ތުރުކީ، ސައޫދީ ޢަރަބިއްޔާ އަދި ޕާކިސްތާނާ ދެމެދު ދާދިފަހުން ގާއިމުކުރި ގުޅިފައިވާ ދިފާޢީ އެއްބަސްވުމުގައި މިސްރު ބައިވެރިވުމުގެ ފުރުސަތު އެބައޮތް ކަމަށް ތުރުކީގެ ރައީސް ރަޖަބް ތައްޔިބު އެރްދޮގާން ވިދާޅުވެއްޖެއެވެ.
އެރްދޮގާން ވިދާޅުވީ، މައްކާގައި ސޮއިކުރެވުނު މި ދިފާއީ އެއްބަސްވުމުގެ ދަށުން، އެއްބަސްވުމުގައި ބައިވެރިވާ އެއްވެސް ގައުމަކަށް ބޭރުގެ ހަމަލާއެއް އަތުވެއްޖެނަމަ، އެކުގައި ފިޔަވަޅު އަޅަންޖެހޭނެ ކަމަށެވެ. އަދި މި އެއްބަސްވުމަކީ މުޅި ދުނިޔެއަށް ދެވުނު މުހިންމު މެސެޖެއް ކަމަށާއި، މި އިއްތިހާދު އިތުރަށް ފުޅާކުރުމުގެ ފުރުސަތު އެބައޮތް ކަމަށް ވިދާޅުވަމުން، މިސްރު މި އެއްބަސްވުމާ ގުޅުމަކީ ވެދާނެ ކަމެއް ކަމަށް އެރްދޮގާން ފާހަގަކުރެއްވިއެވެ.
މިދިޔަ ހުކުރު ދުވަހު މައްކާގައި ސޮއިކުރި މި އެއްބަސްވުމުގައި ސޮއިކުރެއްވީ އެރްދޮގާންގެ އިތުރުން ސައޫދީ ވަލީއަހުދު މުހައްމަދު ބިން ސަލްމާން އަދި ޕާކިސްތާނުގެ ބޮޑުވަޒީރު ޝެހްބާޒް ޝަރީފެވެ. މިއީ ނޭޓޯގެ މާއްދާ 5 އާ އެއްގޮތަށް، އެއް ގައުމަކަށް ދެވޭ ހަމަލާއަކީ ތިން ގައުމަށް ދެވޭ ހަމަލާއެއްގެ ގޮތުގައި ބަލައިގަންނަ އެއްބަސްވުމެކެވެ. ނަމަވެސް، ޕާކިސްތާނުން ބުނެފައިވަނީ މިއީ ވަކި ގައުމަކާ ދެކޮޅަށް ހެދި ނުވަތަ ނޭޓޯ ފަދަ އިއްތިހާދެއްގެ ގޮތުގައި މާނަކޮށްގެން ނުވާނެ ކަމަށެވެ.
Advertisement
މީގެ އިތުރުން ސަރަޙައްދީ އެކި މައްސަލަތަކަށް އަލިއަޅުއްވާލައްވަމުން އެރްދޮޣާން ވިދާޅުވީ، ހޮރުމުޒް ކަނޑުއޮޅި އަލުން ހުޅުވުމަކީ އަންކާރާގެ އިސްކަމެއް ކަމަށާއި، މެދުއިރުމަތީގެ ހަނގުރާމަތައް ހުއްޓުވުމަށް ގަތަރުން ކުރަމުންދާ މެދުވެރިއެއްގެ ދައުރަށް ތައުރީފުކުރައްވާ ކަމަށެވެ.
ސޫރިޔާ، ގައްޒާ އަދި ލުބުނާން
ސަރަހައްދީ ހަމަނުޖެހުންތަކުގައި އަވަށްޓެރި ގައުމުތައް އެކަނި ދޫކޮށްނުލާނެ ކަމަށް ތުރުކީން ވައުދުވާ ކަމަށް އެރްދޮގާން ވިދާޅުވިއެވެ. ސޫރިޔާގެ ހަމަޖެހުމަށް ތުރުކީން އެއްބާރުލުން ދޭނެ ކަމަށާއި، އަދި ސޫރިޔާއަށް ޒިޔާރަތްކުރެއްވުމުގެ ވިސްނުންފުޅު ގެންގުޅުއްވާ ކަމަށްވެސް ވިދާޅުވިއެވެ.
ޣައްޒާއާ ބެހޭގޮތުން ވާހަކަދައްކަވަމުން އެރްދޮގާން ވިދާޅުވީ ތުރުކީން "ގައްޒާ އެކަނި ދޫކޮށްނުލާނެ" ކަމަށެވެ. އަދި ހަމާސްއިން އެމީހުންގެ ވައުދުތައް އިހްލާސްތެރިކަމާއެކު ފުއްދަމުންދާއިރު، އިސްރާއީލުން ގެންދަނީ ހަނގުރާމަ ކުރިއަށް ގެންދަމުން ކަމަށް ވިދާޅުވެ އިސްރާއީލަށް ފާޑުވިދާޅުވިއެވެ. ލުބުނާނަށް އިސްރާއީލުން ދެމުންދާ ޙަމަލާތަކާ މެދު ކަންބޮޑުވުން ފާޅުކުރައްވައި، އެމެރިކާގެ ރައީސް ޑޮނަލްޑް ޓްރަމްޕް ތުރުކީއަށް ކުރެއްވި ޒިޔާރަތުގައި މި ހަނގުރާމަ ހުއްޓުވުމުގައި ވޮޝިންޓަނުގެ ދައުރުގެ މުހިންމުކަން ހަނދާންކޮށްދެއްވި ކަމަށް އެރްދޮގާން ވިދާޅުވިއެވެ.
މީގެއިތުރުން ސޫދާނާއި ލީބިޔާއަށް ތުރުކީން އަބަދުވެސް އެހީތެރިކަން ދޭނެ ކަމަށާއި، ޔޫރަޕިއަން ޔޫނިއަން (އީޔޫ) ގެ މެންބަރަކަށް ވުމަކީ ދެން ތުރުކީގެ އިސްކަމެއް ނޫން ކަމަށާއި އޭގެ ސަބަބުން ގެއްލުންވާނީ ޔޫރަޕަށް ކަމަށްވެސް އެރްދޮގާން ވިދާޅުވިއެވެ.
އަދި އެމެރިކާގެ އެފް-35 މަތިންދާބޯޓުތަކާ ގުޅޭގޮތުން ޓްރަމްޕް ވެވަޑައިގެންނެވި ވައުދު ފުއްދަވާނެ ކަމަށް އުއްމީދުކުރައްވާ ކަމަށްވެސް އެރްދޮގާން ވިދާޅުވިއެވެ. ރަޝިޔާގެ އެސް-400 އެއާ ޑިފެންސް ސިސްޓަމް ގަތުމާ ގުޅިގެން 2019 ވަނަ އަހަރު ތުރުކީ ވަނީ އެފް-35 ޕްރޮގްރާމުން ވަކިކޮށްފައެވެ. ނަމަވެސް، ޓްރަމްޕް ވަނީ ތުރުކީއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލައި، އެފް-35 ޕްރޮގްރާމަށް ތުރުކީ އަނބުރާ ގެނައުމާމެދު ވިސްނަވާނެ ކަމަށް ވިދާޅުވެފައެވެ.
