އިންޑޮނޭޝިއާގެ ފްލޮރެސް އައިލެންޑް ކައިރިއަށް އައި ބާރުގަދަ ބިންހެލުމާ ގުޅިގެން، އެ ގައުމުގެ ރައީސް ޕްރަބޯވޯ ސުބިއަންޓޯއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާ ފޮނުއްވި މެސެޖުގައި، މި ހާދިސާގައި ގިނަ ބަޔަކު މަރުވެ، އިތުރު ބަޔަކަށް އަނިޔާވެފައިވާތީ އެކަމުގެ ހިތާމައިގައި ދިވެހި ސަރުކާރާއި ރައްޔިތުންގެ ފަރާތުން އިންޑޮނޭޝިއާގެ ސަރުކާރަށާއި ރައްޔިތުންނަށް އިޚްލާޞްތެރި ތައުޒިޔާ ވަނީ ރައްދުކުރައްވާފައެވެ. ވަކިން ޚާއްޞަކޮށް، މި ހާދިސާގައި މަރުވި މީހުންގެ އާއިލާތަކަށް ކެތްތެރިކަން ދެއްވުމަށް އެދިވަޑައިގެން، މި ދަނޑިވަޅުގައި ދިވެހިރާއްޖެ އޮތީ އިންޑޮނޭޝިއާގެ ރައްޔިތުންނާ އެކުގައިކަން އެމަނިކުފާނު ހާމަކުރެއްވިއެވެ.

މީގެ އިތުރުން، ބިންހެލުމުގެ ސަބަބުން ގެދޮރު ގެއްލުނު މީހުންނަށް ހަމްދަރުދީ ފޮނުއްވައި، މީހުން ސަލާމަތްކުރުމުގައި ހަރަކާތްތެރިވާ އިމަޖެންސީ ޚިދުމަތްތަކުގެ މަސައްކަތްތައް ރައީސް ވަނީ ފާހަގަކުރައްވާފައެވެ.

ޔޫއެސް ޖިއޮލޮޖިކަލް ސަވޭ (ޔޫ.އެސް.ޖީ.އެސް) އިން މައުލޫމާތު ދޭ ގޮތުގައި މި ބިންހެލުން އައިސްފައިވަނީ ހޮނިހިރު ދުވަހުގެ ހެނދުނު ރާއްޖެ ގަޑިން ފަތިހު 3:58 (އިންޑޮނޭޝިއާ ގަޑިން ހެނދުނު 5:58) ގައެވެ. މި ބިންހެލުން އުފެދުނު މަރުކަޒަކީ އީސްޓް ނޫސާ ޓެންގާރާ ޕްރޮވިންސްގެ އެންޑޭ ސިޓީއާ ގާތްގަނޑަކަށް 68 ކިލޯމީޓަރު ދުރުން، ކަނޑުގެ 10 ކިލޯމީޓަރު އަޑިއަށެވެ. މި ބާރުގަދަ ބިންހެލުމަށްފަހު، އެ ދުވަހު އިތުރު ލޮޅުންތައްވެސް އަރާފައިވާއިރު، އޭގެ ތެރޭގައި 6.1 މެގްނިޓިއުޑްގެ ބާރުގަދަ ލޮޅުމެއްވެސް ހިމެނެއެވެ.

މި ހާދިސާގައި އެތައް އިމާރާތެއް ވެއްޓިފައިވާއިރު، 2،000 އަށްވުރެ ގިނަ މީހުން ވަނީ ގެދޮރު ދޫކޮށް ރައްކާތެރި ހިސާބުތަކަށް ބަދަލުވެފައެވެ. ބިންހެލުމާ ގުޅިގެން ސުނާމީގެ އިންޒާރު ނެރުނު ނަމަވެސް، ފަހުން ވަނީ އެ އިންޒާރު އުވާލާފައެވެ. މަގުތައް ބަންދުވުމުގެ ސަބަބުން އެހީ ފޯރުކޮށްދިނުމަށް ގޮންޖެހުންތައް ކުރިމަތިވެފައިވާއިރު، މަރުވި މީހުންގެ އަދަދު އިތުރުވުން އެކަށީގެންވާ ކަމަށް ރިޕޯޓުތައް ބުނެއެވެ.