ހއ. އުތީމަށް ދިމާވެފައިވާ އެކި މައްސަލަތަކަށް ހައްލު ހޯއްދަވައިދެއްވުމަށް ސަރުކާރުން މަސައްކަތް ކުރައްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފި އެވެ.
ރައީސް މިފަދައިން ވިދާޅުވީ، މިއަދު މެންދުރުފަހު އުތީމު ކައުންސިލް އިދާރާގައި އެ ރަށު ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ (އތމ) ކޮމިޓީގެ އިތުރުން ރަށުގެ މުއައްސަސާތަކުގެ އިސްވެރިންނާ ބައްދަލުކުރައްވައި ބޭއްވެވި މަޝްވަރާ ބައްދަލުވުމުގައި ވާހަކަފުޅު ދައްކަވަމުންނެވެ. މި ބައްދަލުވުމުގެ މައިގަނޑު މަގްސަދަކީ ރަށުގެ ތަރައްގީއަށް ބޭނުންވާ ކަންކަމާއި ރައްޔިތުންނަށް އެންމެ މުހިންމުވެފައިވާ ކަންކަން އޮޅުންފިލުއްވުމެވެ.
މި ބައްދަލުކުރެއްވުމުގައި އުތީމު ކައުންސިލުން ވަނީ ރަށުގެ އުމްރާނީ ތަރައްގީއަށް ހުރި ބައެއް ދަތިތަކާއި ކަންބޮޑުވުންތައް ރައީސްއާ ހިއްސާކޮށްފަ އެވެ. އެގޮތުން ރަށުގެ ބަނދަރާއި ބަންޑާރަ މިސްކިތުގެ މަސައްކަތް ވީހާވެސް އަވަސް ފުރުސަތެއްގައި ފެށިގެން ދިއުމަށް އުންމީދުކުރައްވާކަން ކައުންސިލުން ފާހަގަކުރި އެވެ. މީގެ އިތުރުން ސްޓޭޓް ހައުސްގެ މަސައްކަތުގެ އެންމެ ފަހުގެ މައުލޫމާތު އޮޅުންފިލުއްވައި، ފުޓްސަލް ދަނޑާއި ވޮލީ ކޯޓުގެ އިތުރުން ރަށު ކައުންސިލް އިދާރާގެ އައު އިމާރާތުގެ މަސައްކަތް އަވަހަށް ނިންމަވައިދެއްވުމަށް ކައުންސިލުން އެދިފަ އެވެ.
Advertisement
އިޖުތިމާޢީ ދާއިރާއިން ހުރި ކަންބޮޑުވުންތަކަށް އަލިއަޅުއްވާލައްވަމުން، އުތީމު ސިއްހީ މަރުކަޒުގައި ނަރުހުންގެ އަދަދު މަދުވުމުގެ ސަބަބުން ކުރިމަތިވާ ދަތިތަކާއި، ޖުމްލަގޮތެއްގައި މުވައްޒަފުންގެ ދަތިކަން އޮތް މިންވަރު ކައުންސިލުން ވަނީ ފާހަގަކޮށްފަ އެވެ.
ކައުންސިލުން ހުށަހެޅި ކަންކަމަށް ޖަވާބުދެއްވަމުން ރައީސް ވިދާޅުވީ، ކައުންސިލުން ފާހަގަކުރެއްވި ކަންކަން ވަރަށް ގާތުން ބައްލަވާނެ ކަމަށެވެ. އަދި އުތީމުގެ ތަރައްޤީއަށް ހުރި ހުރަސްތައް ނައްތާލައި، ފާހަގަކުރެވުނު މައްސަލަތަކަށް ދާއިމީ ހައްލެއް ހޯއްދަވައިދެއްވުމަށް ސަރުކާރުން މަސައްކަތް ކޮށްދެއްވާނެ ކަމުގެ ފުރިހަމަ ޔަގީންކަން އެމަނިކުފާނު ދެއްވި އެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުންގެ މަޖިލީހުގެ މެންބަރުން ވަނީ، އުތީމުގައި މިހާރު ކުރިއަށްދާ އަދި ކުރިއަށް ރޭވިފައިވާ މަޝްރޫއުތަކުގެ އެންމެ ފަހުގެ މައުލޫމާތުތައް ކައުންސިލާ ހިއްސާކޮށްފަ އެވެ.
