އެޗްޑީސީ މުވައްޒަފުންގެ ފަރާތުން ބްލަޑް ބޭންކަށް ލޭ ހަދިޔާކުރުމަށް، އެމްބީއެސްއާ ގުޅިގެން މިއަދު ބްލަޑް ކޭމްޕެއް ފަށައިފި

އެޗްޑީސީގެ މުވައްޒަފުންގެ ފަރާތުން ލޭހަދިޔާކުރުމަށް، ހައުސިން ޑިވަލޮޕްމެންޓް ކޯޕަރޭޝަން (އެޗްޑީސީ) އާއި މޯލްޑިވްސް ބްލަޑް ބޭންކް (އެމްބީއެސް) ގުޅިގެން ބްލަޑް ކޭމްޕެއް މިއަދު ފަށައިފިއެވެ.

ބްލަޑް ކޭމްޕު ފެށުމުގެ މައިގަނޑު މަގުސަދަކީ އެޗްޑީސީ މުވައްޒަފުންގެ ފަރާތުން ބަލްޑް ބޭންކަށް ވީހާވެސް ގިނަ ލޭ ހަދިޔާކުރުމަށާއި ބްލަޑް ބޭންކަށް ބޭނުންވާ ލޭ ހޯދައިދިނުމަށް އެޗްޑީސީ ސްޓާފުންގެ ފަރާތުން އެހީވުމަށް ކަމުގައި އެޗްޑީސީން މައުލޫމާތުދެއެވެ.

މި ބްލަޑް ކޭމްޕު ކުރިޔަށް ގެންދިއުމަށް ހަމަޖެހިފައިވަނީ މިއަދު ހެނދުނުން ފެށިގެން ހަވީރަށެވެ. އަދި، ލޭ ހަދިޔާ ކުރުމުގެ އިތުރުން މެޑިކަލް ޗެކަޕް ހެދުމުގެ ފުރުސަތު އެޗްޑީސީގެ ހުރިހާ މުވައްޒަފުންނަށް ހުޅުވާލާފައިވާކަމުގެ އެ އިދާރާއިން މައުލޫމާތުދެއެވެ.

މި ހަރަކާތާ ބެހޭގޮތުން ވާހަކަ ދައްކަވަމުން އެޗްޑީސީގެ ސީއެސްއާރުގެ އެސިސްޓެންޑް ޑިރެކްޓަރު ހަސަން ޝަހީދު ވިދާޅުވީ، ބްލަޑް ކޭމްޕު ކުރިޔަށް ގެންދިއުމަށް ނިންމެވީ މާލެ ސިޓީ ގްރޫޕް އޮފް ހޮސްޕިޓަލްސްގެ ފަރާތުން ބްލަޑް ބޭންކުގައި ލޭމަދުވެފައިވާ ކަމަށް މައުލޫމާތު ދިނުމުންނެވެ. އަދި އެޗްޑީސީގެ އިޖްތިމާއީ ޒިންމާގެ ދަށުން، މިއަހަރު ޖަނަވަރީ މަހުވެސް މިފަދަ ހަރަކާތެއް ކުރިޔަށް ގެންގޮސްފައިވާކަން ފާހަގަކުރެއްވިއެވެ. ހަމައެއާއެކު، ކުރިއަށްއޮތްތަނުގައިވެސް ސިލްސިލާކޮށް މިފަދަ ހަރަކާތްތައް ކުރިއަށްގެންދިއުމަށް އެ އިދާރާއިން އަމާޒު ހިފާފައިވާކަމަށް ޝަހީދު ވިދާޅުވިއެވެ.