވެ.
އެމްއޭސީއެލްގެ އަމާޒަކީ އެއާލައިންތަކާއި ފަތުރުވެރިކަމުގެ ބައިވެރިންނާއެކު ސީދާ މަސައްކަތްކޮށް، ވެލާނާ އިންޓަނޭޝަނަލް އެއާޕޯޓަށް ދެވޭ ޚިދުމަތްތައް އިތުރުކުރުމާއި، މި މާކެޓުތަކުން ރާއްޖެއަށް އަންނަ ފަތުރުވެރިންނަށް ދަތުރުފަތުރުކުރުން ފަސޭހަކޮށްދިނުން ކަމުގައި އެ ކުންފުނިން ބުނެއެވެ.
