ރައީސް ޑރ. މުޙައްމަދު މުޢިއްޒު ޓޫރިޒަމާބެހޭ ޤާނޫނަށް އިޞްލާޙު ގެނައުމުގެ ބިލު ތަޞްދީޤު ކުރައްވައިފިއެވެ. މި ބިލު ރައްޔިތުންގެ މަޖިލީހަށް ހުށަހެޅުއްވީ ސަރުކާރުގެ ފަރާތުން ދަނގެތި ދާއިރާގެ މެންބަރު ޢަބްދުﷲ ރަޝީދު (އަވަސް އަބުޅޯ) އެވެ. މިދިޔަ ހަފުތާގެ ހޯމަ ދުވަހު ވަނީ އެއްވެސް ބަދަލެއް ނެތި މި ބިލު މަޖިލީހުން ފާސްކޮށްފައެވެ. ރައީސް ތަޞްދީޤު ކުރެއްވުމާ ގުޅިގެން މިހާރު ވަނީ ސަރުކާރުގެ ގެޒެޓުގައި ޝާއިޢުކޮށްފައެވެ.

މި އިޞްލާޙުގެ ދަށުން ރިސޯޓުތަކުގެ ކުލީގެ މުއްދަތު އިތުރުކުރުމަށް ފީ ދެއްކުމުގެ މުއްދަތު ކުރިން އޮތް 2 އަހަރުން 6 މަހަށް ކުރުކޮށްފައިވެއެވެ. އަދި ފީ ދެއްކުމުގެ އޮނިގަނޑުވެސް ބަދަލުކޮށްފައިވެއެވެ. މިގޮތުން 6 މަސް ތެރޭގައި ފީ ދައްކާނަމަ އަހަރަކަށް 100،000 ޑޮލަރު، އަދި 6 މަސް ފަހުން ދައްކާނަމަ އަހަރަކަށް 200،000 ޑޮލަރު ދައްކަންޖެހޭނެއެވެ.

މި ބަދަލު ގެނައުމުގެ މަޤްޞަދަކީ ރިސޯޓުތަކުގެ މުއްދަތު އިތުރުކުރުމަށް ފަސޭހަކަން ގެނައުމެވެ. ކުއްޔަށް ހިފާ ފަރާތުން ސަރުކާރަށް ދައްކަންޖެހޭ އެއްވެސް ފައިސާއެއް ނެތްނަމަ، ކުލީގެ މުއްދަތު 49 އަހަރަށް އިތުރުކުރެވޭނެއެވެ.

މުއްދަތު އިތުރުކުރުމުގެ ފީ ދެއްކުމަށް އޮތް ގަވާއިދުވެސް ބަދަލުކުރެވިފައިވެއެވެ. މިގޮތުން ހަ މަސް ތެރޭގައި ފީ ދައްކާނަމަ 5 މިލިއަން ޑޮލަރު، އަދި ހަ މަސް ފަހުން ދައްކާނަމަ 10 މިލިއަން ޑޮލަރު ދައްކަންޖެހޭނެއެވެ.

މި ބަދަލުތަކުން ކުއްޔަށް ހިފާ ފަރާތްތަކަށް އިތުރު ލުއިތަކެއް ލިބި، އަވަހަށް ފީ ދެއްކުމަށް ހިތްވަރު ލިބޭނެކަމަށް ބެލެވެއެވެ.