ގްރޭޓަރ މާލެ ސަރަޙައްދުގައި ހިންގާ ކުދި އަދި މެދުފަންތީގެ ވިޔަފާރިތަކަށް އެހީތެރިކަން ފޯރުކޮށްދިނުމުގެ މަޤްޞަދުގައި ބޭންކް އޮފް މޯލްޑިވްސް (ބީއެމްއެލް) އިން މަޢުލޫމާތު ދިނުމުގެ ހާއްސަ ސެޝަނެއް ބާއްވައިފިއެވެ.
މި ސެޝަނުގައި ވިޔަފާރިތަކަށް ބޭނުންވާ މުހިންމު ބޭންކިންގ ހިދުމަތްތަކާ ގުޅޭގޮތުން އަމަލީ މައުލޫމާތު ވަނީ ހިއްސާކޮށްފައެވެ. އޭގެ ތެރޭގައި ވިޔަފާރި އެކައުންޓްތަކާއި، ބިޒްނަސް ކާޑުތަކުގެ އިތުރުން މާޗަންޓް ޕޭމަންޓް ޓޫލްސްތަކާ ބެހޭ މައުލޫމާތާއި، އަލިޕޭ+ ފަދަ ހިދުމަތްތައް ބޭނުންކުރާނެ ގޮތްތަކުގެ ލައިވް ޑެމޮންސްޓްރޭޝަންތައް ވަނީ ދައްކާލާފައެވެ. އަދި ސެޝަން ނިންމާލާފައިވަނީ ބައިވެރިންގެ ސުވާލުތަކަށް ޖަވާބުދީ، ބޭންކުގެ އޮފިޝަލުންނާ ސީދާ މަޝްވަރާކުރުމަށް ހުޅުވާލެވުނު ސުވާލާއި ޖަވާބުގެ ބަޔަކުންނެވެ.
ގައުމީ ބޭންކުން ހާމަކުރި ގޮތުގައި، މި ބައްދަލުވުމުގެ މައިގަނޑު މަޤްޞަދަކީ ވިޔަފާރިތައް ކުރިއެރުވުމަށް ބޭނުންވާ ބޭންކިންގ އުފެއްދުންތަކަށް ލޯހުޅުވި، އެ ހިދުމަތްތައް ވިޔަފާރިވެރިންނަށް ފަސޭހަކަމާއެކު ލިބިގަނެވޭނެ މަގު ފަހިކޮށްދިނުމެވެ.
Advertisement
މި ހަރަކާތަކީ މާލެ ސަރަހައްދުގެ ކުދި އަދި މެދުފަންތީގެ ވިޔަފާރިތައް ބާރުވެރިކުރުވައި، އެ ދާއިރާ އިތުރަށް ހަރުދަނާކުރުމަށް ބީއެމްއެލް އިން ކުރަމުންދާ މަސައްކަތްތަކުގެ ތެރެއިން ކުރިއަށް ގެންދިޔަ މުހިންމު ސެޝަނެކެވެ.
